नबिल बैंकको ४२औँ वार्षिक साधारण सभा असोज २२ गते, १५.८० प्रतिशत लाभांश पारित गर्ने

काठमाडौं । नबिल बैंक लिमिटेडले गत आर्थिक वर्षको मुनाफाबाट शेयरधनीलाई वितरण गर्ने प्रस्तावित लाभांश पारित गर्न ४२औँ वार्षिक साधारण सभा बोलाएको छ। बैंकले असोज २२ गते बिहीबार काठमाडौंको भद्रकालीस्थित त्रिभुवन आर्मी अफिसर्स क्लबमा साधारण सभा आयोजना गर्ने भएको हो। सभा बिहान साढे ९ बजे सुरु हुनेछ।

सभामा बैंकले हाल कायम चुक्ता पूँजीको ५ प्रतिशत बोनस शेयर र १०.८० प्रतिशत नगद लाभांश वितरण गर्ने प्रस्ताव पेश गर्नेछ। नगद लाभांशमा कर प्रयोजनका लागि आवश्यक रकमसमेत समावेश छ। यसअनुसार साधारण शेयरतर्फ बैंकले कुल १५.८० प्रतिशत लाभांश वितरण गर्ने प्रस्ताव गरेको छ।

बैंकको हाल कायम २७ अर्ब ५ करोड रुपैयाँ चुक्ता पूँजीका आधारमा ५ प्रतिशत बोनस शेयरबापत करिब १ अर्ब ३५ करोड रुपैयाँ र १०.८० प्रतिशत नगद लाभांशबापत करिब २ अर्ब ९२ करोड रुपैयाँ वितरण हुनेछ। यसरी साधारण शेयरधनीलाई कुल करिब ४ अर्ब २७ करोड रुपैयाँ लाभांश वितरण हुने प्रस्ताव छ।

यसैगरी, बैंकले ८ प्रतिशत अविमोच्य असञ्चिति अग्राधिकार शेयरधनीलाई चुक्ता पूँजीको ८ प्रतिशत नगद लाभांश वितरण गर्ने प्रस्ताव पनि साधारणसभामा लैजानेछ। अग्राधिकार शेयरतर्फको उक्त लाभांश साधारण शेयरधनीका लागि प्रस्तावित १५.८० प्रतिशत लाभांशभन्दा अलग हुनेछ।

सभाले बैंक तथा वित्तीय संस्थासँग मर्जर वा एक्विजिशनसम्बन्धी आवश्यक कार्य गर्न सञ्चालक समितिलाई अख्तियारी दिने प्रस्तावसमेत पारित गर्नेछ। साथै, प्रबन्धपत्र तथा नियमावली संशोधन, संस्थापक शेयरधनीको तर्फबाट सञ्चालक समितिमा प्रतिनिधित्व गर्ने तीन जना सञ्चालकको निर्वाचन र लेखापरीक्षक नियुक्तिलगायतका प्रस्ताव पनि सभाको कार्यसूचीमा छन्।

साधारण सभा तथा लाभांश वितरण प्रयोजनका लागि बैंकले असोज १४ गते बुकक्लोज गर्ने भएको छ। त्यसअनुसार असोज १३ गतेसम्म नेप्सेमा कारोबार भई कायम रहेका शेयरधनीले साधारणसभामा सहभागी हुन तथा प्रस्तावित लाभांश प्राप्त गर्न सक्नेछन्।

नबिल बैंकले यसपटक घोषणा गरेको लाभांश विगत चार वर्षयताकै उच्च रहेको जनाएको छ। बैंकले बोनस शेयरसँगै नगद लाभांशलाई निरन्तरता दिँदै कुल लाभांश दर बढाएको हो।

तर, सञ्चालक समितिले प्रस्ताव गरेको लाभांश तत्काल वितरण हुने भने होइन। प्रस्तावित लाभांशका लागि नियामकीय प्रक्रिया पूरा गर्नुपर्नेछ। नेपाल राष्ट्र बैंकबाट स्वीकृति प्राप्त भएपछि मात्रै लाभांशसम्बन्धी प्रस्ताव साधारणसभामा पेश हुनेछ र सभाबाट पारित भएपछि शेयरधनीलाई वितरण गरिनेछ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?