![$adHeader[0]['title']](https://bfisnews.com/images/bigyapan/1726498142_960x100.gif)
राष्ट्र बैंकले तिहारका लागि सुनका असर्फी तथा चाँदीका सिक्का बिक्री गर्दै
- BFIS News
- 2024 Oct Fri 06:57
काठमाडौं । नेपाल राष्ट्र बैंकले तिहार पर्वका लागि लक्षित गर्दै सुनको असर्फी र चाँदीको (मेडालियन) सिक्का बिक्री गर्ने भएको छ । राष्ट्र बैंक मुद्रा व्यवस्थापन विभाग अन्तर्गतको टक्सार महाशाखाले कात्तिक १३ गते १ दिन सुनको असर्फी तथा ११ कात्तिकदेखि १४ कात्तिकसम्म चाँदीको स्मारिका तथा मेडालियन बिक्री गर्ने जनाएको छ ।
राष्ट्र बैंकले २.५ ग्रामको सुनको असर्फी प्रतिव्यक्ती एक थानका दरले कात्तिक १३ गते बिहान ११ बजेदेखि मौज्दात कायम रहेमा बेलुका ४ बजेसम्म बिक्री गर्ने जनाएको छ । सुनको असर्फीको बिक्री १ दिन मात्र खुला गरिएको छ ।
यस्तै चाँदीको स्मारिका तथा मेडालियन सिक्का कात्तिक ११ देखि १४ गतेसम्म बिक्री गर्ने जनाएको छ । २५ ग्रामको गाई अंकित सिक्का, लक्ष्मी, गणेश, र गजलक्ष्मी अंकित १० ग्रामको सिक्का बिक्री गर्ने जनाएको छ ।
असर्फी, चाँदीका स्मारिका र मेडालियन खरिदका लागि अनिवार्य रुपमा सक्कल नागरिकता वा सो खुल्ने प्रमाण र सोको प्रतिलिपि सहित उपस्थित हुनु पर्ने राष्ट्र बैंकले जनाएको छ ।
असर्फी तथा मेडालियन खरीदको लागि नगद तथा क्यूआर मार्फत भुक्तानी गर्न सकिनेछ । सुनको असर्फीको दररेट दैनिक रुपमा निर्धारण हुने भएकोले सोही दिन ११ बजे पश्चात् मात्र बिक्री कार्य सुरु हुने जनाइएको छ ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया