प्रभु बैंकले लाभांश नदिने, मर्जर पछि नियामकीय व्यवस्था बापत प्रोभिजनिङ गर्दा शेयरधनीले पाउन सकेनन् लाभांश

काठमाडौं । प्रभु बैंकले यस वर्ष लाभांश नदिने घोषणा गरेको छ । मर्जर अगाडी दुबै बैंकले नियमित रुपमा शेयरधनीलाई लाभांश वितरण गर्दै आएका थिए तर मर्जर पछि भने बैंकले पहिलो पटक लाभांश नदिने अवस्था बनेको हो । 

साविक सेञ्चुरी कमर्सियल बैंकको वित्तीय अवस्थामा देखिएको समस्याले गर्दा लाभांश दिन नसक्ने अवस्था बनेको प्रभु समुहको दाबी छ । एनएफआरएस अनुसार वित्तीय विवरण तयार पार्दा बैंकले कतिपय कर्जामा प्रोभिजनिङ गर्नु पर्दा यस पटक लाभांश दिन नसक्ने अवस्था बनेको हो । 

साविक सेञ्चुरीले एक दशकदेखि नियमित रुपमा लाभांश दिदै आएको थियो । प्रभु बैंकले विगत विगत ५ वर्षदेखि लाभांश दिदै आएको थियो । मर्जर पछि बैंकको चुक्ता पूँजी र जगेडा कोषमा बृद्धिदेखिए पनि वितरण योग्य मुनाफा भने एकदमै कमजोर देखिएको छ । बैंकले सार्वजनिक गरेको गत आर्थिक वर्षको अपरिष्कृत लेखापरीक्षण प्रतिवेदन अनुसार वितरण योग्य मुनाफा १६ करोड १६ लाख रुपैयाँ मात्रै देखिन्छ । बैंकले २ अर्ब ८२ करोड रुपैयाँ मुनाफा आर्जन गरे पनि नियामकीय व्यवस्था अनुसार प्रोभिजनिङ गर्नु पर्दा यस वर्ष लाभांश दिन नसकेको हो । 

बैंकले यस वर्ष लाभांश दिन नसके पनि आगामी दिनमा बिग्रिएका कर्जा तथा सरकारले तिर्नु पर्ने कर बापतको दायित्व भुक्तानी गरे सँगै लाभांश दिन सक्ने बैंकको दाबी छ । 

बैंकले गत आर्थिक वर्षको लेखापरीक्षण स्वीकृतिका लागि पेश गर्ने निर्णय गरेको छ । राष्ट्र बैंकले वित्तीय विवरण स्वीकृत गरेपछि मात्रै वार्षिक साधारणसभा आह्वान गर्न पाउने छ । यस वर्षको साधारणसभाले लेखापरीक्षण तथा वित्तीय विवरण मात्रै स्वीकृत गर्नेछ । 

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?