सानिमा जिआइसीका सीईओ उपाध्याय दोस्रो कार्यकालका लागि पुनर्नियुक्त

काठमाडौं । सानिमा जिआइसी इन्स्योरेन्स लिमिटेडले प्रमुख कार्यकारी अधिकृत (सीईओ) सुद्युम्न प्रसाद उपाध्यायलाई थप चार वर्षका लागि पुनर्नियुक्त गर्ने निर्णय गरेको छ।

कम्पनीको भदौ २४ गते बसेको सञ्चालक समितिको १९२औँ बैठकले उपाध्यायलाई दोस्रो कार्यकालका लागि सीईओमा निरन्तरता दिने निर्णय गरेको हो। उनको पहिलो कार्यकाल २०८३ कात्तिक ६ गते समाप्त हुँदैछ। त्यसपछि दोस्रो कार्यकाल २०८३ कात्तिक ७ गतेदेखि २०८७ कात्तिक ६ गतेसम्म कायम रहने कम्पनीले जनाएको छ।

उपाध्यायले साविक सानिमा जनरल इन्स्योरेन्स र जनरल इन्स्योरेन्स कम्पनी नेपालबीच मर्जरपछि बनेको सानिमा जिआइसी इन्स्योरेन्सको नेतृत्व गर्दै आएका छन्। दुई कम्पनीबीच एकीकृत कारोबार सुरु भएपछि सञ्चालक समितिले उनलाई २४ अक्टोबर २०२२ अर्थात् २०७९ कात्तिक ७ गतेदेखि लागू हुने गरी सीईओ नियुक्त गरेको थियो।

त्यसअघि उनी २०७७ जेठदेखि साविक सानिमा जनरल इन्स्योरेन्सको प्रमुख कार्यकारी अधिकृतका रूपमा कार्यरत थिए। यसअघि उनले एभरेस्ट इन्स्योरेन्स र प्रिमियर इन्स्योरेन्समा समेत नेतृत्व तहमा रहेर काम गरेका थिए।

उपाध्यायले नेपालको बीमा क्षेत्रमा दुई दशकभन्दा बढी समयदेखि काम गर्दै आएका छन्। बीमा क्षेत्रको उनको व्यावसायिक यात्रा एभरेस्ट इन्स्योरेन्सबाट सुरु भएको देखिन्छ। सन् २००५ मा एभरेस्ट इन्स्योरेन्समा असिस्टेन्ट जनरल म्यानेजरका रूपमा प्रवेश गरेका उनी त्यसपछि प्रिमियर इन्स्योरेन्समा पुगेका थिए। सन् २०११ मा उनी प्रिमियर इन्स्योरेन्सको सीईओ नियुक्त भएका थिए।

त्यसपछि सन् २०२० मा साविक सानिमा जनरल इन्स्योरेन्सको प्रमुख कार्यकारी अधिकृतको जिम्मेवारी सम्हालेका उपाध्याय मर्जरपछि सानिमा जिआइसी इन्स्योरेन्सको सीईओ बनेका हुन्। सानिमा समूहको प्रोफाइलमा पनि मर्जरपछि सानिमा जिआइसीको स्थापना र कम्पनीको आधार निर्माण तथा विकासमा उपाध्यायको महत्वपूर्ण भूमिका रहेको उल्लेख गरिएको छ।

बीमा र व्यवस्थापनमा शैक्षिक पृष्ठभूमि

उपाध्यायको शैक्षिक तथा व्यावसायिक योग्यता व्यवस्थापन, कानुन र बीमा क्षेत्रसँग सम्बन्धित छ। उनले त्रिभुवन विश्वविद्यालयबाट व्यवस्थापनमा स्नातकोत्तर तथा एलएलबी गरेका छन्।

त्यसैगरी उनले इन्स्योरेन्स इन्स्टिच्युट अफ इन्डियाबाट Fellowship of Insurance Institute of India (FIII) तथा बेलायतस्थित Chartered Insurance Institute (CII) बाट Advanced Diploma/Level 6 Diploma हासिल गरेका छन्।

उनले CII बाट Level 6 Diploma पूरा गरेका थिए। उक्त तहको योग्यता हासिल गर्न अध्ययन, प्रस्तुतीकरण, प्रतिवेदन तथा लिखित परीक्षालगायतका विभिन्न प्रक्रिया पूरा गर्नुपर्ने व्यवस्था रहेको छ।

बीमा क्षेत्रमा लामो अनुभव, व्यवस्थापनसम्बन्धी शैक्षिक पृष्ठभूमि र मर्जरपछि कम्पनीको नेतृत्व गरिरहेका उपाध्यायलाई सञ्चालक समितिले दोस्रो कार्यकालका लागि निरन्तरता दिने निर्णय गरेको हो।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना