माछापुच्छ्रे बैंकको खुद नाफा ९२ प्रतिशतले बढेर २ अर्ब नाघ्यो, ९ प्रतिशत लाभांश दिन सक्ने क्षमता

BFIS News
2025 Aug 05 11:11

माछापुच्छ्रे बैंकको खुद नाफा ९२ प्रतिशतले बढेर २ अर्ब नाघ्यो, ९ प्रतिशत लाभांश दिन सक्ने क्षमता

काठमाडौं । माछापुच्छ्रे बैंक लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरणअनुसार बैंकले सो अवधिमा २ अर्बभन्दा बढी खुद नाफा आर्जन गर्न सफल भएको छ।

गत आर्थिक वर्षको अन्त्यसम्ममा बैंकले २ अर्ब १ करोड १४ लाख रुपैयाँ खुद नाफा कमाएको हो। यो अघिल्लो आर्थिक वर्षको सोही अवधिको तुलनामा ९२.४५ प्रतिशतले वृद्धि भएको हो। अघिल्लो वर्षको सोही अवधिमा बैंकको खुद नाफा १ अर्ब ४ करोड ५१ लाख रुपैयाँ रहेको थियो।

बैंकको खुद ब्याज आम्दानीमा वृद्धिसँगै इम्पेरमेन्ट चार्ज घटेकाले नाफामा उल्लेखनीय वृद्धि भएको हो। समीक्षा अवधिमा बैंकको खुद ब्याज आम्दानी १५.४१ प्रतिशतले बढेको छ भने खुद फि तथा कमिशन आम्दानी १८.१६ प्रतिशतले बढेको छ। त्यसैगरी, कुल सञ्चालन आम्दानी १६.५१ प्रतिशतले बढेको छ भने सञ्चालन मुनाफा भने झण्डै दोब्बर ९९.९१ प्रतिशतले वृद्धि भएको छ।

बैंकको इम्पेरमेन्ट चार्ज पनि घटेर १ अर्ब ३९ करोड रुपैयाँबाट ३५ करोड ३७ लाख रुपैयाँमा झरेको छ। जसको प्रत्यक्ष असर बैंकको सञ्चालन मुनाफा र खुद नाफामा परेको हो।

नाफासँगै बैंकको प्रतिशेयर आम्दानी (EPS) समेत उल्लेख्य बढेको छ। समीक्षा अवधिमा प्रतिशेयर आम्दानी ८ रुपैयाँ ३१ पैसाले बढेर १७ रुपैयाँ ३१ पैसा पुगेको छ। असार मसान्तसम्ममा बैंकको वितरणयोग्य मुनाफा १ अर्ब ७ करोड रुपैयाँ रहेको छ भने वितरणयोग्य प्रतिशेयर आम्दानी ९ रुपैयाँ २३ पैसा कायम भएको छ।

उक्त अवधिसम्ममा बैंकको मूल्य आम्दानी अनुपात (P/E Ratio) १४.९९ गुणा रहेको छ भने प्रतिशेयर नेटवर्थ १६३ रुपैयाँ ८० पैसा रहेको छ।

११ अर्ब ६२ करोड १३ लाख रुपैयाँ चुक्ता पूँजी रहेको बैंकको जगेडा कोषमा ७ अर्ब ४१ करोड रुपैयाँ सञ्चित छ। सो अवधिसम्ममा बैंकले १८ खर्ब ४१ अर्ब ७६ करोड रुपैयाँ निक्षेप संकलन गरी १४ खर्ब १६ अर्ब ३६ करोड रुपैयाँ कर्जा लगानी गरेको छ।