बैंकिङ प्रणालीबाट राष्ट्र बैंकले २१ दिनका लागि ७० अर्ब तान्दै, सिजनमै कर्जाको माग नहुँदा प्रणालीमा अधिक तरलता

काठमाडौं । कर्जा जाने सिजनमै बैंकिङ प्रणालीमा अधिक तरलता देखिए पछि राष्ट्र बैंकले प्रणालीबाट निरन्तर पैसा तान्नु परिरहेको छ । राष्ट्र बैंकले आज पनि २१ दिनका लागि ७० अर्ब रुपैयाँको बोलकबोल गर्न लागेको हो । 

आज आइतबार पुस १४ गते उक्त निक्षेप संकलन उपकरणको बोलकबोल हुने केन्द्रीय बैंकले जनाएको छ । बैंकहरुले लगानी गर्न नसकेको ३ खर्ब २७ अर्ब २५ करोड रुपैयाँ यसअघि नै राष्ट्र बैंकमा रहेको छ । 

राष्ट्र बैंकले बैंक तथा वित्तीय संस्थाहरुको अधिक तरलता खिच्न निक्षेप संकलनमार्फत् २१ दिनका लागि ७० अर्ब रुपैयाँ तान्न लागेको हो । इच्छुक बैंक तथा वित्तीय संस्थाले आज  दिउँसो २ बजेसम्म बोलकबोलमार्फत आवेदन दिन सक्नेछन् । साँवा र ब्याज भुक्तानी मिति माघ ६ गते निर्धारण भएको छ । यसको ब्याजदर भने बोलकबोल बाटै निर्धारण हुनेछ । बैंक तथा वित्तीय सस्थाहरुले न्यूनतम १० करोड र अधिकतम ५ करोडले निःशेष भाग जानेगरी निष्कासित रकम बराबरको माग गर्न सक्नेछन् ।

लामो समयदेखि बैंकिङ प्रणालीमा अधिक तरलताको अवस्था छ । अपेक्षा अनुसार कर्जा प्रवाह हुन सकेको छैन । ब्याजदर निरन्तर घटे पनि कर्जा प्रवाह सुस्त छ । यसैकारण तरलता व्यवस्थापन गर्न केन्द्रीय बैंकले पटकपटक प्रणालीबाट पैसा तान्दै आएको छ । अधिक तरलताको अवस्था झनै बढ्दै गएपछि राष्ट्र बैंकले नियमित रुपमा स्थायी निक्षेप सुविधा एसडीएफ तथा निक्षेप संकलन उपकरणमार्फत तरलता व्यवस्थापन गर्दै आएको छ । 

अन्तर बैंक दर ब्याजदर करिडोरको तल्लो सीमाभन्दा तल जान नदिने गरी तरलता व्यवस्था गर्ने काम केन्द्रीय बैंकले गर्छ । केन्द्रीय बैंकले तरलता खिच्ने र अन्तर बैंक ब्याजदर घट्न वित्तीय प्रणालीको पैसा खिच्ने गरेको छ । बैंक तथा वित्तीय संस्थाले अधिक तरलता भएको खण्डमा ३ प्रतिशत ब्याजदरमा सीधै केन्द्रीय बैंकमा निक्षेप राख्न सक्छन । 

बैंकहरुले स्थायी निक्षेप सुविधा (एसडीएफ) मार्फत १ खर्ब ३५ करोड र निक्षेप संकलन उपकरणमार्फत यस अघि संकलन भएकोे २ खर्ब २६ अर्ब ९० करोड रकम परिपक्क हुन बाँकी छ । निक्षेप संकलन उपकरणमा तथा एसडीएफको गरेर कुल ३ खर्ब २७ अर्ब २५ करोड बैंकहरुको रकम राष्ट्र बैंकमा थुप्रिएको छ ।

राष्ट्र बैंकका अनुसार अहिले बैंक तथा वित्तीय संस्थाहरुमा कुल ६६ खर्ब ५४ अर्ब रुपैयाँ निक्षेप रहेको छ । यसअवधिमा बैंकहरुले ५३ खर्ब ४१ अर्ब कर्जा लगानी गरेका छन । बैंकहरुले निक्षेपको ९० प्रतिशतसम्म कर्जा लगानी गर्न पाउने व्यवस्था रहेको छ । हाल बैंकहरुको कर्जा निक्षेप अनुपात (सीडी रेसियो) ७८.९७ प्रतिशत छ । यसलाई हेर्दा बैंकहरुसँग लगभग ६ खर्ब ४७ अर्ब रुपैयाँ लगानीयोग्य रकम देखिन्छ । 

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?