नेपाल राष्ट्र बैंकले २५ अर्ब रुपैयाँ बराबरको ऋणपत्र जारी गर्ने, बैंक वित्तीय संस्थाले लगानी गर्न पाउने

काठमाडौँ । नेपाल राष्ट्र बैंकले २५ अर्ब रुपैयाँ बराबरको ऋणपत्र जारी गर्ने भएको छ । केन्द्रीय बैंकले एक वर्ष अवधिको ‘नेपाल राष्ट्र बैंक ऋणपत्र, २०८३ छ’ आजदेखि जारी गर्न लागेको हो ।

राष्ट्र बैंकले जारी गरेको सूचनाअनुसार उक्त ऋणपत्रका लागि अनलाइनमार्फत आवेदन दिन सकिनेछ । तर, यस ऋणपत्रमा नेपाल राष्ट्र बैंकबाट इजाजतपत्र प्राप्त क, ख र ग वर्गका बैंक तथा वित्तीय संस्था (काउन्टरपार्टी) ले मात्र सहभागी हुन पाउनेछन् ।

इच्छुक बैंक तथा वित्तीय संस्थाहरूले न्यूनतम ५ करोड रुपैयाँ र अधिकतम आह्वान गरिएको कुल रकमसम्म आवेदन दिन सक्नेछन् । आवेदन रकम ५ करोड रुपैयाँले भाग गर्दा निःशेष भाग जाने गरी पेश गर्नुपर्ने व्यवस्था गरिएको छ ।

राष्ट्र बैंकका अनुसार ऋणपत्र निष्कासन मितिमा काउन्टरपार्टीको खातामा पर्याप्त मौज्दात नभएमा स्वीकृत बोल रकम रद्द गरिनेछ । साथै, त्यस्ता काउन्टरपार्टीलाई स्वीकृत बोल रकमको २.५० प्रतिशत दरले हर्जना लगाइनेछ भने ६ महिनासम्म खुला बजार कारोबार तथा ब्याजदर करिडोरअन्तर्गतका कुनै पनि बोलकबोलमा सहभागी हुन नपाउने गरी बन्देज लगाइनेछ ।

यसअघि केन्द्रीय बैंकले एक–एक वर्ष अवधिका तीनवटा ऋणपत्र जारी गरिसकेको छ । ऋणपत्रको ब्याजदर बोलकबोल प्रक्रियामार्फत निर्धारण गरिनेछ भने ब्याज भुक्तानी अर्धवार्षिक रूपमा गरिनेछ । यस ऋणपत्रको सावाँ भुक्तानी २०८३ पुस २८ गते हुने नेपाल राष्ट्र बैंकले जनाएको छ ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?