श्रम स्वीकृति लिनेको लर्कोः ६ महिनामा झन्डै चार लाखले छाडे देश

काठमाडौं । देशले रोजगारी सिर्जना गर्न नसकेका कारण वर्षेनि लाखौं युवा बिदेसिन बाध्य छन् । नेपाली युवाका निम्ति वैदेशिक रोजगारी रहर होइन वाध्यत भइसकेको छ ।  

चालु आर्थिक वर्ष २०८१/८२ को (साउन देखि पुस) पहिलो ६ महिनामा वैदेशिक रोजगारीका लागि ३ लाख ९३ हजार ६७ जनाले श्रम स्वीकृति लिएका छन् । वैदेशिक रोजगार विभागको तथ्यांकअनुसार, चालु आर्थिक वर्ष २०८१/८२ को साउनमा ५९ हजार ५७५, भदौमा ५७ हजार ४९३, असोजमा ५३ हजार ५२५, कात्तिकमा ७० हजार ९९०, मंसिरमा ८४ हजार २२६ र पुसमा ६७ हजार २५८ जनाले  रोजगारीका लागि विभिन्न देश जान श्रम स्वीकृति लिएका हुन् ।

वैदेशिक रोजगारीका लागि श्रम स्वीकृति लिनेको संख्या सबै भन्दा धेरै मंसिरमा र कम असोजमा रहेको छ । नेपालको प्रमुख चाडपर्व सकिए लगत्तै कामको खोजीमा वैदेशिक रोजगारीमा जाने नेपालीको संख्या ह्वात्तै बढेको मंसिरको तथ्याकंले देखाएको छ । वैदेशिक रोजगारीका लागि मंसिरमा ८४ हजारभन्दा बढीले श्रम स्वीकृति लिएका थिए भने यो संख्या घटेर पुसमा ६७ हजार पुगेको छ ।  

२०८१ साउनदेखि पुस मसान्तसम्ममा श्रम स्वीकृति लिनेमा तीन लाख ४८ हजार २४१ जना पुरुष र ४४ हजार ८२६ जना महिला छन् । पुसमा बाहिरिने मध्ये ६० हजार १५३ जना पुरुष रहेका छन् भने ७ हजार १०५ जना महिला बाहिरिएका छन् ।

अघिल्लो आर्थिक वर्षको पहिलो ६ महिनाको तुलनामा चालु आर्थिक वर्षको सोही अवधिमा वैदेशिक रोजगारीमा जान ५२ हजार ७३७ जना बढीले श्रम स्वीकृति लिएको पाइएको छ । अघिल्लो आर्थिक वर्ष २०८०/८१ को सोही अवधिमा वैदेशिक रोजगारीमा जान विभागबाट तीन लाख ४० हजार ३३० जनाले श्रम स्वीकृति लिएका थिए ।  

चालु आर्थिक वर्षको ६ महिनामा सबैभन्दा धेरै संयुक्त अरब इमिरेट्स (युएई) जान श्रम स्वीकृति लिएका छन् । चालु आवको साउन देखि पुससम्ममा मात्रै युएईका लागि १ लाख २२ हजार ८२९ जनाले श्रम स्वीकृति लिएको विभागको तथ्यांकले जनाएको छ ।

युएईमा श्रम स्वीकृति नलिएका महिला तथा पुरुषको गणना तथ्यांकमा छैन । दलालमार्फत भिजिट भिसामा जाने महिलाको रोजाइ पनि युएई नै हुने गरेको छ । अहिलेको सन्दर्भमा महिला र पुरुष दुवैको रोजाइ युएई भएको विभागका अधिकारीहरूले बताएका छन् ।  

यस्तै, युएईपछि सबैभन्दा धेरै साउदी अरेबियाको लागि श्रम स्वीकृति लिएका छन् । साउदी अरेबियाको लागि ६ महिनामा ७८ हजार ४६८ र कतारको लागि ७० हजार ३०२ जनाले श्रम स्वीकृति लिएका छन् । मलेसियाको रोजगारी भने निरन्तर ओरालो लागेको छ ।

श्रम बजारमा आप्रवासी श्रमिक संख्या बढी भएको भन्दै मलेसियाले मे मसान्तसम्म आप्रवासी श्रमिकलाई प्रवेश दिने र त्यसपछि रोक लगाउने घोषणा गरेको थियो । त्यसैले मलेसिया जाने नेपालीको संख्यामा कमी आएको हो । ६ महिनामा मलेसियाका लागि १४ हजार ५७२ जनाले श्रम स्वीकृति लिएका छन् ।

चालु आवमा वैदेशिक रोजगारीमा जान सबैभन्दा धेरै कात्तिक र मंसिरमा श्रम स्वीकृति लिएका छन् । नयाँभन्दा पनि बिदामा आएर पुनः वैदेशिक रोजगारीमा जाने धेरै भएकाले विगतको तुलनामा संख्या बढेको छ । विदेशमा काम गर्न जान श्रम स्वीकृति लिनुपर्छ ।  

युएई जहिल्यै पहिलो श्रम गन्तव्य मुलुक बन्न पुगेको छ । वैदेशिक रोजगारीका लागि मलेसिया जाने नेपाली श्रमिकको संख्या घटे पनि गत आर्थिक वर्षदेखि नै संयुक्त अरब इमिरेट्स (युएई), कतार र साउदी अरब जानेको संख्या बढेसँगै श्रम स्वीकृति लिनेको संख्या बढेको छ ।  

नेपालीको विशेष चाड मनाएर फर्किने नेपाली धेरै भएकाले श्रमिकको संख्या कात्तिक र मंसिरमा उच्च भएको छ । वैदेशिक रोजगारीको ३० वर्षको इतिहासमा अघिल्लो र गत आवमा सबैभन्दा बढी युवा रोजगारी खोज्दै विदेश गएका थिए । तर, गत वर्ष ६ महिनाको संख्या तुलना गर्दा चालु आवमा वैदेशिक रोजगारीमा जानेको संख्या बढ्ने संकेत देखिएको छ ।

पछिल्लो समय युरोप जानेको संख्या पनि बढ्दो छ । श्रम स्वीकृति लिएर क्रोएसिया, साइप्रस, फ्रान्स, पोल्यान्ड, रोमानियाजस्ता युरोपेली मुलुकमा नेपाली जाने गरेको विभागको तथ्यांक छ । साथै नेपाली युवाको आकर्षण बढ्दै गइरहेकाले वैदेशिक रोजगारीलाई सुरक्षित, व्यवस्थित, नियमित र मर्यादित बनाउने योजना पनि सरकारले अघि सारेको छ ।   

कुन जिल्लाबाट कति बाहिरिए ?

चालु आर्थिक वर्षको ६ महिनामा वैदेशिक रोजगारीका लागि श्रम स्वीकृति लिनेको संख्या जिल्लागत रूपमा हेर्दा सबै भन्दा धेरै धनुषा र सबै भन्दा कम मनाङ रहेको विभागको तथ्यांकले प्रस्ट्याएको छ । यस अवधिमा सबैभन्दा धेरै धनुषाबाट २० हजार ७०३ जना बाहिरिएका छन् भने सबै भन्दा कम मनाङबाट १२१ जना युवा मात्रै रहेको विभागले जनाएको छ ।  

त्यस्तै धनुषापछि क्रमशः घट्दो क्रममा झापा १८ हजार ४२४, मोरङ १६ हजार ४४२, सिराहा १६ हजार ०९२ र महोत्तरीबाट १४ हजार ४७७ जनाले विभागबाट श्रम स्वीकृति लिएर बिदेसिएका छन् ।  

केही वर्षदेखि धनुषा एक नम्बरमै छ । त्यस जिल्लाबाटै युवाहरू विभिन्न मुलुकमा रोजगारको खोजी गर्दै बिदेसिएका छन् । वैदेसिक रोजगारीमा जानेको संख्या हरेक वर्ष बढे पनि अन्य जिल्लाले धनुषालाई उछिन्न सकेका छैनन् ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन