शेयर धितोकर्जाको सिमा १५/२० करोड पुग्यो, शेयर बजारमा कस्तो असर पर्ला ?

काठमाडौं । नेपाल राष्ट्र बैंकले मार्जिन प्रकृतिको शेयर धितो कर्जाको एकल ग्राहक कर्जा सीमा बढाएको छ । कुनै एक वा सबै इजाजतपत्रप्राप्त संस्थाहरुबाट शेयर धितोमा प्रवाह हुने मार्जिन प्रकृतिको कर्जाको अधिकतम एकल ग्राहक कर्जा सीमा कुल रु. १५ करोड कायम गरिएको छ । धितोपत्र बजारमा लगानी गर्ने मुख्य उद्देश्यले स्थापना भएका संस्थागत लगानीकर्ताहरुका लागि यस्तो कर्जाको अधिकतम सीमा रु २० करोड कायम गरिएको छ ।

यस्तो कर्जा प्रवाह गर्ने बैंक तथा वित्तीय संस्थाले कर्जा प्रवाह वा नवीकरण गर्दा उक्त सीमा ननाघेको यकिन गरेर मात्र कर्जा प्रवाह/नवीकरण गर्नु पर्नेछ । तोकिएको सीमा नाघी कर्जा प्रवाह वा नवीकरण गरेमा बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नु पर्नेछ ।

नेपाल राष्ट्र बैंकले दुई वर्ष अगाडी शेयरधितो कर्जामा ४/१२ करोडको सिमा लगाएको थियो । गत आर्थिक वर्षमा ४ करोडको सिमा हटाएर १२ करोडको सिमा यथावत राखेको थियो । तर लगानीकर्ताले यस्तो सिमा खारेज हुनु पर्छ भन्दै निरन्तर दवाव दिदै आएका छन् । तर यस अवधिमा नेपाल राष्ट्र बैंकलाई सत्तापक्षका नेता तथा कार्यकर्तादेखि लिएर सत्ता भन्दा विपक्षी दलकै नेताहरुले यस्तो सिमा हटाउन निर्देशन दिदै आएका थिए । 

शेयर बजार धेरै नै तल्लो विन्दुमा रहेको र बजार बढ्ने केहि आधार पर्खिरहेको अवस्थामा लगानीकर्ताले शेयरधितो कर्जाको सिमा हटाउन माग राख्दै आएका थिए । अर्थतन्त्र नै खराव अवस्थामा रहेकाले नेपाल राष्ट्र बैंकको यस्तो कदमले आइतबारको शेयर बजारमा खासै ठुलो प्रभाव नपर्ने बजार विश्लेषकहरु बताउछन् । 

विगतमा पनि १२ करोडको सिमा हट्ने समाचार आएको दिन बजारमा सुधार देखिएकाले आइतबारदेखि केहि दिन भने बढ्न सक्ने उनिहरुको आकलन छ । राष्ट्र बैंकको यस निर्देशनले केहि दिन बजार सुधार देखिए पनि दशै अगाडी लगानीकर्ताले खर्च जोहो गर्न खोजेमा पनि बजार तल झर्न सक्छ । विगत एक डेढ वर्षको अवधिमा नेप्से सूचक अधिकतम २२ सयदेखि १८ सयको विचमा घुमिरहेको छ । राष्ट्र बैंकको अहिलेको कदमले यो साइकललाई भने सपोर्ट गर्ने विश्लेषण गरिएको छ । 

शेयर बजारका सक्रिय लगानीकर्ता नवराज दाहालका अनुसार शेयर धितो कर्जाले बजार प्रभावित भएको नभई त्यसलाई बहाना बनाइएको हो । संस्थागत लगानीकर्तालाई भने यस्तो सीमा तोक्न नहुने उनको धारणा छ । ‘उसले आफ्नो रिपोर्ट हेरेर, आफ्नो कारोबार हेरेर लिन पाउनुपर्छ । व्यक्तिका लागि भने बहाना मात्र हो । यो प्रमाणित पनि भइरहेको छ, नत्र भने बजार घटिरहनुपर्ने हो । बजार यसबीचमा बढेको पनि छ,’ उनले भने । 

खरीदकर्ताले जहिले पनि केही समयपछि प्रतिफल पाउँला भनेर किन्ने उनी बताउँछन् । ‘यस्तो समयमा विक्री गर्ने भनेको बजारमा केही छैन, टिक्न सकिँदैन भन्ने ठानेर वा पैसा चाहिएर पेनिक भएर हो,’ नवराजको भनाइ छ । सकारात्मक समाचारले हुने भए पूर्वमन्त्री, अर्थमन्त्री, अहिलेको प्रधानमन्त्रीलगायत गभर्नरले शेयर धितो कर्जाको विषयमा केही हुन्छ भनेर बोलिरहेका बेला बजार बढ्नुपर्ने उनले बताए ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?