सिटिजन्स बैंकले अविमोच्य असञ्चिति अग्राधिकार शेयर जारी गर्ने, साधारणसभाबाट प्रबन्ध-पत्र संशोधन

काठमाडौं । सिटिजन्स बैंकले पनि अविमोच्य असञ्चिति अग्राधिकार शेयर जारी गर्ने भएको छ । यसका लागि आज सम्पन्न १८ औं वार्षिक साधारणसभाबाट प्रवन्ध-पत्र र नियमावली नै संशोधन गरिएको छ ।

बैंकले अविमोच्य असञ्चिति अग्राधिकार शेयर संस्थागत लगानीकर्ताले मात्रै धारण गर्ने व्यवस्था गरेको छ । जसमा नेपाल वित्तीय प्रतिवेदन मापदण्ड अन्तर्गत परिभाषित बैंकका सम्बन्धित पक्ष तथा बैंकको नियन्त्रण रहने व्यक्ति, फर्म, कम्पनी वा संस्थाले अविमोच्य असञ्चिति अग्राधिकार शेयर खरिद गर्न पाउने छैन ।

बैंकको नियमावलीलाई पनि संशोधन गर्दै अविमोच्य असञ्चिति अग्राधिकार शेयरधनीलाई मत दिने अधिकार नहुने व्यवस्था गरिएको छ । बैंकले विभिन्न वर्गका शेयर जारी गर्ने सवालमा बैंकको शेयर साधारण शेयर र अविमोच्य असञ्चिति अग्राधिकार शेयर गरेर दुई वर्गमा बिभाजित गरेको छ ।

यस सँगै अव बैंकले प्रचलित कानुनको अधिनमा रही नेपाल राष्ट्र बैंकको स्वीकृति लिई साधारणसभामा प्रस्ताव पारित गरी बैंकको पूँजीको आवश्यकता अनुसार अविमोच्य असञ्चिति अग्राधिकार शेयर जारी गर्न सक्ने भएको छ ।

अविमोच्य असञ्चिति अग्राधिकार शेयरमा प्रदान गर्ने लाभांश दर उक्त शेयरजारी गर्दा तोकिए बमोजिम हुने बैंकले जनाएको छ । लाभांश वितरण गर्ने वा नगर्ने सम्बन्धी निर्ण गर्ने सम्पूर्ण अधिकार बैंकमा निहित हुने भनि नियमावलीमा व्यवस्था गरिएको छ ।

अविमोच्य असञ्चिति अग्राधिकार शेयरको लाभांश वितरण नाफा नोक्सान बाँडफाँड हिसाब मार्फत चालु आर्थिक वर्षको मुनाफाबाट मात्र गरिने बैंकले जनाएको छ । यदि कुनै आर्थिक वर्षमा लाभांश वितरण नभएमा उक्त लाभांश आगामी आर्थिक वर्षमा जोडिदै नजाने कानुनी व्यवस्था गर्दै नियमावली नै संशोधन गरेको हो ।

पछिल्लो समय नविल बैंकले यस्तो अभ्यास सुरु गरिसकेको छ । यसका साथै एभरेष्ट बैंक र कृषि विकास बैंकले पनि आ-आफ्नै किसिमको अग्राधिकार शेयर जारी गरिसकेका छन् । नेपालको सन्दर्भमा यस विषयमा अझै प्रष्टता भने छैन । बैंकहरुले चासो व्यक्त गर्न थाले सँगै राष्ट्र बैंकले पनि यसको विषयमा छुट्टै कानुनी व्यवस्था गर्ने तयारी गरिरहेको छ । राष्ट्र बैंकले यस विषयमा आवश्यक अध्ययन तथा छलफल गरिरहेको छ ।

बैंकको आज सम्पन्न १८ औं वार्षिक साधारणसभाले आर्थिक वर्ष २०८१/८२ को मुनाफाबाट ४ प्रतिशत बोनस शेयर अर्थात ५६ करोड ८० लाख रुपैयाँ र कर प्रयोजनका लागि ०.२१ प्रतिशत अर्थात २ करोड ९८ लाख रुपैयाँ नगद लाभांश पारित गर्ने प्रस्ताव पारित गरेको हो । 

साधारणसभाले आर्थिक वर्ष २०८०/८१ को सञ्चालक समितिको वार्षिक प्रतिवेदनमाथि छलफल गरि पारित गरेको हो । बैंकको लेखापरीक्षण प्रतिवेदन तथा सञ्चालक समितिको प्रतिवेदन उपर आ-आफ्नो राय व्यक्त गरेका थिए । 

कम्पनी ऐन २०६३ को दफा १११ अनुसार आर्थिक वर्ष २०८१/८२ को लेखापरीक्षण गर्न लेखापरीक्षण समितिको सिफारिसमा लेखापरीक्षकको नियुक्ति गर्ने र नजिको परिश्रमिक निर्धारण गर्ने प्रस्ताव सर्वसम्मत रुपमा पारित भएको छ । सभाले बैंकको मिति २०८१ बैशाख २६ गतेको सञ्चालक समितिको ४५० औं बैठकद्धारा सोही मितिबाट लागु हुने गरी बैंकको सर्वसाधारण शेयरधनीको तर्फबाट सञ्चालकमा इला शर्मालाई र गएको असार २४ गते सञ्चालक समितिको ४५६ औं बैठकद्धारा सोहि मितिबाट लागु हुने गरी बैंकको संस्थापक शेयरधनीको तर्फबाट सञ्चालकमा अनिल कुमार ज्ञवालीलाई नियुक्त गरिएको निर्णयलाई समेत अनुमोदन गरेको छ । 

सभाले बैंकको सञ्चालक समितिलाई मर्जरको आवश्यक प्रकृयाँ अगाडी बढाउने अख्तियारी समेत प्रदान गरेको छ । प्रवन्धपत्र र नियमावलीका व्यवस्थाहरु संशोधन गर्नुका साथै पारित भएको छ । 

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?