बीमा कम्पनीहरुको ध्यान नविकरण तर्फ, संस्थान पहिलो दोस्रो बृद्धिदर प्रभु महालक्ष्मीको (हेर्नुहोस् कसको बृद्धिदर कति)

BFIS News
2023 Nov Mon 05:39

बीमा कम्पनीहरुको ध्यान नविकरण तर्फ, संस्थान पहिलो दोस्रो बृद्धिदर प्रभु महालक्ष्मीको (हेर्नुहोस् कसको बृद्धिदर कति)

काठमाडौं । चरम आर्थिक मन्दीको समयमा जीवन बीमा कम्पनीहरुले नविकरण बीमा शुल्क आर्जनलाई विशेष ध्यान दिन थालेका छन् । व्यतित बीमालेखमा व्याज छुटका स्किम ल्याएर कम्पनीहरुले नविकरण बीमा शुल्क आर्जनमा प्राथमिकता दिएका हुन् । प्राधिकरणले पनि कम्पनीहरुले ल्याप्सेस रेसियो घटाउन निर्देशन दिनुका साथै घटाउनका लागि कम्पनीले लिएका पहल कदमीको नियमित रिपोर्टिङ गर्दे आइरहेको छ ।

सरकारी कर्मचारीको बीमा गराएर ढुक्कका साथ बसिरहेको राष्ट्रिय बीमा संस्थाले चालु आर्थिक वर्षको पहिलो त्रैमाशिक अवधिमा नविकरण बीमा शुल्क आर्जन २९८ प्रतिशतले बढाउदै तीन अर्ब ९३ करोड आर्जन गरेको छ । त्यस्तै नविकरण बीमा शुल्क आर्जनको सर्वाधिक दोस्रो बृद्धिदर प्रभु महालक्ष्मी लाइफको ३४.९५ प्रतिशत रहेको छ । कम्पनीले समिक्षा अवधिमा ९३ करोड ५६ लाख रुपैयाँ आर्जन गरेको छ । मर्जर सँगै कम्पनीले नविकरण बीमा शुल्क आर्जनलाई विशेष जोड दिदै आएको छ ।

त्यस्तै रिलायबल र सानिमा रिलायन्स लाइफले पनि नविकरण बीमा शुल्कमा विशेष जोड दिएका छन् । दुबैको बृद्धिदर क्रमश ३० र १९.७१ प्रतिशत रहेको छ । नविकरण बीमा शुल्क आर्जनमा सर्वाधिक कमजोर सन नेपाल लाइफ रहेको छ । कम्पनीले गएका वर्षमा आवधिक जीवन बीमा पोलिसी अर्थात वैदेशिक रोजगार बीमालेखमा मात्रै केन्द्रित हुँदा यस वर्ष नविकरणको हिस्सा कमजोर देखिएको हो । पछिल्ला दिनमा सन नेपाल लाइफ सावधिक जीवन बीमालेखमा पनि ध्यान दिन थालेको छ ।