म्युचुअल फण्डले दिए बैंकको व्याजदर भन्दा आकर्षक लाभांश, न्युन लागतमा अझै १४ मध्ये १० वटाको लाभांश सुरक्षित गर्न सकिने

प्रभात कुईकेल
2025 Aug Wed 17:05

काठमाडौं, साउन २१ गते। आर्थिक वर्ष २०८१/८२ को अन्त्यसँगै देशका विभिन्न म्युचुअल फण्डहरूले लगानीकर्तालाई आकर्षक प्रतिफल घोषणा गरेका छन्। हालसम्म १४ वटा म्युचुअल फण्डहरूले नगद लाभांश घोषणा गरिसकेका छन्, जसको औसत प्रतिफल दर ११ प्रतिशतको हाराहारीमा रहेको छ। यो दर हाल बैंक तथा वित्तीय संस्थाहरुले दिने निक्षेपको औसत व्याजदरभन्दा धेरै आकर्षक मानिएको छ।

सर्वाधिक लाभांश दिने फण्ड : लक्ष्मी उन्नति कोष

लक्ष्मी क्यापिटलमार्फत सञ्चालित ‘लक्ष्मी उन्नति कोष’ ले २० प्रतिशत नगद लाभांश घोषणा गर्दै सबैभन्दा उच्च प्रतिफल दिने फण्ड बन्न सफल भएको छ। हाल दोस्रो बजारमा यस फण्डको इकाइ मूल्य रु ११.५६ रहेको छ। यदि कुनै लगानीकर्ताले हाल १,००० इकाइ खरिद गरेमा उसले रु ११,५६० लगानी गर्नुपर्छ र त्यसको प्रतिफल स्वरूप रु २,३१२ नगद लाभांश प्राप्त हुन्छ, जुन करिब २० प्रतिशत भन्दा बढी वार्षिक प्रतिफल हो।

दोस्रो र तेस्रो स्थानमा सनराइज ब्लुचिप र शुभ लक्ष्मी कोष

लाभांश वितरणको दृष्टिकोणले सनराइज ब्लुचिप फण्ड ले १९ प्रतिशत र शुभ लक्ष्मी कोष ले १६ प्रतिशत नगद लाभांश घोषणा गरेका छन्। यस्तै सनराइज फस्ट म्युचुअल फण्ड (१४%), सनराइज फोकस्ड इक्विटी फण्ड (१३.५%), र लक्ष्मी भ्यालु फण्ड-II (१५%) ले पनि उच्च प्रतिफल दिएका छन्।

कम प्रतिफल तर सुरक्षित विकल्प

यद्यपि केही म्युचुअल फण्डहरूले तुलनात्मक रुपमा कम प्रतिफल दिएका छन्, जस्तै मुक्तिनाथ म्युचुअल फण्ड-१ (३.८%), एनएमबि सरल बचत फण्ड-E (४.२७%), गरिमा समृद्धि योजना (५.१%), र एनआईसी एशिया डायनामिक डेब्ट फण्ड (५.५५%)। यी फण्डहरू मुख्यतः कम जोखिम र निश्चित आम्दानीमा केन्द्रित छन्, जसले गर्दा स्थिरता खोज्ने लगानीकर्ताका लागि उपयुक्त हुन सक्छन्।

दोस्रो बजारमा अवसर : कम मूल्य, उच्च प्रतिफल

हाल दोस्रो बजारमा सूचीकृत ३८ वटा म्युचुअल फण्ड मध्ये धेरैको बजार मूल्य उनीहरूको NAV (Net Asset Value) भन्दा कम छ। यसले लगानीकर्तालाई अन्डरभ्यालुमा फण्ड खरिद गर्ने अवसर प्रदान गरिरहेको छ। धेरै लगानीकर्ताहरू अझै पनि क्यापिटल गेनतर्फ बढी आकर्षित छन्, जसका कारण केहीले नगद लाभांशबाट हात धोइरहेका छन्। तर अहिलेको बजार अवस्थामा, कम लागतमा उच्च प्रतिफल पाउने सुनौलो मौका अझै बाँकी रहेको विश्लेषकहरूको भनाइ छ।

किन म्युचुअल फण्डमै लगानी गर्ने?

बैंकमा राखिएको पैसा करिब ८-९ प्रतिशत ब्याज मात्र दिँदा म्युचुअल फण्डहरूले औसतमा ११ प्रतिशतभन्दा बढी नगद लाभांश दिइरहेका छन्। साथै, फण्डहरूको पारदर्शी व्यवस्थापन, सस्तो लागत, बजारको सुधारसँगै हुने क्यापिटल गेनको सम्भावना आदिका कारण म्युचुअल फण्डहरू लगानीकर्ताको आकर्षणको केन्द्रमा पर्न थालेका छन्।

वर्तमान समयमा बैंकको निक्षेप ब्याजदरभन्दा धेरै माथि प्रतिफल दिने म्युचुअल फण्डहरू बजारमा उपलब्ध छन्। कम जोखिम, सस्तो इकाइ मूल्य र उत्कृष्ट प्रतिफलको सम्भावना भएका फण्डहरूमा लगानी गर्दा सुरक्षित र लाभदायक हुनसक्छ।

हेर्नुहोस् कुन म्युचुअल फण्डले कति दिए प्रतिफल?