बैंकहरुलाई कर्जा उठाउनै पर्ने दवाव, चालु आवमा मात्रै ३६ हजार ९३५ ऋणीको नाम कालोसूचीमा

काठमाडौं । बैंक तथा वित्तीय संस्थाहरु कर्जा उठाउनै पर्ने दवावमा परिरहदा चालु आर्थिक वर्षको हालसम्मको अवस्थामा ३६ हजार ९३५ जना ऋणीको नाम कालोसूचीमा दर्ता भइसकेको छ ।

चरम आर्थिक मन्दी र ऋण तिर्न सक्ने क्षमतामा ह्रास आउदा बैंक एवं वित्तीय संस्थाबाट ऋण लिएर नतिर्ने खराब ऋणीहरुको संख्यामा पछिल्लो समय अधिक बृद्धि भइरहेको छ । गत आर्थिक वर्ष २०७९/८० मा २५ हजार ४९ जना कालोसूचीमा परेका थिए । त्यस्तै यस भन्दा अघिल्लो आर्थिक वर्ष २०७८/७९ मा ११ हजार ४९८ जना ऋणीको नाम कालो सूचीमा दर्ता भएको थियो ।

कर्जा सूचना केन्द्रले लघुवित्त वित्तीय संस्थाहरुका ऋणीलाई पनि कालोसूचीमा दर्ता गर्न सुरु गरिसकेको छ । यस तर्फ हालसम्म ३७८९ जना ऋणीको नाम कालोसूचीमा दर्ता भएको छ । यहि गतिमा कालोसूचीमा संख्या बढ्दै जाने हो भने बैंकहरुको खराव कर्जाको प्रतिशत अझ बढ्न सक्ने बैंकरहरु बताउछन् ।  

बैंक तथा वित्तीय संस्थाहरुबाट लिएको कर्जा निर्धारित समय साथै अतिरिक्त समयमा समेत भुक्तानी नगरेपछि कालोसूचीमा राख्ने गरिन्छ । पछिल्लो समय ऋणीको कर्जा भुक्तानी गर्ने क्षमतामा ह्रास आउदै गइरहेको छ । चरम आर्थिक मन्दीका कारण निम्न आय वर्गका समुदायले ऋण तिर्न सकेका छैनन् ।

भुकम्प पछिको पुनःनिर्माणमा यस्तो वर्गले ठुलो मात्रामा कर्जा लिएका छन् । कोभिड १९ को महामारी अगाडीसम्म उनिहरुले सहजै व्याज र किस्ता भुक्तानी गरिरहेका थिए । कोभिड पछि उनिहरुको नियमित आम्दानीमा समस्या आउदा संख्यात्मक रुपमा यस्तो वर्गले कर्जा तिर्न सकिरहेको छैन । गाउँ गाउँमा अनुत्पादनमुलक कङक्रिड घर निर्माण भएका छन् । उनिहरुले आफ्नो स्रोत सक्काएर ऋण लिएका थिए । केहि नभएर घर घडेरी बिक्री गरेर भए पनि कर्जा सल्टाउला भन्ने योजनामा रहेका उनिहरुलाई घरजग्गामा आएको मन्दीले ठुलो असर पारेको छ ।

घरजग्गा बिक्री हुन नसके पछि अहिले घर जग्गा विच एक्सचेन्ज अफर चलिरहेको छ । केहि समय अगाडी काठमाडौंको भृकुटी मण्डपमा घर जग्गा एक्सचेन्ज मेला नै चलेको थियो । यसले पछि नेपालको घरजग्गाको कारोबार कुन तहमा झरेको छ भन्ने कुरा पुष्ठी हुन्छ । सहरी क्षेत्रमा आकासिएको घर घडेरीको मूल्यमा चलखेल गर्नेहरु अहिले सबैभन्दा ठुलो मारमा छन् । जसले नियमित आम्दानी नहुँदा नहुँदै सम्पत्तीको आडमा मात्रै कर्जा लिएका थिए उनिहरु अहिले सबैभन्दा ठुलो समस्यामा छन् ।

जसको परिवारबाट वैदेशिक रोजगार तथा युरोप अमेरिका अध्ययनमा गएका छैनन् त्यो परिवारलाई अहिले धेरै समस्या छ । यस्ता परिवारले बैंकबाट लिएको ऋणको व्याज र किस्ता पनि धान्न सकिरहेका छैनन् । गएका वर्षमा नेपाल राष्ट्र बैंकले रिफाइनान्स र कर्जा पुनर्ताजगीकरणको सुविधा दिएको थियो । यतिवेलासम्म ऋणीलाई खासै समस्या थिएन । तर अहिले त्यहि सुविधा ऋणीको ठुलो समस्या बनेको छ । कर्जा पूँजीकरण हुँदा लिएको ऋणीबाट तिर्नु पर्ने ऋणी धेरै माथि पुगिसकेको छ ।

बैंकहरुले आर्थिक वर्ष सकिनै लाग्दा ऋण नतिर्ने ऋणीको धितो लिलामका लागि दैनिक रुपमा आह्वान गर्दै आइरहेका छन् । अझ ऋण नतिरेर तिर्नका लागि आह्वान गरिएका नामावली निकै लामो भइसकेको छ । यसले समग्र अर्थतन्त्र तथा बैंकिङ प्रणालीलाई नै ठुलो समस्यामा परेको छ । यहि कारणले सरकारले कित्ताकाटदेखि लिएर घरजग्गामा गरेको कडाइलाई फुकुवा गरिसकेको छ । तै पनि घरजग्गाको कारोबारले लय समाउन सकेको छैन । यदि घरजग्गाको कारोबारले लय समाउने हो भने अहिलेका धेरै समस्या समाधान हुनेछ । जुन नेपाली अर्थतन्त्रको दीर्घकालिन समाधान भने होइन ।  

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?