भ्याल्यू स्टक भनेको के हो, कसरी छान्ने यस्ता सेयर ?

काठमाडौं : सेयर बजारमा विभिन्न किसिमका गुण र विशेषता भएका स्टकहरु हुने गर्छन् । कुनै डिभिडेन्डमा केन्द्रित भएका स्टकहरु हुन्छन् भने कुनै ग्रोथ स्टक हुने गर्छन् । त्यसैगरी कुनै इन्कम स्टकहरु हुन्छन् । यी स्टकहरुका आ–आफ्नै विशेषता हुने गर्दछन् । यसर्थ, आफू कस्तो किसिमको लगानीकर्ता हो ? त्यसको पहिचान गरी सोही अनुसार स्टकहरु छनोट गर्न सक्नुपर्छ । 

लाभांशमा केन्द्रित हुने कि, पुँजीगत लाभलाई बढीमात्रामा जोड दिने कि भन्ने कुरा स्वयं लगानीकर्तामा निर्भर रहने गर्छ । यस्तै, कुनै स्मल क्यापका कम्पनीहरु हुन् सक्छन्, जसमा छिटोछिटो भाउ उतारचढाव हुने गर्दछ । यस्ता कम्पनी विशेषगरी ट्रेडिङ प्रपोजले बढी महत्वपूर्ण हुन सक्छ ।

यसैगरी, लार्ज क्याप र सबल आधारभूत पक्ष भएका कम्पनीहरुले ढिलो पुँजीगत लाभ दिए पनि लाभांशबाट पर्याप्त फाइदा लिन सकिने हुन सक्छ । यसतर्फ, सर्वसाधारण लगानीकर्ताले विशेष ख्याल गर्नुपर्ने हुन्छ । यसैसन्दर्भमा यसपटक हामी भ्याल्यू स्टक र इन्कम स्टकका बारेमा चर्चा गर्दैछौं । भ्याल्यू स्टक के हो ? कसका लागि यस्ता स्टक बढी महत्वपूर्ण हुन्छ भन्नेबारेमा सामान्य जानकारी दिने प्रयास गर्दैछौं । 

भ्याल्यू स्टक 
विशेषगरी अन्डरभ्याल्यूड भएका स्टकहरु छनोट गरी पर्याप्त लाभ लिन सक्नु । उचित अनुसन्धान र गृहकार्य गर्नेहरुका लागि अन्डरभ्याल्यूड स्टकहरुले लामो समयसम्म नाफा प्रदान गर्न सक्दछ । यसमा बजारमा अवमूल्यनमा परेका अथवा आधारभूत र प्राविधिक पक्षका आधारमा आफ्नो वास्तविक भाउ भन्दा कम मूल्यमा कारोबार भइरहेका सेयरहरुलाई यस वर्गमा लक्षित गरिन्छ । यस्ता कम्पनीहरुको लाभांश वितरण क्षमता प्रायः उच्च हुन्छ ।

वा, प्राइस टु बुक (पीबी) रेसियो, मूल्य आम्दानी अनुपात (पीई रेसियो) लगायत वित्तीय अनुपातहरु न्यून हुन सक्छ । भ्याल्यू स्टकहरुको वित्तीय अवस्था मजबुत हुँदाहुँदै पनि बजारले भने लामो समयसम्म यस्ता सेयरप्रति नकारात्मक भावना बनाएको पाइन्छ । यस्तो भावना कम्पनीको वित्तीय अवस्थाका आधारमा नभई अन्य कुनै घटनालाई आधार बनाएर विकास हुने गर्दछ । 

भ्याल्यू स्टकहरु सामान्यतयः मूल्यका हिसाबले स्थिर हुने गर्दछन् । यस्ता कम्पनीहरु बजारमा स्थापित भएका हुन्छन् । तसर्थ, जोखिमको सम्भावना पनि निकै कम हुने गर्दछ । यस्ता कम्पनीहरुले लगानीकर्तालाई नियमित लाभांश पनि दिन्छन् र आम्दानीको उचित स्रोत पनि बन्न सक्छन् । यद्दपि, लगानीकर्ताको उद्देश्य भने यस्ता कम्पनीहरु अवमूल्यनमा परेको बेला खरिद गर्ने र बढेर उचित मूल्यमा पुगेपछि बिक्री गर्ने नै हुन्छ ।

भ्याल्यू स्टक कस्ता लगानीकर्तालाई बढी लाभदायी हुन्छ ? 

भ्याल्यू स्टक ‘लो रिस्क प्रोफाइल’ भएका लगानीकर्ता र बजारमा अल्डरभ्याल्यूड स्टक पत्ता लगाउने क्षमता भएका लगानीकर्ताका लागि उपयोगी हुन्छ । भ्याल्यू सेयरको फन्डामेन्टल राम्रो भए पनि लगानीकर्ताको रोजाइमा पर्न सकेका हुँदैनन् । तसर्थ, यस्ता सेयरहरुको सम्भावना पत्ता लगाउने काम लगानीकर्ता आफैंको हो । मूल्यमा तीब्र अस्थिरता नरुचाउने लगानीकर्ताका लागि पनि यस्तो स्टक काम लाग्न सक्छ । साथै, बजारका नयाँ कारोबारीले पनि ट्रेडिङमा प्रयोग गर्न सक्छन् ।

इन्कम वा डिभिडेन्ड स्टक के हो ? 

इन्कम वा डिभिडेन्ड स्टकलाई स्थिर आम्दानी दिने स्टकका रुपमा लिन सकिन्छ । स्थिर आम्दानी दिने पोर्टफोलियो निर्माण गर्न चाहने लगानीकर्ताले इन्कम स्टक रोज्ने गर्दछन् । सामान्यतयः स्थिर आम्दानी दिने मुद्दति निक्षेम, ट्रेजरीलगायत अन्य उपकरणको भन्दा बढी आम्दानीको चाहना गरी यस्ता सेयरमा लगानी गरिन्छ । यस्ता कम्पनीहरुको प्रदर्शन निरन्तर राम्रो हुने गर्दछ । वित्तीय रुपमा यस्ता कम्पनीहरु मजबुत हुने गर्दछन् ।

इन्कम स्टक कसका लागि बढी लाभदायी ? 

उच्च लाभांश चाहने लगानीकर्ताले यस्ता कम्पनीमा लगानी गर्न सक्दछन् । स्थिर आय वृद्धि गर्न चाहनेका लागि डिभिडेन्ड स्टक प्रभावकारी हुन सक्छन् । अवकास पाउने उमेर हुन लागेका र तलबको विकल्प खोजिरहेका लगानीकर्ताका लागि यो फाइदाकारी हुनसक्छ । 

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने