![$adHeader[0]['title']](https://bfisnews.com/images/bigyapan/1776181672_1100 x100.gif)
कर्णाली डेभलपमेन्ट बैंक सुधार प्रक्रिया जारी, ४७ करोड ९४ लाख निक्षेप फिर्ता भुक्तानी
- BFIS News
- 2026 Jun 07 11:40
काठमाडौँ । नेपाल राष्ट्र बैंकबाट गठित व्यवस्थापन समूहले Karnali Development Bank को सुधार तथा सुदृढीकरण प्रक्रिया निरन्तर अघि बढिरहेको जनाएको छ।
समूहले बैंक र व्यवस्थापनलाई लक्षित गरी पछिल्ला दिनमा भइरहेका अवाञ्छित गतिविधिप्रति गम्भीर ध्यानाकर्षण भएको उल्लेख गर्दै समस्या समाधानमा सबै सरोकारवालाको सकारात्मक सहयोग आवश्यक रहेको बताएको छ।
नेपाल राष्ट्र बैंक सञ्चालक समितिको २०८१ पुस १० गतेको निर्णयअनुसार कर्णाली डेभलपमेन्ट बैंकलाई समस्याग्रस्त संस्था घोषणा गर्दै व्यवस्थापन नियन्त्रणमा लिइएको थियो। त्यसयता व्यवस्थापन समूहले बैंकको सञ्चालन तथा व्यवस्थापनको जिम्मेवारी सम्हाल्दै आएको छ।
व्यवस्थापन सम्हालेपछि निक्षेप अपचलनमा संलग्न व्यक्तिहरूविरुद्ध कानुनी कारबाही प्रक्रिया अघि बढाइएको समूहले जनाएको छ। साथै बैंकबाट प्रवाहित कर्जाको असुलीमार्फत प्राप्त रकमका आधारमा हालसम्म ४७ करोड ९४ लाख रुपैयाँ बराबरको निक्षेप फिर्ता भुक्तानी गरिसकिएको जानकारी दिइएको छ।
कर्जा असुलीको कार्य निरन्तर जारी रहेको र सोही आधारमा निक्षेपकर्तालाई क्रमशः रकम फिर्ता गर्ने तथा संस्थाको सुदृढीकरण गर्ने प्रक्रिया अघि बढिरहेको विज्ञप्तिमा उल्लेख छ।
तर पछिल्ला केही दिनयता बैंक र व्यवस्थापन समूहलाई लक्षित गरी भइरहेका अवाञ्छित गतिविधिले सुधार प्रक्रियामा अवरोध सिर्जना गर्न सक्ने भन्दै व्यवस्थापन समूहले चिन्ता व्यक्त गरेको छ।
समूहले सम्पूर्ण निक्षेपकर्ताको हकहित संरक्षण तथा निक्षेप सुरक्षाका लागि आफूहरू प्रतिबद्ध रहेको भन्दै यस्ता गतिविधि नगर्न आग्रह गरेको छ। साथै बैंक सुधार अभियानलाई सफल बनाउन सबै सरोकारवालाको सहयोग आवश्यक रहेको पनि जनाएको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया