शिवम सिमेन्ट ५ करोडले नोक्सानमा, बिक्री घट्यो खर्च बढ्यो

BFIS News
2023 Nov Fri 09:40

काठमाडौं । शिवम सिमेन्ट ५ करोड ३४ लाख रुपैयाँले नोक्सानमा देखिएको छ । कम्पनीले सार्वजनिक गरेको चालु आर्थिक वर्षको पहिलो त्रैमाशिक वित्तीय विवरण अनुसार खर्चमा भएको बृद्धिले नोक्सानीमा देखिएको हो ।

गत आर्थिक वर्षको सोही अवधिसम्ममा कम्पनीले २७ करोड ४७ लाख रुपैयाँ खुद नाफा कमाएको थियो। कम्पनीको बिक्री आम्दानी बढेपनि अन्य आम्दानी घटेको र खर्च बढेका कारण खुद नाफा ऋणात्मक हुन पुगेको हो।

समीक्षा अवधिमा कम्पनीको बिक्री आम्दानी ६.०६ प्रतिशत बढेको छ। गत आर्थिक वर्षको पहिलो ३ महिनामा १ अर्ब ५३ करोड ४५ लाख रुपैयाँ बिक्री आम्दानी गरेको यस कम्पनीले, चालु आर्थिक वर्षको सोही अवधिसम्ममा १ अर्ब ६२ करोड ७५ लाख रुपैयाँ यस्तो आम्दानी गरेको छ। समीक्षा अवधिमा कम्पनीको अन्य आम्दानी ९३.२२ प्रतिशत घटेको छ भने कुल आम्दानी १०.७७ प्रतिशत घटेको छ। त्यसैगरी, कम्पनीको कुल खर्च समीक्ष अवधिमा ७.९३ प्रतिशत बढेको छ। जसका कारण कम्पनीले नोक्सानी व्यहोर्नु परेको हो।

नाफासँगै कम्पनीको प्रतिशेयर आम्दानी पनि ऋणात्मक भएको छ। असोज मसान्तसम्ममा कम्पनीको प्रतिशेयर आम्दानी ४ रुपैयाँ ८६ पैसा ऋणात्मक रहेको छ भने प्रतिशेयर नेटवर्थ २०५ रुपैयाँ ५ पैसा रहेको छ।