अर्थतन्त्र विस्तारै सकारात्मक दिशामा गइरहेको छ : अर्थमन्त्री डा. महत

काठमाडौं । अर्थमन्त्री डा. प्रकाशशरण महतले हिजोका दिनमा जग्गा र सेयरमा धेरै ऋण प्रवाह हुँदा समस्या देखिएकाे अर्थतन्त्र अहिले विस्तारै सकारात्मक दिशामा गइरहेको बताए । मध्यपुर थिमि नगरपालिकाले शंखधर साख्वा दिवसकाे अवसरमा आयोजना गरेको कार्यक्रमलाई सम्बोधन गर्दै मन्त्री डा. महतले हिजोका दिनमा जग्गा र सेयरमा बढी ऋण प्रवाह भएकाले त्यसबाट प्रतिफल नआउँदा अर्थतन्त्रमा समस्या आएको उल्लेख गरे । 

‘हिजोको दिनमा धेरै ऋण प्रवाह गरियो, धेरै मानिसले जग्गा र सेयरमा लगानी गरे । यसैको प्रतिफल हो, हातमा नगद छैन, ऋण तिर्न धौधौ परेको छ’ मन्त्री डा. महतले भने, ‘जसले धेरै ऋण लिएका थिए, ऊ नै किन तिर्ने ऋण भन्दै हिडिरहेका छन् । दुरुपयोग गर्नेको कुरा छाडौं, तर कोही गर्दागर्दै पनि साँच्चिकै समस्यामा परेका छन् । जो काम गर्न खोज्दाखोज्दै विविध परिस्थितिले अप्ठ्यारोमा परे त्यसलाई राज्यले हेर्नेछ । ऋण लिने, दस ठाउँमा लगानी गर्ने र खाने तर तिर्दिन भन्न चाहिँ पाइँदैन ।’

‘हाम्रो अर्थतन्त्र विस्तारै सकारात्मक दिशामा गइरहेको छ । विप्रेषण आइरहेको छ, अहिले पर्यटक सबैभन्दा धेरै आइरहेका छन् । सरकारले सडक सञ्जाल विस्तार गरेको छ, यसले आर्थिक रुपान्तरणमा ठूलो सहयोग पुग्नेछ ।’

मन्त्री डा. महतले सन्त नेता कृष्णप्रसाद भट्टराईले आफ्नो प्रधानमन्त्रित्व कालमा नेपाल सम्बतलाई मध्यनजर राखेर शंखधर साख्वालाई राष्ट्रिय विभूति घोषणा गर्नुभएको बताए । कार्यक्रममा मन्त्री डा. महतले भने, ‘समाजलाई देश बुझाउँनुपर्छ, बुझाउने क्रमसँगसँगै पहिचान स्थापित हुन्छ ।’

देशमा ०४६ सालको परिवर्तनपछि बोल्ने, राजनीतिक दल रोज्ने, आफ्नो पेशा व्यवसाय रोज्ने र आफूले चुनेको जनप्रतिनिधिले शासन गर्ने स्वतन्त्रता सुनिश्चित भयो । त्यसभन्दा अगाडि नेपाली नागरिक रैतीजस्ता भएको मन्त्री डा. महतले बताए ।

जब हाम्रो समाज खुला, हामीले स्वतन्त्रपूर्वक हाम्रो अधिकार प्रयोग गर्न पायौं । देशैभर कसले कुन क्षेत्रमा कस्तो योगदान गरिरहेको छ, त्यसबारे जान्ने, एकअर्का समुदायबीच घुलमिल हुने, राष्ट्र निर्माणमा योगदान दिने व्यक्तित्वबारे कलासंस्कृतिमा योगदान दिने व्यक्तित्वबारे, संस्कृति र सभ्यताबारे जान्न सुरुवात भएको मन्त्री डा. महतले बताए । 

मन्त्री डा. महतले भने,‘वास्तवमा भन्नुपर्दा शंखधर साख्वाको योगदानबारे जान्ने अवसर ०४६ पछि नै भएको हो । पूर्वप्रधानमन्त्री भट्टराईले नै शंखधरलाई राष्ट्रिय विभूति घोषणा गरेर नेपाली समाजमा चिनाउन सुरु गर्नुभएको हो । त्यसपछि शंखधरबारे अझ छलफल, अध्ययन र अनुसन्धान अगाडि बढेको हो ।’

मध्यपुर थिमिमा खानाको परिकार पनि विशिष्ठ खालको भएको मन्त्री डा. महतले बताए । उनले भने, ‘मध्यपुर थिमिको समृद्धिसँगै यहाँको घरहरु, पाटी पौवालगायत विशिष्ठ कलाले सुसज्जित छन् । यो हामीले संसारलाई देखाउनुपर्छ । नेपालको पहिचान भनेर देखाउने भनेको यही हो । यसको सम्मान मात्रै होइन, यसको संरक्षण पनि गर्नुपर्छ ।’ उनले उपत्यकाको विकसित संस्कृतिलाई राष्ट्रिय पहिचान दिनुपर्ने बताए । 

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन