स्विस रि विश्वकै ठूलो पुनर्बीमा कम्पनी बन्यो, म्युनिख रि पछि पर्छ

BFIS News
2025 Aug Tue 15:23

काठमाडौं। पुनर्बीमा क्षेत्रमा लामो समयदेखि अग्रणी मानिँदै आएको स्विस रि कम्पनीले म्युनिख रिलाई पछाडि पार्दै विश्वकै सबैभन्दा ठूलो पुनर्बीमा कम्पनी बन्न सफल भएको छ। आईएफआरएस–१७ अन्तर्गत रिपोर्ट गर्ने विश्वका पुनर्बीमा कम्पनीहरुको सूचीमा स्विस रि शीर्ष स्थानमा उक्लिएको हो।

एएम बेस्टको २०२४ को तथ्यांक अनुसार, स्विस रिको कुल आम्दानी ३६.२ अर्ब डलर पुगेको छ। म्युनिख रिको आम्दानी ३२.६ अर्ब डलर रहे पनि, यसले सूचीमा एक स्थान तल खसेको छ। त्यस्तै ह्यानोभर रि २७.५ अर्ब डलर आम्दानीसहित तेस्रो स्थानमा छ। त्यसपछि एससीओआर १६.८ अर्ब डलर र चाइना रि ५.९ अर्ब डलर आम्दानीसहित शीर्ष पाँचमा पर्छन्।

एएम बेस्टले विश्वका दुई फरक सूचीमा शीर्ष ५० पुनर्बीमा कम्पनीहरुको विवरण प्रकाशित गरेको छ। आईएफआरएस–१७ अन्तर्गत रिपोर्ट गर्ने कम्पनीहरुलाई कुल पुनर्बीमा आम्दानीको आधारमा १–१६ स्थानमा राखिएको छ भने गैरआईएफआरएस–१७ अन्तर्गत रिपोर्ट गर्ने कम्पनीहरुलाई कुल प्रिमियमका आधारमा १–३४ स्थानमा वर्गीकृत गरिएको छ।

गैरआईएफआरएस–१७ सूचीमा बर्कसायर ह्याथवे शीर्ष स्थानमा रहेको छ, जसको सन् २०२४ को जीडब्ल्यूपी २६.९ अर्ब डलर छ। यसैगरी स्पेसलिस्ट लोयड दोस्रो, रिइन्स्योरेन्स ग्रुप अफ अमेरिका तेस्रो र एभरेस्ट ग्रुप चौथो स्थानमा रहेका छन्।

जनवरीमा क्यालिफोर्नियामा लागेको डढेलोले पहिलो त्रैमासको नतिजामा ठूलो असर पारेको थियो। यसले पुनर्बीमा कम्पनीहरुको त्रैमासिक अन्डरराइटिङ अनुभवमा कमी ल्याएको र वर्षका लागि बजेट गरिएको विपत्ति भार घटाएको छ।

सन् २०२५ अगाडि बढ्दै जाँदा बजारमा गैरनोक्सान प्रभावित खातामा दरहरु केही नरम भएको देखिएको छ।