![$adHeader[0]['title']](https://bfisnews.com/images/bigyapan/1726498142_960x100.gif)
१ वर्षमा सेयर धितो कर्जा करिब २९ अर्बले बढ्यो, कुन बैंकको व्याजदर कति ?
- BFIS News
- 2025 Feb Tue 05:27
काठमाडौं । पछिल्लो एक वर्षको अवधिमा बैंक तथा वित्तीय संस्थाहरुले प्रवाह गरेको सेयर धितो कर्जा करिब २९ अर्ब रुपैयाँले बढेको छ। चालु आर्थिक वर्षको पुस मसान्तसम्म सेयर धितो कर्जा १ खर्ब १३ अर्ब रुपैयाँ पुगेको छ, जुन अघिल्लो वर्षको सोही अवधिमा ८४ अर्ब २९ करोड रुपैयाँ थियो। यस अनुसार, सेयर धितो कर्जा २९ अर्ब ४८ करोड रुपैयाँ अर्थात् ३४.९८ प्रतिशतले वृद्धि भएको छ।
वाणिज्य बैंकहरुमा उल्लेखनीय वृद्धि
वाणिज्य बैंकहरुले सबैभन्दा ठूलो हिस्सा ओगट्दै २५ अर्ब ६८ करोड रुपैयाँ सेयर धितो कर्जा प्रवाह गरेका छन्। चालु आर्थिक वर्षको पुस मसान्तसम्म वाणिज्य बैंकहरुले ९१ अर्ब ५४ करोड रुपैयाँ कर्जा प्रवाह गरेका छन्, जुन अघिल्लो वर्षको तुलनामा ३८.९९ प्रतिशतले वृद्धि हो। नबिल बैंकले १२ अर्ब ६० करोड रुपैयाँ सेयर धितो कर्जा प्रवाह गरी अग्रणी स्थान ओगटेको छ भने ग्लोबल आइएमई बैंकले ११ अर्ब ५५ करोड रुपैयाँ कर्जा प्रवाह गरेको छ।
विकास बैंकहरुको कर्जा २३.११ प्रतिशतले बढ्यो
विकास बैंकहरुले एक वर्षको अवधिमा २३.११ प्रतिशतले कर्जा प्रवाह बढाएका छन्। अहिले विकास बैंकहरुको सेयर धितो कर्जा १८ अर्ब १८ करोड रुपैयाँ पुगेको छ। मुक्तिनाथ विकास बैंकले ३ अर्ब ६४ करोड रुपैयाँ सेयर धितो कर्जा प्रवाह गर्दै अग्रणी स्थानमा छ भने गरिमा विकास बैंकले २ अर्ब ६८ करोड रुपैयाँ कर्जा प्रवाह गरेको छ।
फाइनान्सहरुको पनि सुधार
फाइनान्स कम्पनीहरुले एक वर्षको अवधिमा ३९ करोड २२ लाख रुपैयाँ सेयर धितो कर्जा प्रवाह गरेका छन्। पुस मसान्तसम्ममा फाइनान्स कम्पनीहरुको कुल सेयर धितो कर्जा ४ अर्ब ४ करोड रुपैयाँ पुगेको छ, जुन अघिल्लो वर्षको तुलनामा १०.७२ प्रतिशतले बढी हो। यसमध्ये मञ्जुश्री फाइनान्सले सबैभन्दा धेरै कर्जा प्रवाह गर्दै ६३ करोड ८३ लाख रुपैयाँको कर्जा प्रदान गरेको छ।
कर्जामा वृद्धि हुनुका कारण
बैंकिङ प्रणालीमा अधिक तरलता, घट्दो ब्याजदर, तथा केन्द्रीय बैंकको लचिलो नीतिले कर्जा प्रवाहमा वृद्धि गर्न योगदान पुर्याएको छ। राष्ट्र बैंकले चालु मौद्रिक नीतिमा संस्थागत लगानीकर्ताको लागि २० करोडको सीमा हटाउनु र जोखिम भार घटाउनु जस्ता नीतिगत सुधारहरुले लगानीकर्तालाई आकर्षित गरेको छ।
यससँगै, अन्य क्षेत्रमा कर्जा प्रवाह कमजोर हुँदा बैंकहरुले सेयर धितो कर्जामा प्राथमिकता दिएको देखिन्छ। केन्द्रीय बैंकको नीतिगत सुधार र बजारको अवस्थाले गर्दा आगामी दिनमा पनि सेयर धितो कर्जामा वृद्धि हुने अपेक्षा गरिएको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
.jpg)
प्रतिक्रिया