नेपाली कांग्रेसले १६५ निर्वाचन क्षेत्रमा उम्मेदवारी दियो: गठबन्धनबिनै चुनावी मैदानमा, हेर्नुहोस् सूचिसहित

काठमाडौं। नेपाली कांग्रेसले फागुन २१ गते हुने प्रतिनिधि सभा निर्वाचनका लागि देशभरका सबै १६५ निर्वाचन क्षेत्रमा उम्मेदवारी दिएको छ। यसपालि कांग्रेसले कुनै पनि दलसँग गठबन्धन नगरी एक्लै चुनाव लड्ने निर्णय गरेको हो। पछिल्ला चुनावहरूमा गठबन्धन गर्दै आएको कांग्रेसले यसपटक भने स्वतन्त्र रूपमा प्रतिस्पर्धा गर्ने रणनीति अपनाएको छ।

यद्यपि, माघ ११ गते हुने राष्ट्रिय सभा निर्वाचनका लागि भने कांग्रेसले नेकपा एमाले र लोकतान्त्रिक समाजवादी पार्टी (लोसपा)सँग तालमेल गरेको छ। राष्ट्रिय सभाका लागि तालमेल गर्ने निर्णय कांग्रेसका निवर्तमान सभापति शेरबहादुर देउवाकै कार्यकालमा भएको थियो।

विशेष महाधिवेशनपछि गगन थापाको नेतृत्वमा नयाँ कार्यसमिति चयन भएसँगै कांग्रेसले प्रतिनिधि सभा निर्वाचनमा गठबन्धन नगर्ने निर्णयलाई कार्यान्वयनमा ल्याएको हो। विशेष महाधिवेशनले यसअघि महासमिति बैठकले गरेको निर्णयलाई निरन्तरता दिँदै १६५ वटै क्षेत्रमा उम्मेदवारी दिने स्पष्ट निर्णय गरेको थियो।

लक्ष्मी बैंकका प्रवक्ता देवराज चालिसेले सेतोपाटीसँग कुरा गर्दै कांग्रेसले १६५ जना उम्मेदवार चयन गरेको र तीमध्ये १०६ जना नयाँ उम्मेदवार रहेको जानकारी दिए। “१६५ उम्मेदवारमध्ये १०६ जना नयाँ हुनुहुन्छ। यसपालि ११ जना महिला उम्मेदवार प्रत्यक्षतर्फ खडा गरिएको छ, जबकि यसअघि प्रत्यक्षतर्फ टिकट पाउने महिलाको संख्या जम्मा पाँच थियो,” उनले भने, “युवाहरूलाई पनि प्राथमिकतामा राखिएको छ।”

युवातर्फ काठमाडौं–४ बाट सचिन तिमल्सेना, इलाम–१ बाट निस्कल राई र रोल्पाबाट सुदनकुमार ओली कांग्रेसका उम्मेदवार बनेका छन्। चालिसेले समयको चापबीच पनि प्रत्यक्षतर्फ समावेशी उम्मेदवारी दिन प्रयास गरिएको बताए। “पार्टीका सबै पक्ष समेट्ने प्रयास भएको छ। केही कमजोरी छन्, ती सच्याउँदै जानेछौं,” उनले भने।

उनका अनुसार आग्रह वा पूर्वाग्रह नराखी टिकट वितरण गरिएको हो। क्षेत्र, जिल्ला र प्रदेशबाट सिफारिस भई आएका नामलाई प्राथमिकता दिँदै १३ सदस्यीय संसदीय बोर्डमार्फत टिकट वितरण गरिएको कांग्रेसको दाबी छ। कतिपय क्षेत्रमा दुई–दुई जनाले उम्मेदवारी दाबी गरेकाले आधिकारिक उम्मेदवारको विवरण निर्वाचन अधिकृत कार्यालयलाई जानकारी गराइने पनि नेताहरूले बताएका छन्।

सुनसरी–३ मा विजयकुमार गच्छदार र बेदनारायण गच्छदार दुवैका नाममा टिकट गए पनि विजयकुमार गच्छदारले उम्मेदवारी दर्ता गराइसकेका छन्। नवलपुर–१ मा बालकृष्ण घिमिरे र नवलपरासी–२ मा देवेन्द्रराज कँडेल कांग्रेसका उम्मेदवार बनेका छन्।

यसपटक निवर्तमान सभापति शेरबहादुर देउवा, निवर्तमान कार्यवाहक सभापति पूर्णबहादुर खड्का, निवर्तमान उपसभापति धनराज गुरुङ, पूर्वउपसभापति गोपालमान श्रेष्ठ, पूर्वमहामन्त्री शशांक कोइराला, पूर्वमहामन्त्री प्रकाशमान सिंह, पूर्वगृहमन्त्री रमेश लेखक लगायतका वरिष्ठ नेताहरू चुनावी मैदानमा उत्रिएका छैनन्।

कांग्रेसले गुटका आधारमा नभई जित्ने सम्भावनालाई आधार बनाएर उम्मेदवार चयन गरिएको दाबी गरेको छ। यसपटक महाधिवेशन प्रतिनिधिहरूले पनि टिकट पाएका छन्। रौतहट–१ बाट सद्भावना पार्टीका अध्यक्ष अनिलकुमार झा उम्मेदवार बनेका छन्। सद्भावना पार्टीलाई नेपाली कांग्रेसमा समाहित गर्ने उद्देश्यसहित झालाई उम्मेदवार बनाइएको नेताहरूले बताएका छन्।

कुल मिलाएर यसपटक कांग्रेसले करिब दुई तिहाइ नयाँ उम्मेदवारसहित प्रतिनिधि सभा निर्वाचनमा होमिएको छ, जसलाई पार्टीले पुस्तान्तरण र समावेशीतर्फको महत्वपूर्ण कदमका रूपमा व्याख्या गरेको छ।

हेर्नुहोस् कुन क्षेत्रमा कसको उम्मेदवारी

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन