![$adHeader[0]['title']](https://bfisnews.com/images/bigyapan/1774272772_1769061114-ss-nimb.gif)
दक्षिणपूर्वी एसियामा शक्तिशाली भूकम्प, बैंककमा आपतकाल घोषणा
- BFIS News
- 2025 Mar 28 14:10
काठमाडौं । शुक्रबार दक्षिणपूर्वी एसियामा दुई शक्तिशाली भूकम्प गएपछि थाइल्याण्डको राजधानी बैंककका भवनहरू हल्लिएका छन् र शहरभर तथा छिमेकी म्यानमारमा पनि मानिसहरू घरबाट बाहिर निस्किन बाध्य भएका छन्। थाइ अधिकारीहरूले बैंककमा आपतकाल घोषणा गरेका छन्, प्रधानमन्त्री पैतोंगटार्न सिनावात्राले जानकारी दिएका छन्।
अमेरिकी भूगर्भीय सर्वेक्षण (USGS) र जर्मनीको GFZ भू-विज्ञान केन्द्रका अनुसार मध्यान्हतिर गएको पहिलो भूकम्पको गहिराइ १० किलोमिटर (६.२ माइल) रहेको र यसको केन्द्रविन्दु म्यानमारमा रहेको प्रारम्भिक प्रतिवेदनहरूमा उल्लेख छ। पहिलो भूकम्प गएको १२ मिनेटपछि ६.४ म्याग्निच्युडको अर्को भूकम्प गएको थियो।
बैंककमा भवन भत्किँदा ४३ जना फसे
बैंकक प्रहरीले एक निर्माणाधीन अग्लो भवन भत्किएको र भग्नावशेषमा ४३ जना फसेको बताएको छ। सामाजिक सञ्जालमा भाइरल भएको एक भिडियोमा, माथिल्लो भागमा क्रेन रहेको बहुमञ्जिला भवन भत्किएर धुलोको मुस्लो उडिरहेको देखिन्छ। घटनाका प्रत्यक्षदर्शीहरू चिच्याउँदै भागिरहेका थिए। हालसम्म कुनै हताहतीको पुष्टि भएको छैन। प्रधानमन्त्री सिनावात्राले आपतकालीन बैठक बोलाएर भूकम्पको प्रभावको समीक्षा गरेका छन्।
बैंककमा लाखौं प्रभावित
बैंकक महानगर क्षेत्रमा १.७ करोडभन्दा बढी मानिस बसोबास गर्छन्, जसमा धेरैजसो अग्ला भवन तथा अपार्टमेन्टमा बस्छन्। भूकम्प दिउँसो १:३० बजे जाँदा उच्च भवनहरूमा खतरा जनाउँदै सायरन बज्न थाल्यो। घना जनसंख्या भएका बैंककका होटल तथा अपार्टमेन्टका बासिन्दाहरू आकस्मिक रूपमा भर्याङबाट तल झरेर सडकमा जम्मा भएका थिए। थाइल्याण्डको प्रकोप व्यवस्थापन विभागका अनुसार यो भूकम्प देशका अधिकांश क्षेत्रमा महसुस गरिएको थियो।
म्यानमारमा धार्मिक संरचनामा क्षति
भूकम्पको केन्द्र म्यानमारको मध्य भाग, मोन्य्वा शहरबाट करिब ५० किलोमिटर (३० माइल) पूर्वमा रहेको थियो। राजधानी नेप्यितावमा भूकम्पका कारण केही धार्मिक संरचनाहरू भत्किएका छन् भने केही घरहरूमा क्षति पुगेको छ। म्यानमारमा जारी गृहयुद्धका कारण थप विवरण तत्काल प्राप्त हुन सकेको छैन।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया