अधिक तरलता नियन्त्रण गर्न राष्ट्र बैंकद्वारा ९० अर्ब निक्षेप संकलन

काठमाडौं, असोज २१ । वित्तीय प्रणालीमा कायम रहेको अधिक तरलता नियन्त्रण गर्न नेपाल राष्ट्र बैंकले आज (मंगलबार) ९० अर्ब रुपैयाँ निक्षेप संकलन गर्ने भएको छ।

राष्ट्र बैंकका अनुसार यो निक्षेप संकलन "बोलकबोल प्रणाली" मार्फत गरिनेछ, जसको उद्देश्य बजारबाट अतिरिक्त तरलता सोस्ने रहेको छ।

राष्ट्र बैंकले निक्षेप संकलन उपकरणमार्फत संकलित रकमको सावाँ र ब्याज आगामी २०८२ कात्तिक २ गते भुक्तानी गरिने जानकारी दिएको छ। निक्षेप संकलनमा सहभागी हुन न्यूनतम १० करोड रुपैयाँदेखि सुरु गरी ५ करोडको गुणकमा कुल आह्वान रकमसम्म बोलकबोल गर्न सकिने व्यवस्था गरिएको छ।

बोलकबोलमा ‘क’, ‘ख’ र ‘ग’ वर्गका इजाजतप्राप्त बैंक तथा वित्तीय संस्थामात्र सहभागी हुन पाउनेछन्। राष्ट्र बैंकले सबैभन्दा कम ब्याजदर प्रस्ताव गर्ने संस्थालाई प्राथमिकता दिँदै क्रमशः रकम बाँडफाँट गर्नेछ।

हाल देशभर कुल निक्षेप रकम ७३ खर्ब रुपैयाँभन्दा बढी पुगेको छ। राष्ट्र बैंकले वित्तीय बजारमा स्थिरता कायम गर्न निक्षेप संकलन उपकरण र स्थायी निक्षेप सुविधामार्फत समय–समयमा तरलता व्यवस्थापन गर्दै आएको छ।

खुला बजार कारोबार सम्बन्धी कार्यविधिअनुसार, वित्तीय बजारमा दीर्घकालीन प्रकृतिको तरलता बढी भएमा राष्ट्र बैंकले अधिकतम ६ महिनासम्मका लागि दीर्घकालीन निक्षेप संकलन उपकरण प्रयोग गर्न सक्ने व्यवस्था छ। यही प्रावधानअनुसार राष्ट्र बैंकले पछिल्ला महिनाहरूमा पटक–पटक यस्तो निक्षेप संकलन प्रक्रिया सञ्चालन गर्दै आएको हो।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?