![$adHeader[0]['title']](https://bfisnews.com/images/bigyapan/1774272772_1769061114-ss-nimb.gif)
एशियन लाइफको अधिकांश वित्तीय सूचकमा सुधार, नाफा ४१ करोड ४२ लाख
- BFIS News
- 2026 Aug 15 20:58
काठमाडौं । एशियन लाइफ इन्स्योरेन्स कम्पनी लिमिटेडले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरणअनुसार कम्पनीले अधिकांश प्रमुख वित्तीय सूचकमा सुधार गर्दै व्यवसाय विस्तारलाई निरन्तरता दिएको छ।
समीक्षा अवधिमा कम्पनीको खुद नाफा अघिल्लो आर्थिक वर्षको तुलनामा १.१९ प्रतिशतले बढेर ४१ करोड ४२ लाख रुपैयाँ पुगेको छ। अघिल्लो आर्थिक वर्षमा कम्पनीले ४० करोड ९३ लाख ३७ हजार रुपैयाँ खुद नाफा आर्जन गरेको थियो।
कम्पनीको जीवन बीमाकोष पनि उल्लेख्य रूपमा विस्तार भएको छ। अघिल्लो आर्थिक वर्षको अन्त्यमा ४७ अर्ब ७ करोड ८ लाख रुपैयाँ रहेको जीवन बीमाकोष बढेर समीक्षा अवधिमा ५३ अर्ब १७ करोड ४८ लाख रुपैयाँ पुगेको छ।
त्यसैगरी, कम्पनीको खुद बीमाशुल्क आर्जनमा पनि बलियो वृद्धि देखिएको छ। समीक्षा अवधिमा खुद बीमाशुल्क आर्जन १३.४८ प्रतिशतले बढेर १० अर्ब ४४ करोड ३१ लाख रुपैयाँ पुगेको छ। अघिल्लो आर्थिक वर्षमा यस्तो बीमाशुल्क आर्जन ९ अर्ब २० करोड २९ लाख रुपैयाँ थियो।
बीमा व्यवसायको विस्तारसँगै कम्पनीको कुल आम्दानीसमेत बढेको छ। समीक्षा अवधिमा कुल आम्दानी ८.६३ प्रतिशतले वृद्धि भई १४ अर्ब २९ करोड ६८ लाख रुपैयाँ पुगेको छ। यस अवधिमा कम्पनीले ११ अर्ब ४९ करोड रुपैयाँ खुद दाबी भुक्तानी गरेको छ भने कुल खर्च १३ अर्ब ४१ करोड रुपैयाँ पुगेको छ।
कम्पनीको चुक्ता पूँजी ५ अर्ब २५ करोड रुपैयाँ रहेको छ। महाविपत्ति कोष १४.४१ प्रतिशतले बढेर ३२ करोड ८८ लाख रुपैयाँ पुगेको छ। तर, जगेडा कोष भने अघिल्लो आर्थिक वर्षको तुलनामा ३९ प्रतिशतले घटेर ५२ करोड ६७ लाख २५ हजार रुपैयाँमा सीमित भएको छ।
कम्पनीको प्रतिशेयर आम्दानी (ईपीएस) पनि सामान्य बढेको छ। अघिल्लो आर्थिक वर्षमा ७.८० रुपैयाँ रहेको ईपीएस बढेर समीक्षा अवधिमा ७.८९ रुपैयाँ पुगेको छ। कम्पनीको प्रतिशेयर नेटवर्थ १२०.१३ रुपैयाँ रहेको छ।
समग्रमा, एशियन लाइफले समीक्षा अवधिमा बीमाशुल्क आर्जन, जीवन बीमाकोष, कुल आम्दानी र नाफामा सुधार गरेको देखिन्छ। यद्यपि, जगेडा कोषमा आएको गिरावट कम्पनीको वित्तीय अवस्थाको मूल्याङ्कन गर्दा ध्यान दिनुपर्ने पक्षका रूपमा देखिएको छ।
नोटः जीवन बीमा कम्पनीको वास्तविक मुनाफा बीमाङ्कीय मूल्याङ्कनपछि मात्र निश्चित हुन्छ।
शेयर गर्नुहोस
प्रतिक्रिया दिनुहोस्
सम्बन्धित समाचार
.jpg)
प्रतिक्रिया