नियतवश कर्जा नतिर्ने ऋणीको कर्जा पुनरसंरचना नगर्न राष्ट्र बैंकको निर्देशन, परिस्थितिवस नसक्नेलाई सुविधा दिन आग्रह

काठमाडौं । नेपाल राष्ट्र बैंकले नियतवश कर्जा नितिर्ने ऋणीको कर्जा पुनरतालिकीकरण  वा पुनरसंरचना नगर्न निर्देशन दिएको छ । राष्ट्र बैंकले लघुवित्त वित्तीय संस्थाहरुलाई नियतवश कर्जा नतिर्ने ऋणीको विवरण तयारी गरी त्यसबाहेकका परिस्थितिजन्य कारणले समस्यामा परेका ऋणीको कठिनाइलाई दृष्टिगत गरी आवश्यकताका आधारमा मात्रै यस्तो सुविधा दिन निर्देशन दिएको हो ।

सामान्यतया कर्जा पुनरतालिकीकरण वा पुनरसंरचना भन्नाले कर्जाको मौजुदा सर्तहरुमा परिवर्तन गर्नु हो । जसमा मुख्यतया व्याजदर, भुक्तानी अवधि वा भुक्तानी तालिकाको संशोधन गरिन्छ । यसको मुख्य उद्देश्य ऋणीको व्यवसाय र नगद प्रवाहको प्रकृतिबीच तालमेल मिलाई परिस्थितिजन्य कारणले समस्यामा परेका ऋणीलाई पुनरुत्थान हुने मौका प्रदान गरिएको राष्ट्र बैंकले प्रष्ट पारेको छ ।

राष्ट्र बैंकले औचित्यको आधारमा एक पटकको लागि आगामी २०८१ पुस मसान्तभित्र कर्जा पुनरतालिकीकरण वा पुनरसंरचना गर्न सकिने सुविधा प्रदान गरेको छ । यस्तो सुविधा अन्तर्गत कर्जा भुक्तानी अवधि बढीमा ३ वर्ष थप गर्न सकिनेछ ।  

असुल हुन बाँकी व्याजको कम्तिमा ५ प्रतिशत असुल भएको हुनुपर्नेछ । यसबापत ऋणीबाट कुनै पनि प्रकारको शुल्क/हर्जना लिन नपाइने व्यवस्था छ । ऋणलाई कालोसूचीबाट हटाउन कर्जा सूचना केन्द्रलाई सिफारिस गर्नु पर्ने नियामकीय व्यवस्था गरिएको छ । राष्ट्र बैंकले नियामकीय व्यवस्था राम्रो सँग बुझेर वित्तीय अनुशासनमा रही व्यवसाय गर्न अनुरोध गरेको छ ।

कोभिड १९ पछि आएको आर्थिक मन्दीका कारण धेरै ऋणीहरु अहिले पनि ठुलो समस्यामा छन् । व्यापार व्यवसायमा मन्दी आउदा धेरैले कर्जा तिर्न सकिरहेका छैनन् । वेला वेलामा आउने प्राकृतिक प्रकोपका कारणले पनि ऋणीको कर्जा भुक्तानी गर्न सक्ने क्षमतामा ह्रास आइरहेको छ । 

राष्ट्र बैंकले पनि परिस्थितिजन्य अवस्थालाई मध्यनजर गर्दै समय समयमा विभिन्न किसिमका राहातका प्याकेजहरु ल्याउने गरेको छ । पछिल्लो समय यस्तै विविध कारणले बैंकहरुको कर्जा नराम्रो सँग बिग्रीएको छ । यस वर्षबाट भने त्यस्ता कर्जामा सुधार आउने बैंकहरुले आकलन गरिरहेका छन् । तर कसैले कर्जा नतिर्दा भोलि मिनाहा हुन्छ भन्ने कुरा भनिदिएकै भरमा सक्दा सक्दै पनि कर्जा नतिर्ने ऋणीको संख्या पनि कम छैन । अझ धेरै यस्तो समस्या लघुवित्त क्षेत्रका ऋणीमा छ । 

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?