नयाँ जीवन बीमा कम्पनीहरु मध्ये सिटिजन लाइफ सबैभन्दा आक्रामक, मर्जर विनानै पुराना स्थापित कम्पनीको बलियो प्रतिस्पर्धी

BFIS News
2024 Oct Mon 11:32

नयाँ जीवन बीमा कम्पनीहरु मध्ये सिटिजन लाइफ सबैभन्दा आक्रामक, मर्जर विनानै पुराना स्थापित कम्पनीको बलियो प्रतिस्पर्धी

काठमाडौं । नयाँ जीवन बीमा कम्पनीहरु मध्ये जीवन बीमा व्यवसायमा सिटिजन लाइफ सबैभन्दा धेरै आक्रामक देखिएको छ । कम्पनीको जीवन बीमा व्यवसाय कतिपय पुराना कम्पनीको भन्दा माथि छ । सिटिजनले मर्जर विनानै मेट लाइफ र राष्ट्रिय जीवन बीमा कम्पनी जस्ता पुराना र स्थापित कम्पनीलाई पछाडी पारेको छ ।

चालु आर्थिक वर्षको पहिलो त्रैमाशिक अवधिमा सिटिजन लाइफले प्रथम बीमा शुल्क आर्जन १७.७६ प्रतिशतले बृद्धि गरेको छ । त्यस्तै नविकरण बीमा शुल्क आर्जन तर्फ १५.६५ प्रतिशत र कुल बीमा शुल्क आर्जन तर्फ १६.१५ प्रतिशतले बृद्धि गर्न सफल भएको छ ।

कम्पनीले पहिलो तीन महिनामा ४८ करोड ४६ लाख र नविकरण बीमा शुल्क एक अर्व २५ करोड सहित कुल एक अर्ब ७४ करोड रुपैयाँ बीमा शुल्क आर्जन गरेको हो । यस हिसावले सिटिजन लाइफको स्थान छैठो, नविकरण तर्फ सातौ र कुल तर्फ पनि ७ औं स्थान ओगट्न सफल भएको छ ।

बजार हिस्साको हिसावले हेर्ने हो भने प्रथम बीमा शुल्क आर्जन तर्फ ५.९९ प्रतिशत, नविकरण तर्फ ३.८२ प्रतिशत र कुल तर्फ ४.२५ प्रतिशत हिस्सा ओगटेको छ ।

कम्पनीको आक्रामक बजार विस्तार र व्यवसायिक रणनीतिका कारण पछिल्ला वर्षमा छलाङ मार्दै आइरहेको छ । जीवन बीमा क्षेत्रमा अनुभवी र आक्रामक व्यक्तित्वहरुले सुरुवातिदिन देखिनै कम्पनीको आधार बलियो बनाएका थिए । जसले गर्दा आजका दिनमा अन्य नयाँ कम्पनीहरु एक आपसमा मर्जर हुँदा पनि सिटिजन लाइफलाई उछिन्न सकिरहेका छैनन् । साथै नयाँ र पुराना कम्पनी मर्जर भएर ठुला बनेका कम्पनीलाई पनि सिटिजन लाइफले राम्रै टक्कर दिएको छ ।

प्रिमियममा आइपिओ निष्काशन गरेर पूँजीकोष बलियो बनाएको सिटिजन लाइफले मर्जरको कुनै पनि स्टेप अगाडी बढाएन, बलियो संस्थापक शेयरधनी र अनुभवी नेतृत्वका कारण कम्पनीले आजका दिनमा जीवन बीमा क्षेत्रमा आफुलाई आक्रामक रुपमा प्रस्तुत गर्न सफल भएको हो ।