नेपालको शेयर बजार : चुनौतीसँगै अवसर पनि, दीर्घकालीन सुधारमा जोड

काठमाडौं, असार २८ नेपालको पूँजी बजार अहिले अनिश्चितता, अवसर र लगानीकर्ताको अपेक्षाबीचको संवेदनशील मोडमा पुगेको विश्लेषण गरिएको छ। २०८३ सालको जेठदेखि असारसम्म देखिएको बजारको तीव्र उतारचढावले लगानीकर्ताको मनोविज्ञानमा समेत प्रभाव पारेको विश्लेषकहरूको भनाइ छ।

हाल नेप्से सूचक स्थिर दिशामा अघि बढ्न नसकेको, कारोबार रकम पनि मध्यम स्तरमै सीमित रहेको उल्लेख गरिएको छ। बैंकिङ, जलविद्युत् र उत्पादनमूलक क्षेत्रमा सुधारका संकेत देखिए पनि माइक्रोफाइनान्स र बीमा क्षेत्रमा भने दबाब कायम रहेको विश्लेषणमा उल्लेख छ।

विश्लेषणअनुसार नेपाली शेयर बजारमा आधारभूत आर्थिक सूचकभन्दा लगानीकर्ताको मनोविज्ञान, अफवाह, छोटो अवधिको नाफामुखी सोच तथा भीड मानसिकताले मूल्यमा बढी प्रभाव पार्ने गरेको छ। यसले बजारलाई थप अस्थिर बनाएको टिप्पणी गरिएको छ।

बैंकिङ प्रणालीमा पर्याप्त तरलता हुँदाहुँदै पनि कर्जा प्रवाह अपेक्षित रूपमा बढ्न नसकेको, व्यवसायीको लगानीप्रति हिच्किचाहट र बैंकहरूको जोखिमप्रति सतर्कताले वास्तविक अर्थतन्त्रमा नगद अभाव देखिएको विश्लेषणमा उल्लेख छ। साथै, निक्षेपको ब्याजदर घट्दै जाँदा वैकल्पिक लगानीको सम्भावना बढे पनि शेयर बजारप्रतिको विश्वास कमजोर हुँदा त्यसको पूर्ण लाभ लिन नसकिएको जनाइएको छ।

विश्लेषणले पूँजीगत लाभकर, नियामकीय व्यवस्था तथा राजनीतिक अस्थिरताले पनि बजारमा प्रभाव पारेको जनाएको छ। सरकार परिवर्तनको सम्भावना, नीतिगत अन्योल तथा निर्णय प्रक्रियामा ढिलाइले लगानीकर्ताको विश्वास कमजोर बनेको उल्लेख गरिएको छ।

यद्यपि, जलविद्युत् कम्पनीहरूको आईपीओमा उच्च आकर्षण, डिजिटल कारोबार प्रणालीको विस्तार, वित्तीय साक्षरतामा वृद्धि तथा ऊर्जा र पूर्वाधार क्षेत्रमा बढ्दो लगानीलाई बजारका सकारात्मक पक्षका रूपमा औंल्याइएको छ।

विश्लेषणमा दीर्घकालीन सुधारका लागि लगानीकर्ताले तथ्यमा आधारित निर्णय गर्नुपर्ने, सरकारले स्थिर र लगानीमैत्री नीति ल्याउनुपर्ने, बैंकिङ प्रणालीको तरलतालाई उत्पादनमूलक क्षेत्रमा परिचालन गर्नुपर्ने तथा नियामकीय सुधारलाई प्रभावकारी बनाउनुपर्ने सुझाव दिइएको छ।

त्यस्तै, सूचना पारदर्शिता बढाउने, इनसाइडर ट्रेडिङ नियन्त्रण गर्ने, संस्थागत लगानीकर्ताको भूमिका विस्तार गर्ने तथा आईटी, पर्यटन र उत्पादनजस्ता नयाँ क्षेत्रलाई पूँजी बजारमा आकर्षित गर्नुपर्ने आवश्यकता पनि औंल्याइएको छ।

विश्लेषणको निष्कर्षमा नेपालको शेयर बजार अहिले चुनौती र अवसरको संगममा रहेको उल्लेख गर्दै दीर्घकालीन सोच, स्पष्ट नीति र लगानीकर्ताको विश्वासले मात्र बजारलाई स्थायित्वतर्फ लैजान सकिने बताइएको छ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना