एआई युगमा डिजिटल नेतृत्व सम्बन्धी अन्तरक्रिया कार्यक्रम, प्रविधि मार्फत व्यक्तिगत रुपमा वित्तीय सेवा प्रदान गर्न सुझाव

काठमाडौं । नेपाल बैंकर्स एसोसिएसन (NBA) ले "एआई युगमा डिजिटल नेतृत्व" विषयमा सफल अन्तरक्रिया कार्यक्रम आयोजना गरेको छ । कार्यक्रममा बैंकिङ क्षेत्रमा कार्यरत विज्ञहरू र पेशेवरहरूको सहभागिता रहेको थियो।

कार्यक्रमको उद्देश्य एआई प्रविधिबाट प्रवर्द्धित नयाँ प्रविधिहरू तथा बैंकिङ सञ्चालनलाई प्रभावकारी बनाउनका लागि आवश्यक रणनीतिहरूमा छलफल गर्नु थियो।

NBA का कार्यकारी निर्देशक अनिल शर्माले स्वागत मन्तव्य राख्दै बैंकिङ क्षेत्रमा एआई प्रविधि रूपान्तरणको महत्त्वलाई जोड दिए। उनले हालसालैका प्रविधिगत परिवर्तनहरूलाई आत्मसात् गर्दै एआई प्रविधिबाट सञ्चालित समाधानहरूलाई बैंकिङ प्रक्रियामा समावेश गर्नुपर्ने कुरामा प्रकाश पारे। साथै, उनले सहभागीहरूलाई गहन छलफल गर्न र कार्यक्रमको अधिकतम लाभ उठाउन आग्रह गरे।

काठमाडौँ फिन्टेकका संस्थापक सञ्जीव सुव्बाले आफ्नो मन्तव्यमा एआई प्रविधिले बैंकिङ क्षेत्रलाई तीव्र रूपमा रूपान्तरण गरिरहेको उल्लेख गरे। उनले विद्यमान बैंकहरूले भविष्यको बैंकिङ परिदृश्यलाई समयमै पहिचान गर्दै सोहीअनुसार रणनीतिक योजना निर्माण गर्न आवश्यक रहेको बताए।

कार्यक्रममा वित्तीय सेवा तथा डिजिटल रूपान्तरणका विश्वव्यापी विज्ञ श्री इम्यानुएल ड्यानियलले प्रस्तुति दिएका थिए। एसियन बैंक (TAB Global) का संस्थापक समेत रहेका ड्यानियलले एआई प्रविधिले नेतृत्व, निर्णय-प्रक्रिया, तथा वित्तीय क्षेत्रलाई कसरी पुनःपरिभाषित गरिरहेको छ भन्ने विषयमा आफ्ना दृष्टिकोणहरू प्रस्तुत गरेका थिए ।

ड्यानियलले नेपालमा बैंकिङ क्षेत्रको भविष्यबारे चर्चा गर्दै, मेसिन लर्निङ, प्रविधिगत अभियांत्रिकी, केन्द्रीय बैंक डिजिटल मुद्रा (CBDC), क्रिप्टोकरेन्सी तथा डिजिटल बैंकिङ जस्ता प्रविधिहरूको विकासमा जोड दिए। साथै, उनले एआई प्रविधि अपनाउने क्रममा नेपालका बैंकहरूले सामना गर्ने अवसर र चुनौतीहरूबारे पनि प्रकाश पारे।

उनले बैंकिङ क्षेत्रको बदलिँदो प्रवृत्तिबारे चर्चा गर्दै भने, "पहिले ग्राहकहरू बैंकमा सेवा लिन जान्थे, तर अब बैंकिङ सेवा नै ग्राहकहरूसम्म डिजिटल माध्यमबाट पुग्ने प्रवृत्ति विकसित भइसकेको छ।" यस प्रवृत्तिले बैंकिङ उद्योगमा नयाँ चुनौतीहरू सिर्जना गरेको छ, जसका लागि नवाचार र प्रविधिगत अनुकूलन आवश्यक रहेको उनले बताए।

ड्यानियलले क्षेत्रीय तथा विश्वव्यापी बैंकिङ प्रवृत्तिबारे चर्चा गर्दै बैंकका कर्मचारीहरूलाई प्रविधिमा दक्ष बनाउनु अपरिहार्य रहेको बताए। "नेपालको बैंकिङ क्षेत्रले डिजिटल बैंकिङ तथा प्रविधिगत सुधारमा उल्लेखनीय प्रगति गरिसकेको छ, जसमा साना बैंकहरू समेत प्रविधिगत नवीनता अवलम्बन गरिरहेका छन्," उनले भने।

उनले बैंकहरूको सबैभन्दा मूल्यवान सम्पत्ति ग्राहक सम्बन्धित डेटा भएको उल्लेख गर्दै एआई तथा डेटा एनालिटिक्सको सही उपयोग गरी व्यक्तिगत वित्तीय सेवा प्रदान गर्ने र निर्णय-प्रक्रिया सुधार गर्ने उपायहरूबारे सुझाव दिए। साथै, बैंकिङ क्षेत्रले आर्थिक वृद्धि प्रवर्द्धन गर्ने, वित्तीय समावेशीकरणलाई बल दिने र समुदायलाई सशक्त पार्ने कार्य गर्ने हुँदा यस क्षेत्रको भूमिकालाई अझ सशक्त बनाउन आवश्यक रहेको उनको भनाइ थियो।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?