नेशनल लाइफ इन्स्योरेन्सको ३७ औं वार्षिक साधारण सभा सम्पन्न, ५ प्रतिशत बोनस र १० प्रतिशत नगद लाभांश पारित

काठमाडौं, असार ५ गते। नेशनल लाइफ इन्स्योरेन्स कम्पनी लिमिटेडको ३७ औं वार्षिक साधारण सभा कम्पनीका अध्यक्ष प्रेमा सिंहको अध्यक्षतामा २०८२ साल असार ५ गते सफलतापूर्वक सम्पन्न भएको छ। सभामा अध्यक्षले आर्थिक वर्ष २०८०/८१ मा देशको समग्र अर्थतन्त्र चुनौतीपूर्ण अवस्थामा रहेको उल्लेख गर्दै विभिन्न कारणले अर्थतन्त्रमा परेको प्रभावबारे जानकारी दिइन्।

उनका अनुसार, कोभिड महामारीको दीर्घकालीन असर, भू–राजनीतिक द्वन्द्व, प्रतिकूल मौसमका कारण आपूर्ति श्रृंखलामा उत्पन्न अवरोध, खाद्यान्न तथा ऊर्जाको मूल्यवृद्धि, सहकारी संकट, घर–जग्गा कारोबारमा मन्दी, र वस्तु तथा सेवामा मागको ह्रासले अर्थतन्त्र सुस्त गतिमा रहेको छ। तथापि, बाह्य सूचकांकहरु सकारात्मक रहेका र केही समयपछि आन्तरिक आर्थिक अवस्थामा सुधार आउने अपेक्षा गरिएको उनले बताइन्।

बीमा व्यवसायमा उल्लेखनीय वृद्धि

समीक्षावर्ष २०८०/८१ मा कम्पनीको व्यवसाय सन्तोषजनक रहेको छ। सो वर्ष कम्पनीको कुल बीमाशुल्क २१.९० प्रतिशतले वृद्धि भई रु. २०४९.१२ करोड पुगेको छ। संचालनबाट जम्मा रु. १३६८.१८ करोड खूद थप रकम बीमा करार दायित्वमा सारिएको छ। कुल बीमा करार दायित्व २१.७० प्रतिशतले वृद्धि भई वर्षान्तसम्म रु. ७९६०.१८ करोड पुगेको छ।

यस वर्षमा कम्पनीले मृत्यु दाबी, अवधि समाप्ति, आंशिक अवधि समाप्ति, सर्मपण मूल्य लगायत विभिन्न शीर्षकमा कुल रु. ८३२.८२ करोड दाबी भुक्तानी गरेको छ। कम्पनीको कुल लगानी १७.३५ प्रतिशतले वृद्धि भई रु. ७०१५.४६ करोड पुगेको छ, भने औसत वार्षिक प्रतिफल दर ९.१७ प्रतिशत कायम भएको छ।

लगानीमा विविधता र पारदर्शिता

कम्पनीले नेपाल बीमा प्राधिकरणद्वारा निर्दिष्ट क्षेत्रभित्र रहेर पारदर्शी ढंगले अधिकतम दीर्घकालीन लगानी गर्ने नीति अवलम्बन गरेको छ। कम्पनीले आफ्नो स्वामित्वमा रहेका शाखाहरुमा व्यापारिक भवन निर्माणका लागि स्थिर सम्पत्तिमा थप लगानी गर्दै जाने योजना बनाएको छ। यसै क्रममा नेपालगञ्जस्थित भवन निर्माण कार्य सम्पन्न भई सञ्चालनमा आइसकेको छ भने ईटहरी शाखाका लागि नयाँ आधुनिक भवन निर्माण प्रक्रिया अगाडि बढाइएको छ।

सामाजिक उत्तरदायित्वमा प्रतिबद्धता

कम्पनीले आफ्नो सामाजिक उत्तरदायित्व अन्तर्गत नियामक निकायको निर्देशन अनुसार खूद नाफाको १ प्रतिशत बराबरको रकम सामाजिक उत्तरदायित्व कोषमा स्थानान्तरण गरेको छ। विशेष गरी स्वास्थ्य तथा शिक्षा क्षेत्रमा कम्पनीले निरन्तर सहयोग गर्दै आएको छ। यस वर्ष कम्पनीले बाल स्वास्थ्य उपचार सम्बन्धी परियोजनाका लागि रु. २५ लाख आर्थिक सहयोग प्रदान गरेको जानकारी दिइएको छ।

लाभांश वितरण र पूँजी वृद्धिको निर्णय

साधारण सभाले आ.व. २०८०/८१ को लागि हालको अद्यावधिक चुक्ता पूँजी रु. ५,२१,२१,३३,०८२ मा १० प्रतिशत नगद लाभांश (रु. ५२,१२,१३,३०८.२०) र ५ प्रतिशत बोनस शेयर (रु. २६,०६,०६,६५४.१०) वितरण गर्ने प्रस्ताव पारित गरेको छ। साथै, उक्त नगद तथा बोनस लाभांशमा लाग्ने कर प्रयोजनका लागि रु. ४,११,४८,४१८.७० नगद लाभांश समेत वितरण गरिनेछ।

नियामक निकायको जीवन बीमा कम्पनीको चुक्ता पूँजी न्यूनतम रु. ५ अर्ब पुर्‍याउनु पर्ने व्यवस्था अनुसार बोनस शेयरपश्चात कम्पनीको चुक्ता पूँजी रु. ५,४७,२७,३९,७३६ पुगेको छ।

नयाँ संचालकहरूको चयन

३३ औं साधारण सभाबाट निर्वाचित संचालकहरूको कार्यकाल समाप्त भएसँगै ३७ औं साधारण सभाबाट संस्थापक समूहबाट प्रेमा राज्य लक्ष्मी सिंह, रथी पवन बहादुर पाँडे (अ.प्रा), कुशल मल्ली तथा सर्वसाधारण समूहबाट कुलदीप शरण सिंह र भवानी राणा निर्विरोध निर्वाचित भएका छन्।

सभामा अध्यक्ष प्रेमा सिंहले नेशनल लाइफ इन्स्योरेन्स कम्पनीले भविष्यमा एक प्रमुख बीमकको रुपमा आम सर्वसाधारणको जीवन बीमाको आवश्यकताको परिपूर्ति गर्न अग्रणी भूमिका खेलिरहने विश्वास व्यक्त गरिन्। साथै, प्रविधिमैत्री संरचना विकास, कर्मचारी दक्षता अभिवृद्धि तथा दीर्घकालीन आर्थिक स्थायित्वमा कम्पनी केन्द्रित रहने प्रतिबद्धता पनि व्यक्त गरिन्।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना