![$adHeader[0]['title']](https://bfisnews.com/images/bigyapan/1774272772_1769061114-ss-nimb.gif)
आज ६ प्रदेशमा चट्याङ्गसहित वर्षाको सम्भावना
- BFIS News
- 2026 May 21 08:50
.jpg)
काठमाडौँ । देशका विभिन्न क्षेत्रमा आज चट्याङ्गसहित वर्षाको सम्भावना रहेको मौसम पूर्वानुमान महाशाखाले जनाएको छ।
पश्चिमी वायु, स्थानीय वायु तथा पूर्वी भूभाग आसपास सक्रिय न्यून चापीय क्षेत्रको संयुक्त प्रभावका कारण मौसममा बदली र वर्षाको अवस्था बनेको हो।
महाशाखाका अनुसार हाल कोशी, मधेस, बागमती र गण्डकी प्रदेशमा सामान्य बदली रहेको छ भने अन्य पहाडी तथा हिमाली क्षेत्रमा आंशिक बदली देखिएको छ। तराईका अधिकांश भूभागमा मौसम सामान्यतया सफा रहेको जनाइएको छ। अहिले कोशी, बागमती र गण्डकी प्रदेशका केही स्थानमा चट्याङ्गसहित हल्कादेखि मध्यम वर्षा भइरहेको छ।
आज दिउँसो कोशी प्रदेशसहित बागमती र गण्डकी प्रदेशका पहाडी तथा हिमाली क्षेत्रमा सामान्य बदली रहने अनुमान गरिएको छ। मधेस प्रदेशका साथै बागमती र गण्डकी प्रदेशका तराई क्षेत्र तथा अन्य प्रदेशका पहाडी र हिमाली भूभागमा आंशिक बदली रहने महाशाखाले जनाएको छ।
कोशी, बागमती र गण्डकी प्रदेशका पहाडी तथा हिमाली क्षेत्रका केही स्थानमा चट्याङ्गसहित मध्यम वर्षाको सम्भावना रहेको छ। यस्तै मधेस, लुम्बिनी र कर्णाली प्रदेशका पहाडी तथा हिमाली भूभागका एक–दुई स्थानमा पनि वर्षा हुन सक्ने अनुमान गरिएको छ। उच्च हिमाली क्षेत्रमा हल्का हिमपातको सम्भावना समेत रहेको महाशाखाको भनाइ छ।
यसैबीच सुदूरपश्चिम र लुम्बिनी प्रदेशका तराई तथा पहाडी क्षेत्रमा तातो दिनको अवस्था कायम रहने सम्भावना रहेको छ।
आज राति पनि कोशी, बागमती र गण्डकी प्रदेशका पहाडी तथा हिमाली क्षेत्रमा सामान्य बदली रहनेछ भने मधेस प्रदेशसहित बागमती र गण्डकीका तराई क्षेत्रमा आंशिक बदली रहने पूर्वानुमान गरिएको छ। अन्य तराई भूभागमा मौसम मुख्यतया सफा रहने जनाइएको छ।
रातिको समयमा पनि कोशी, बागमती र गण्डकी प्रदेशका केही स्थान तथा मधेस प्रदेशका एक–दुई स्थानमा चट्याङ्गसहित मध्यम वर्षाको सम्भावना रहेको मौसम पूर्वानुमान महाशाखाले जनाएको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया