कुमारी बैंक र जीआइजेड नेपालबीच विद्युतीय सार्वजनिक यातायात प्रवर्द्धनका लागि सम्झौता

BFIS News
2025 Oct 10 12:23

कुमारी बैंक र जीआइजेड नेपालबीच विद्युतीय सार्वजनिक यातायात प्रवर्द्धनका लागि सम्झौता

काठमाडौं। नेपालमा विद्युतीय गतिशीलतालाई सुदृढ बनाउनका लागि कुमारी बैंक र जर्मन अन्तर्राष्ट्रिय सहयोग संस्था (जीआइजेड) नेपालबीच समझदारी पत्रमा हस्ताक्षर भएको छ। बैंकले ‘सस्टेनेबल इलेक्ट्रिक ट्रान्सपोर्ट फर नेपाल’ परियोजनाअन्तर्गत सम्झौता गरिएको जनाएको छ।

यो सहकार्यले सार्वजनिक यातायात संचालकहरूलाई किफायती वित्तीय पहुँच उपलब्ध गराउने उद्देश्य लिएको छ। विशेषगरी विद्युतीय माइक्रो तथा मिनीबसहरूको स्वीकृति र सञ्चालनलाई तीव्र बनाउन सहयोग पुग्ने विश्वास बैंकले व्यक्त गरेको छ।

कुमारी बैंकका अनुसार, सहकार्यअन्तर्गत सार्वजनिक यातायात व्यवसायीहरूका लागि विशेष वित्तीय योजना (लोन प्याकेज) र प्रारम्भिक डाउन पेमेन्ट अनुदान (सब्सिडी)को व्यवस्था गरिनेछ। यसले सवारी खरिदको लागत घटाई आर्थिक रूपमा पनि सहज बनाउने अपेक्षा गरिएको छ।

सस्टेनेबल इलेक्ट्रिक ट्रान्सपोर्ट फर नेपाल परियोजना जीआइजेड नेपाल र ग्लोबल ग्रिन ग्रोथ इन्स्टिच्युट (GGGI) द्वारा भौतिक पूर्वाधार तथा यातायात मन्त्रालयसहितका सरकारी तथा सम्बन्धित साझेदार संस्थाहरूसँगको सहकार्यमा कार्यान्वयन भइरहेको संयुक्त पहल हो। यो परियोजना मिटिगेसन एक्सन फेसिलिटी (MAF) को आर्थिक सहयोगमा सञ्चालन भइरहेको छ।

परियोजनाले करिब ३ हजार ५०० विद्युतीय मिनीबस सञ्चालनमा ल्याउने लक्ष्य राखेको छ। यसबाट नेपालको सार्वजनिक यातायात प्रणाली थप सफा, हरित र दिगो बन्ने अपेक्षा गरिएको छ।

आर्थिक सीमालाई ध्यानमा राख्दै, परियोजनाले परम्परागत इन्धनमा आधारित सवारी साधनहरूलाई विद्युतीय सवारी साधनमा रूपान्तरण गर्ने उद्देश्य लिएको छ। यस अन्तर्गत सार्वजनिक यातायातलाई अझ सजिलो, सुरक्षित र स्मार्ट बनाउन मोबाइल एप्लिकेसन, जीपीएस ट्र्याकिङ, एलईडी रुट डिस्प्ले र ओपन लुप ई-टिकेटिङ प्रणालीजस्ता डिजिटल प्रविधिहरू पनि प्रयोगमा ल्याइने बताइएको छ।