राजावादीको हिंसात्मक प्रदर्शनीमा संलग्न ४१ जना पक्राउ

BFIS News
2025 Mar Mon 19:38

राजावादीको हिंसात्मक प्रदर्शनीमा संलग्न ४१ जना पक्राउ

काठमाडौं । काठमाडौंको तीनकुने क्षेत्रमा यहि चैत १५ गते भएको राजावादीको हिंसात्मक प्रदर्शनी संलग्न ४१ जना पक्राउ भएका छन् । उक्त प्रदर्शनी नवराज सुवेदीको संयोजकत्व र दुर्गा प्रसाईको नेतृत्वमा आयोजन गरिएको थियो। प्रदर्शनका क्रममा आयोजक र सहभागीहरूले संघीय संसद भवनको वरिपरि रहेको निषेधित क्षेत्र तोड्ने उद्देश्यले प्रहरीमाथि ढुङ्गामुढा आक्रमण गरेका थिए ।

प्रदर्शनकारीहरूले सुरक्षा बलका सदस्यहरूलाई ढुङ्गा, लाठी, फलामका रड र घरेलु हतियार प्रयोग गरी आक्रमण गरे, जसका कारण केही सुरक्षाकर्मी घाइते भएका छन्। प्रदर्शनको क्रममा नेपाल प्रहरी, सशस्त्र प्रहरी बल र अन्य सुरक्षाकर्मीमाथि पनि हिंसा भएको र उनीहरूको हातहतियार खोसिएको खबर प्राप्त भएको छ।

साथै, प्रदर्शनकारीहरूले सर्वसाधारणको घर, निजी सम्पत्ति, सञ्चार गृह, विभिन्न राजनीतिक दलका कार्यालयहरू, नेताका निवासहरू, अस्पतालहरू, प्रहरी कार्यालय, व्यापारिक केन्द्र, नेपाल आयल निगमको इन्धन भण्डारण स्थल, नागरिक उड्डयन प्राधिकरणको कार्यालय र अन्तर्राष्ट्रिय विमानस्थलको बाह्य कम्पाउण्डमा तोडफोड र आगजनी गरेका छन्। प्रदर्शनको क्रममा सरकारी र निजी सवारी साधनमा पनि आगजनी भएको छ।

प्रदर्शनकारीहरूले तीनकुनेस्थित एक घरमा रहेका व्यक्तिहरूलाई ज्यान जाने गरी आगो लगाएका थिए । जसलाई एक गम्भीर अपराधको रूपमा लिइएको छ। यस घटनामा संलग्न ४१ जनालाई काठमाडौंको विभिन्न स्थानबाट नियन्त्रणमा लिइएको छ। पक्राउ गरिएका व्यक्तिहरूको माथि अनुसन्धान जारी रहेको र अदालतबाट पाँच दिनको म्याद थप अनुमति प्राप्त भएको जनाइएको छ।

गृह मन्त्रालय र सुरक्षा निकायहरूले यस हिंसात्मक र अपराधिक गतिविधिलाई कडा प्रहार गर्ने दृढता व्यक्त गरेका छन् र अपराधीलाई कानूनको दायरामा कडा कारबाही गर्ने चेतावनी दिएका छन्।