नेप्सेमा सीईओ नियुक्तिका लागि आवेदन खुला, साउन २६ भित्र दरखास्त दिन आग्रह

काठमाडौं । नेपाल स्टक एक्सचेन्ज लिमिटेड (नेप्से) ले प्रमुख कार्यकारी अधिकृत (सीईओ) पदका लागि आवेदन आह्वान गरेको छ। असार २२ गतेदेखि रिक्त रहेको उक्त पदका लागि अर्थ मन्त्रालयअन्तर्गत गठित छनोट तथा सिफारिस समितिले इच्छुक तथा योग्य नेपाली नागरिकबाट आवेदन मागेको हो।

अर्थ मन्त्रालयले सहसचिव महेश आचार्यको संयोजकत्वमा गठन गरेको छनोट तथा सिफारिस समितिले सूचना प्रकाशित भएको मितिले १५ दिनभित्र अर्थात् साउन २६ गते कार्यालय समयभित्र आवेदन पेश गर्न आग्रह गरेको छ।

सूचनाअनुसार अर्थशास्त्र, वाणिज्यशास्त्र, वित्तशास्त्र, व्यवस्थापन, सूचना प्रविधि, वाणिज्य वा कानून विषयमा मान्यता प्राप्त शिक्षण संस्थाबाट कम्तीमा स्नातकोत्तर, चार्टर्ड एकाउन्टेन्सी (सीए) वा सो सरहको उपाधि हासिल गरेका नेपाली नागरिकले आवेदन दिन सक्नेछन्। साथै, पुँजी बजार, वित्तीय क्षेत्र वा व्यवस्थापनसम्बन्धी क्षेत्रमा व्यवस्थापकीय तहमा कम्तीमा सात वर्षसहित कुल १५ वर्षको कार्य अनुभव अनिवार्य गरिएको छ।

मन्त्रालयका अनुसार व्यवस्थापकीय तह भन्नाले नेपाल सरकारको अधिकृतस्तरको कम्तीमा द्वितीय श्रेणी वा सो सरहको पद, वा कम्पनी तथा संगठित संस्थाको कार्यकारी प्रमुख अथवा सोभन्दा दुई तह मातहतसम्मको व्यवस्थापकीय नेतृत्वमा कार्यरत व्यक्तिलाई जनाउँछ।

आवेदक नेप्सेको प्रमुख कार्यकारी अधिकृतको छनोट तथा सिफारिस सम्बन्धी कार्यविधि, २०८३ बमोजिम अयोग्य नभएको हुनुपर्नेछ। साथै, अर्थ मन्त्रालय सम्बद्ध सार्वजनिक निकायका पदाधिकारी तथा सदस्यको नियुक्ति तथा मनोनयन सम्बन्धी मापदण्ड, २०७३ (संशोधनसहित) अनुसार कम्तीमा ३० वर्ष पूरा भई ६५ वर्ष ननाघेको हुनुपर्नेछ।

गैरनेपाली नागरिक, भ्रष्टाचार, सम्पत्ति शुद्धीकरण, मानव बेचबिखन, लागूऔषध कारोबार, पुरातात्त्विक वस्तु वा संरक्षित वन्यजन्तुसम्बन्धी कसुर तथा नैतिक पतन देखिने अन्य फौजदारी अपराधमा सजाय पाएका, कानुनबमोजिम कालोसूचीमा परेका र फुकुवा भएको तीन वर्ष पूरा नभएका, विदेशी मुलुकको स्थायी आवासीय अनुमति (पीआर) प्राप्त गरेका, सार्वजनिक निकायसँग ठेक्का वा पट्टा सम्झौता गरी कार्यरत तथा मानसिक सन्तुलन ठीक नभएका व्यक्ति आवेदनका लागि अयोग्य हुने मन्त्रालयले जनाएको छ।

आवेदनसँग स्वघोषणा फाराम, स्वयंले प्रमाणित गरेका शैक्षिक योग्यता तथा अनुभवका प्रमाणपत्र, दुई प्रति पासपोर्ट आकारका फोटो, व्यावसायिक कार्ययोजनाका तीन प्रति खामबन्दी गरी पेश गर्नुपर्नेछ। साथै, दरखास्त दस्तुरबापत ५ हजार रुपैयाँ जम्मा गरेको सक्कल भौचर पनि अनिवार्य रूपमा संलग्न गर्नुपर्नेछ।

मन्त्रालयका अनुसार प्रमुख कार्यकारी अधिकृतको मासिक पारिश्रमिक, भत्ता तथा अन्य सुविधा नेपाल सरकारले तोकेबमोजिम हुनेछ। प्राप्त आवेदन आवश्यक परे कुनै कारण उल्लेख गरी वा नगरी रद्द गर्न सकिने तथा झुटा विवरण वा कागजात पेश गर्ने आवेदकमाथि प्रचलित कानुनबमोजिम कारबाही गरिने चेतावनी पनि मन्त्रालयले दिएको छ।

प्रतिक्रिया दिनुहोस्

सम्बन्धित समाचार

सेयर किन्नुअघि कसरी गर्ने रिसर्च ? यी हुन् महत्वपूर्ण ५ चरणहरु

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?