एनपीएस-एनसीएस र नेपालपे कार्डको पूर्वाधार तयार, अब नेपालीकै आफ्नै डिजिटल भुक्तानी

काठमाडौं । नेपाल क्लियरिङ्ग हाउस लिमिटेड (एनसीएचएल) ले एक औपचारिक कार्यक्रमबीच गभर्नर महाप्रसाद अधिकारीको प्रमुख आतिथ्यमा NPS-National Card Switch (NPS-NCS) र Domestic Card Scheme (NEPALPAY Card) को पूर्वाधार स्थापना तथा प्राविधिक रूपमा तयारी पूरा भएको घोषणा गरेको छ।

कार्यक्रममा नेपाल राष्ट्र बैंकबाट एनसीएचएलले हालै प्राप्त गरेको अन्तिम स्वीकृति अनुसार NPS–NCS र NEPALPAY Card को तयारी पूरा भएको जानकारी गराइएको थियो। साथै, NEPALPAY Card को औपचारिक अनावरणसमेत गरिएको थियो। गभर्नर अधिकारीले ceremonial NEPALPAY Card प्रयोग गरी नियन्त्रित वातावरणमा पीओएस र एटीएम कारोबार गरेर NPS को पूर्वाधार तयारीबारे जानकारी गराएका थिए।

उक्त कार्यक्रममा नेपाल राष्ट्र बैंकका सञ्चालक समिति र राष्ट्रिय भुक्तानी बोर्डका सदस्यहरू, डेपुटी गभर्नर डा. नीलम ढुङ्गाना तिम्सिना, कार्यकारी निर्देशकहरू, बैंक तथा वित्तीय संस्थाका प्रमुख एवं पदाधिकारीहरू, भुक्तानी प्रणाली सञ्चालक तथा सेवा प्रदायकका प्रतिनिधिहरू, एनसीएचएल सञ्चालक समिति सदस्यहरू तथा वरिष्ठ पदाधिकारीहरूको उपस्थिति रहेको थियो।

राष्ट्रिय भुक्तानी प्रणालीको तयारी

NPS को पूर्वाधार अन्तर्गत National Card Switch, केन्द्रीकृत सेटलमेन्ट तथा विवाद व्यवस्थापन प्रणाली, AI/ML आधारित ठगी तथा जोखिम व्यवस्थापन प्रणाली, र Domestic Card Scheme को रूपमा NEPALPAY Card लागू हुनेछ। यससँगै, राष्ट्रिय भुक्तानी प्रणाली (NPS) कार्यान्वयनको प्रमुख तथा अन्तिम चरणको पूर्वाधार तयार भएको छ। आवश्यक प्रमाणिकरण र बैंक/वित्तीय संस्थाका स्विचहरूलाई एकीकृत गरेपछि प्रणाली पूर्ण रूपमा व्यवसायिक सञ्चालनमा आउनेछ। यसअघि, NPS अन्तर्गत रिटेल पेमेन्ट स्विच (RPS) र क्रस बोर्डर इन्टरफेस (NPIx) नोभेम्बर २०२१ देखि सञ्चालनमा छन्।

बैंक तथा वित्तीय संस्थासँगको सहकार्य

NPS–NCS तथा NEPALPAY Card को तयारी पूरा भएसँगै, बैंक तथा वित्तीय संस्थाहरू, भुक्तानी प्रणाली सञ्चालकहरू र भुक्तानी सेवा प्रदायकहरूले Principal Membership अन्तर्गत कार्ड जारी (Issuing) तथा कारोबार प्राप्त (Acquiring) गर्न सक्नेछन्। यसै क्रममा, एनसीएचएलले सिटिजन्स बैंक इन्टरनेशनल, गुडविल फाइनान्स, हिमालयन बैंक, माछापुच्छ्रे बैंक, मुक्तिनाथ विकास बैंक, एनएमबी बैंक, प्रभु बैंक, सांग्रिला विकास बैंक, सिद्धार्थ बैंक लगायतका बैंक तथा वित्तीय संस्थासँग Principal Membership को सम्झौता आदानप्रदान गरेको छ। साथै, ११ वटा बैंक तथा वित्तीय संस्थाहरूलाई मल्टिपल कार्ड स्किम प्रोसेसिङ्गका लागि एनसीएचएलको स्विच प्रयोग गरी NEPALPAY Card कारोबारको तयारी गरिएको छ।

NEPALPAY Card अन्तर्गत सदस्य बैंक तथा वित्तीय संस्थाहरू Principal वा Associate Member रूपमा आवद्ध हुन सक्नेछन् भने भुक्तानी प्रणाली सञ्चालकहरूले तेस्रो पक्ष भुक्तानी प्रोसेसर (TPP) को रूपमा कार्ड इकोसिस्टम निर्माण तथा विकास गर्न सक्नेछन्। आगामी दिनमा अन्य बैंक तथा वित्तीय संस्था तथा पीएसपी/पीएसओहरूलाई पनि NEPALPAY नेटवर्कमा समावेश गरिनेछ।

NEPALPAY Card को प्रविधि र प्रयोग

NPS–NCS ले घरेलु कार्ड कारोबारहरूको रुटिङ्ग र सेटलमेन्टका लागि केन्द्रिय कार्ड स्विचको प्रयोग गर्नेछ। NEPALPAY Card मा EMV चिप टेक्नोलोजी प्रयोग गरिएको छ, जसले अन्तर्राष्ट्रिय कारोबारका लागि अन्तर्राष्ट्रिय कार्ड नेटवर्कहरूसँग सहकार्य गर्न मद्दत गर्नेछ। पूर्ण कार्यान्वयन पश्चात, घरेलु कार्ड कारोबार लागत घटाउने, डाटा स्थानीयकरण सुनिश्चित गर्ने तथा डिजिटल इकोसिस्टममा नवीनतम उपकरणहरूको विकास तथा प्रवर्द्धन हुने अपेक्षा गरिएको छ। NEPALPAY Card प्रयोगकर्ताहरूले पीओएस वा एटीएममा कार्ड प्रयोग गर्न सक्नेछन् भने क्रमिक रूपमा ई–कमर्स कारोबारमा पनि प्रयोग गर्न सकिनेछ।

हाल, एनसीएचएलले ५४ भन्दा बढी बैंक तथा वित्तीय संस्थाहरू, पीएसओ, पीएसपी तथा १०० भन्दा बढी गैर-बैंकिङ्ग सदस्यहरूलाई विभिन्न राष्ट्रिय भुक्तानी प्रणालीहरू सञ्चालन गरी सेवा प्रदान गर्दै आएको छ। वार्षिक रूपमा, एनसीएचएलले रु १५५ खर्बभन्दा बढी कारोबार फर्छ्यौट गर्दै आएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?