![$adHeader[0]['title']](https://bfisnews.com/images/bigyapan/1759825227_1100x100.gif)
फागुनमा मुद्रास्फीति ३.७५ प्रतिशत, खाद्य तथा पेय पदार्थ समूहको मूल्य वृद्धि कम
- BFIS News
- 2025 Apr 09 17:32
काठमाडौं, फागुन — चालु आर्थिक वर्ष २०८१ को फागुन महिनामा वार्षिक बिन्दुगत उपभोक्ता मुद्रास्फीति ३.७५ प्रतिशत पुगेको छ। नेपाल राष्ट्र बैंकले सार्वजनिक गरेको तथ्यांकअनुसार अघिल्लो वर्षको सोही महिनामा यो दर ४.८२ प्रतिशत थियो। यस अवधिमा मुद्रास्फीति केही घटेको देखिएको छ।
समीक्षा महिनामा खाद्य तथा पेय पदार्थ समूहको मुद्रास्फीति ३.३४ प्रतिशत र गैर-खाद्य तथा सेवा समूहको मुद्रास्फीति ३.९७ प्रतिशत रहेको छ। अघिल्लो वर्ष यी दरहरू क्रमशः ५.९५ प्रतिशत र ४.०७ प्रतिशत थिए।
खाद्य समूहभित्र घ्यू तथा तेल उप-समूहको मूल्य सूचकाङ्क १३.७४ प्रतिशतले वृद्धि भएको छ। त्यसैगरी, दाल तथा गेडागुडी ७.८० प्रतिशत, फलफूल ६.८२ प्रतिशत र गैर-मदिराजन्य पेय पदार्थ ५.१५ प्रतिशतले महँगो भएको छ। तर, मरमसला ५.१७ प्रतिशत, तरकारी १.२४ प्रतिशत र माछा तथा मासु ०.७४ प्रतिशतले सस्तो भएको छ।
गैर-खाद्य तथा सेवा समूहमा विविध वस्तु तथा सेवाको मूल्य सूचकाङ्क १०.१४ प्रतिशत, कपडा तथा जुत्ताचप्पलको ७.०१ प्रतिशत, मदिराजन्य पेय पदार्थको ६.०७ प्रतिशत, फर्निचर तथा घरायसी उपकरणको ५.५९ प्रतिशत र यातायात समूहको ५.०७ प्रतिशतले वृद्धि भएको छ।
ग्रामीण क्षेत्रमा उपभोक्ता मूल्य सूचकाङ्क ४.१८ प्रतिशतले बढ्दा सहरी क्षेत्रमा यो दर ३.६० प्रतिशत मात्र रहेको छ। प्रदेशगत रुपमा हेर्दा फागुन महिनामा कोशी प्रदेशमा सबैभन्दा बढी ५.६८ प्रतिशत मुद्रास्फीति देखिएको छ। त्यसपछिका प्रदेशहरूमा मुद्रास्फीति यस्तो रहेको छ:
-
सुदूरपश्चिम: ४.४१ प्रतिशत
-
कर्णाली: ३.८० प्रतिशत
-
लुम्बिनी: ३.७७ प्रतिशत
-
मधेश: ३.५२ प्रतिशत
-
बागमती: २.९८ प्रतिशत
-
गण्डकी: २.७७ प्रतिशत
भौगोलिक हिसाबले हेर्दा हिमाली क्षेत्रमा ४.७७ प्रतिशत मुद्रास्फीति देखिएको छ, जुन सबैभन्दा बढी हो। त्यसपछि क्रमशः तराईमा ३.७७ प्रतिशत, पहाडमा ३.७२ प्रतिशत र काठमाडौं उपत्यकामा ३.२५ प्रतिशत मुद्रास्फीति भएको छ।
यस अवधिमा थोक मुद्रास्फीति भने ४.४३ प्रतिशत पुगेको छ, जुन अघिल्लो वर्षको सोही महिनाको ३.६९ प्रतिशतको तुलनामा बढी हो। उपभोग्य वस्तु, मध्यवर्ती वस्तु र पुँजीगत वस्तुको थोक मुद्रास्फीति क्रमशः ८.०२, २.५७ र ३.१७ प्रतिशत रहेको छ। त्यस्तै, निर्माण सामग्रीको थोक मुद्रास्फीति १.६३ प्रतिशतले बढेको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया