राष्ट्र बैंकसमेत बिचौलियाको प्रभावमा चल्न थालेको: नेता शेखर कोइरालाको आरोप

काठमाडौं, चैत २५ । नेपाली कांग्रेसका नेता डा. शेखर कोइरालाले देशको अर्थतन्त्र सम्हाल्ने महत्वपूर्ण संस्था राष्ट्र बैंकसमेत अहिले बिचौलियाको चलखेलमा चल्न थालेको आरोप लगाएका छन्।

चितवन कांग्रेसले मंगलबार नारायणगढमा आयोजना गरेको कार्यक्रममा बोल्दै नेता कोइरालाले राष्ट्र बैंकको गभर्नर नियुक्ति प्रक्रिया अलपत्र अवस्थामा रहेको भन्दै गम्भीर चिन्ता व्यक्त गरे। "गभर्नरको नियुक्ति एक महिना अगाडि नै हुनुपर्ने थियो, तर अझैसम्म पनि प्रक्रिया टुंगिएको छैन। छनोट समिति त बन्यो, तर बैठक नै बसेको छैन," उनले भने, "राष्ट्र बैंकजस्तो संवेदनशील संस्थासमेत बिचौलियाको प्रभावबाट जोगिन सकेन।"

देश र विश्वकै अर्थतन्त्र ओरालो लागिरहेको सन्दर्भमा राष्ट्र बैंकको नेतृत्व सक्षम, निष्कलंक र अनुभवी व्यक्तिको हातमा हुनु जरुरी भएको उनको भनाइ थियो। तर हाल देखिएको राजनीतिक हस्तक्षेपले यो प्रक्रिया दिशाहीन बन्दै गएको उनले टिप्पणी गरे।

सरकारले आफ्नो काम राजनीतिक संयन्त्रबाट होइन, नीतिगत रूपमा अगाडि बढाउनु पर्नेमा उनले जोड दिए।

त्यस्तै, संविधान संशोधनका सम्बन्धमा पनि नेता कोइरालाले गम्भीर अभिव्यक्ति दिएका छन्। "संविधान संशोधन अहिलेको आवश्यकता हो, तर त्यो कांग्रेस र एमालेको सहमतिमा मात्रै होइन, संसद्का सबै दल, नागरिक समाज र कानुन विज्ञहरूको सल्लाहमा हुनुपर्छ," उनले स्पष्ट पारे। नेता कोइरालाले संस्थागत सुधार, पारदर्शिता र सुशासनको माग गर्दै सबै पक्षहरू गम्भीर बन्नुपर्ने आवश्यकतामाथि जोड दिए।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन