बन्दीपुरमा छैटौं बन्दीपुर महोत्सव सुरु, आठ लाख पर्यटक भित्र्याउने लक्ष्य

तनहुँ, मङ्सिर १० गते । ऐतिहासिक तथा सांस्कृतिक पहाडी बस्ती बन्दीपुरमा आजदेखि छैटौं बन्दीपुर महोत्सव सुरु भएको छ। तनहुँ उद्योग वाणिज्य सङ्घ बन्दीपुर बजार इकाईको आयोजनामा मङ्सिर १० देखि २१ गतेसम्म सञ्चालन हुने यो महोत्सवले भ्रमण वर्ष २०२५ अन्तर्गत आठ लाख पर्यटक आकर्षित गर्ने लक्ष्य राखिएको छ।

बन्दीपुर गाउँपालिकाका अध्यक्ष सुरेन्द्रबहादुर थापाका अनुसार, बजारमै केन्द्रित पर्यटकलाई गाउँ–गाउँसम्म पुर्‍याउँदै सम्पूर्ण क्षेत्रलाई पर्यटन–मैत्री बनाउने उद्देश्यले महोत्सव आयोजना गरिएको हो। छवटै वडामा पर्यटकको पहुँच बढाउन सडक स्तरोन्नति, सिंढीमार्ग निर्माण र “उज्यालो बन्दीपुर” कार्यक्रममार्फत वातावरण अनुकूल बनाइँदैछ।

महोत्सवमा ग्रामीण जीवनशैली, स्थानीय कला–संस्कृति, होमस्टे, कृषक उत्पादन, हस्तकला, र पशुपालन जस्ता विविध विषयवस्तु एकै ठाउँबाट प्रदर्शन गरिनेछन्। यसले स्थानीय रोजगारी, व्यवसाय प्रवर्धन र जीवनस्तर सुधारमा योगदान गर्ने अपेक्षा गरिएको छ।

काठमाडौं, पोखरा र सौराहाको त्रिकोणीय क्षेत्रमा बसेको बन्दीपुर पुराना परम्परागत घर–आवास, भक्तपुरे शैलीका संरचना, टुँडिखेल, रामकोट, रानीवन, सुनखरी, थानीमाई, महालक्ष्मी मन्दिर, साथै प्याराग्लाइडिङ र चट्टान आरोहणका कारण लोकप्रिय गन्तव्य बनेको छ।

हालै संचालनमा आएको केबलकारले पर्यटकको पहुँच अझ सहज बनाएको छ। समुदायको सक्रिय सहभागितामा अघि बढेको यस महोत्सवले बन्दीपुरलाई दीर्घकालीन रूपमा बलियो पर्यटकीय केन्द्रका रूपमा विकास गर्ने विश्वास लिइएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन