कम लागतको निक्षेप र कर्जा विविधीकरणबाट मञ्जुश्री फाइनान्सको नाफामा सुधार: सिइओ तेजराज तिमिल्सिना

काठमाडौं। मञ्जुश्री फाइनान्सले सञ्चालन आम्दानी बढाउनुका साथै कर्जाको गुणस्तरसमेत कायम राख्दै वित्तीय प्रदर्शनमा सुधार गरेको छ। प्रमुख कार्यकारी अधिकृत तेजराज तिमिल्सिनाका अनुसार आर्थिक वर्षमा फाइनान्सको कुल सञ्चालन आम्दानी १ अर्ब ८ करोड १० लाख रुपैयाँ पुगेको छ। अघिल्लो आर्थिक वर्षमा यस्तो आम्दानी १ अर्ब १ करोड ६० लाख रुपैयाँ थियो।

समीक्षा अवधिमा कम्पनीको कुल सम्पत्ति ८.४० प्रतिशतले बढेर २८ अर्ब ३६ करोड ५० लाख रुपैयाँ पुगेको छ। त्यस्तै, कर्जा तथा सापटी १३.९० प्रतिशतले वृद्धि भई २१ अर्ब १७ करोड २० लाख रुपैयाँ पुगेको छ भने निक्षेप ८.८७ प्रतिशतले बढेर २४ अर्ब ९७ करोड ४० लाख रुपैयाँ कायम भएको छ।

कम्पनीको निष्क्रिय कर्जा अनुपात ३.४२ प्रतिशत रहेको छ। बैंक तथा वित्तीय संस्थाको औसत निष्क्रिय कर्जा अनुपात ५.६६ प्रतिशत रहेको अवस्थामा मञ्जुश्री फाइनान्सले आफ्नो कर्जाको गुणस्तर तुलनात्मक रूपमा राम्रो राखेको देखिन्छ। कम्पनीको पुँजी पर्याप्तता अनुपात १२.६६ प्रतिशत रहेको छ।

कम्पनीको सञ्चालक समितिले सेयरधनीलाई २० प्रतिशत लाभांश वितरण गर्न सिफारिस गरेको छ। प्रस्तावित लाभांशमा ५ प्रतिशत बोनस सेयरसमेत समावेश छ। उक्त प्रस्ताव वार्षिक साधारणसभाबाट स्वीकृत भएपछि वितरण हुनेछ।

ब्याजदर घट्दा पनि आम्दानी र प्रतिफलमा सुधार

आर्थिक वर्ष २०८२/८३ नेपालको वित्तीय क्षेत्रका लागि मिश्रित अवस्था रहेको तिमिल्सिनाले बताएका छन्। वित्तीय प्रणालीमा पर्याप्त तरलता उपलब्ध हुनु र ब्याजदर घट्नु सकारात्मक पक्ष भए पनि निजी क्षेत्रको कर्जाको माग अपेक्षाअनुसार विस्तार हुन नसक्नु तथा कर्जाको गुणस्तर कायम राख्नु चुनौतीपूर्ण रहेको उनको भनाइ छ।

नेपालको अर्थतन्त्र समीक्षा वर्षमा ३.८५ प्रतिशतले विस्तार भएको अनुमान छ। अघिल्लो आर्थिक वर्षमा आर्थिक वृद्धिदर ४.६१ प्रतिशत थियो। समीक्षा अवधिमा कृषि क्षेत्र १.५८ प्रतिशत, उद्योग क्षेत्र ५.६७ प्रतिशत र सेवा क्षेत्र ४.२१ प्रतिशतले विस्तार भएको अनुमान छ।

मूल्यवृद्धि अधिकांश समय न्यून रहे पनि आर्थिक वर्षको मध्य जुलाई २०२६ सम्म आइपुग्दा वार्षिक विन्दुगत उपभोक्ता मुद्रास्फीति ५.१४ प्रतिशत पुगेको थियो। वार्षिक औसत मुद्रास्फीति भने ३.०८ प्रतिशत रहेको थियो।

बाह्य क्षेत्रका सूचकहरू भने तुलनात्मक रूपमा बलिया देखिएका छन्। समीक्षा अवधिमा विप्रेषण आप्रवाह ३७.१ प्रतिशतले बढेर २३ खर्ब ६३ अर्ब रुपैयाँ पुगेको छ। चालु खाता ९ खर्ब २३ अर्ब ५६ करोड रुपैयाँले बचतमा रहेको छ भने विदेशी मुद्रा सञ्चिति २५ अर्ब ३१ करोड अमेरिकी डलर पुगेको छ। उक्त सञ्चितिले १९.६ महिनाको वस्तु तथा सेवा आयात धान्न पर्याप्त हुने अवस्था रहेको छ।

यद्यपि, सरकारी पुँजीगत खर्च १४.८ प्रतिशतले घटेर १ खर्ब ९० अर्ब ८४ करोड रुपैयाँमा सीमित हुँदा आन्तरिक लगानी र आर्थिक गतिविधिमा अपेक्षित गति आउन सकेन।

नेपाल राष्ट्र बैंकले मौद्रिक नीतिमार्फत लचिलो नीति अवलम्बन गरेपछि बैंक तथा वित्तीय संस्थाको ब्याजदरमा उल्लेख्य गिरावट आएको छ। वाणिज्य बैंकहरूको औसत कर्जाको ब्याजदर अघिल्लो वर्षको ७.८५ प्रतिशतबाट घटेर ६.५५ प्रतिशतमा आएको छ। त्यस्तै, निक्षेपको औसत ब्याजदर ४.१९ प्रतिशतबाट घटेर ३.२१ प्रतिशत कायम भएको छ।

यस अवधिमा बैंक तथा वित्तीय संस्थाको निक्षेप १३.९ प्रतिशतले बढे पनि निजी क्षेत्रतर्फको कर्जा प्रवाह ६.५ प्रतिशतले मात्रै विस्तार भएको छ। निक्षेप र कर्जाको वृद्धिदरबीचको अन्तरले वित्तीय प्रणालीमा तरलता थुप्रिनुका साथै ब्याजदर अन्तरमा दबाब सिर्जना गरेको छ।

ब्याजदर अन्तरको दबाब व्यवस्थापन गर्दै १३.८१ प्रतिशत इक्विटीमा प्रतिफल

ब्याजदर घट्दा कम्पनीको सम्पत्ति तथा दायित्व दुवै पक्षको ब्याजदर पुनः निर्धारण भएको थियो। निक्षेपको तुलनामा कर्जाको ब्याजदर छिटो समायोजन हुँदा कम्पनीको खुद ब्याजदर अन्तर (नेट इन्टरेस्ट स्प्रेड) घटेर ४ प्रतिशतमा सीमित भएको तिमिल्सिनाले बताएका छन्।

यस्तो दबाबका बाबजुद कम्पनीले सञ्चालन खर्च नियन्त्रण, कर्जा पोर्टफोलियो विविधीकरण र न्यून लागतका निक्षेप परिचालनमा जोड दिएको थियो। त्यसबाट कम्पनीले १३.८१ प्रतिशत इक्विटीमा प्रतिफल (रिटर्न अन इक्विटी) हासिल गरेको छ।

सुशासन र जोखिम व्यवस्थापनमा जोड

कम्पनीले नेपाल राष्ट्र बैंकका निर्देशन तथा कम्पनी ऐनका प्रावधानअनुसार संस्थागत सुशासनलाई प्राथमिकतामा राख्दै आएको जनाएको छ। समीक्षा वर्षमा जोखिम व्यवस्थापन, आन्तरिक लेखापरीक्षण तथा अनुपालनसम्बन्धी कार्यलाई थप सुदृढ बनाइएको छ।

कम्पनीको सञ्चालक समितिले वर्षभरिमा १९ वटा नीतिगत दस्तावेज स्वीकृत गरेको छ। विशेषगरी जोखिम व्यवस्थापनको संरचना बलियो बनाउने विषयलाई प्राथमिकता दिइएको कम्पनीले जनाएको छ।

डिजिटल सेवामा विस्तार, भर्चुअल क्रेडिट कार्ड जारी गर्ने पहिलो फाइनान्स कम्पनी

मञ्जुश्री फाइनान्सले प्रविधिमा आधारित वित्तीय सेवाको विस्तारलाई समेत प्राथमिकता दिएको छ। समीक्षा अवधिमा मोबाइल बैंकिङ तथा डेबिट कार्ड प्रयोगकर्ताको संख्या वृद्धि गरिएको कम्पनीले जनाएको छ।

यसै क्रममा कम्पनी फोनपे भर्चुअल क्रेडिट कार्ड जारी गर्ने बैंक तथा वित्तीय संस्थाको सूचीमा समावेश भएको छ। कम्पनीका अनुसार क्रेडिट कार्ड सेवा उपलब्ध गराउने पहिलो फाइनान्स कम्पनीसमेत मञ्जुश्री बनेको छ।

आगामी दिनमा कर्जा मूल्यांकन, ग्राहक सेवा तथा आन्तरिक कार्यसञ्चालनलाई प्रभावकारी बनाउन तथ्यांक विश्लेषण र कृत्रिम बुद्धिमत्ता (एआई) को व्यावहारिक प्रयोग विस्तार गर्ने कम्पनीको योजना छ। त्यसका लागि तथ्यांकको गोपनीयता र शुद्धता कायम राख्ने सुरक्षात्मक उपायलाई पनि प्राथमिकता दिइने जनाएको छ।

डिजिटल कारोबार विस्तारसँगै साइबर सुरक्षालाई कम्पनीले महत्वपूर्ण जिम्मेवारीका रूपमा लिएको छ। ग्राहकको तथ्यांक तथा रकम सुरक्षित राख्न निगरानी प्रणाली, पहुँच नियन्त्रण, नियमित सुरक्षा परीक्षण र कर्मचारी सचेतना कार्यक्रमलाई थप प्रभावकारी बनाइएको छ। साथै, फिसिङ, नक्कली पहिचान तथा अनलाइन ठगीबाट जोगिन ग्राहकलाई सचेत रहन आग्रह गरिएको छ।

२८ शाखाबाट करिब २ लाख ग्राहकलाई सेवा

मञ्जुश्री फाइनान्सले शाखा सञ्जाल र डिजिटल माध्यममार्फत करिब २ लाख ग्राहकलाई सेवा प्रदान गर्दै आएको छ। कम्पनीका देशभर २८ शाखा र एक एक्सटेन्सन काउन्टर सञ्चालनमा छन्। यसै क्रममा थापाथलीमा नयाँ शाखा सञ्चालनमा ल्याइएको छ।

ग्राहक सेवा सुधारका लागि खाता खोल्ने तथा गुनासो व्यवस्थापन प्रक्रियालाई सरल बनाइएको कम्पनीले जनाएको छ। डिजिटल सेवा विस्तार र आन्तरिक प्रक्रियामा सुधार गर्दा ग्राहकलाई सेवा उपलब्ध गराउन लाग्ने समयसमेत घटेको कम्पनीको दाबी छ।

कर्मचारी विकास र सामाजिक उत्तरदायित्व

कम्पनीले कर्मचारीको क्षमता अभिवृद्धिका लागि समीक्षा वर्षमा ८८ लाख रुपैयाँ तालिम तथा विकास कार्यक्रममा खर्च गरेको छ। विशेषगरी डिजिटल सीप, कर्जा मूल्यांकन र जोखिम व्यवस्थापनसम्बन्धी दक्षता विकासमा जोड दिइएको छ।

त्यस्तै, दिगो वित्तीय विकासलाई प्राथमिकता दिँदै जलविद्युत्, कृषि तथा साना उद्यमजस्ता प्राथमिकताप्राप्त क्षेत्रमा कर्जा लगानी विस्तार गरिएको कम्पनीले जनाएको छ। वातावरणीय प्रभाव न्यूनीकरणका लागि ऊर्जा दक्षता वृद्धि र कागजको प्रयोग घटाउने प्रयाससमेत गरिएको छ।

कम्पनीले स्वास्थ्य, शिक्षा तथा सामुदायिक विकासका कार्यक्रममार्फत संस्थागत सामाजिक उत्तरदायित्वअन्तर्गत २२ लाख रुपैयाँ योगदान गरेको छ।

आगामी वर्ष कर्जा विस्तार र खराब कर्जा व्यवस्थापन चुनौती

नेपाल राष्ट्र बैंकले आर्थिक वर्ष २०८३/८४ को मौद्रिक नीतिमार्फत प्रमुख ब्याजदर यथावत् राख्दै ७ प्रतिशत आर्थिक वृद्धिको लक्ष्य लिएको छ। मुद्रास्फीतिलाई ५.५ प्रतिशतभित्र सीमित गर्ने र निजी क्षेत्रतर्फको कर्जा विस्तार ११ प्रतिशत पुर्‍याउने लक्ष्यसमेत राखिएको छ।

उक्त लक्ष्य हासिल गर्न सरकारी पुँजीगत खर्चमा वृद्धि, निजी क्षेत्रको विश्वास पुनःस्थापना तथा समस्याग्रस्त कर्जाको व्यवस्थापन आवश्यक रहेको तिमिल्सिनाको भनाइ छ। अन्तर्राष्ट्रिय बजारमा पेट्रोलियम पदार्थको मूल्य वृद्धि र अमेरिकी डलरको तुलनामा नेपाली रुपैयाँ कमजोर हुनुले मुद्रास्फीतिमा थप दबाब सिर्जना गर्न सक्ने जोखिम पनि रहेको उनले औँल्याएका छन्।

नेपालको दीर्घकालीन आर्थिक सम्भावनाप्रति आफू आशावादी रहेको उल्लेख गर्दै तिमिल्सिनाले जलविद्युत्, पर्यटन, युवा जनशक्ति, डिजिटल प्रविधिको बढ्दो प्रयोग र वित्तीय क्षेत्र सुधारले अर्थतन्त्रलाई सहयोग पुर्‍याउने विश्वास व्यक्त गरेका छन्।

आगामी वर्ष वित्तीय क्षेत्रमा न्यून ब्याजदर अन्तर, सुस्त कर्जा माग र संस्थागत एकीकरणका चुनौती रहने उनको आकलन छ। अनुकूल परिस्थितिमा वित्तीय नतिजा हासिल गर्नु मात्रै नभई आर्थिक चक्रका विभिन्न चरणमा ग्राहक, समुदाय र सेयरधनीप्रतिको जिम्मेवारी निरन्तर पूरा गर्नु पनि वित्तीय संस्थाको सफलता मापन गर्ने आधार भएको उनले बताएका छन्।

मञ्जुश्री फाइनान्सले आगामी दिनमा विवेकपूर्ण व्यवसाय विस्तार, कर्जाको गुणस्तर कायम राख्ने र ग्राहकको विश्वास अभिवृद्धि गर्ने रणनीतिलाई निरन्तरता दिने तिमिल्सिनाले उल्लेख गरेका छन्।

उनले ग्राहकको विश्वास, सञ्चालक समितिको मार्गदर्शन, नेपाल राष्ट्र बैंक, नेपाल धितोपत्र बोर्डलगायत नियामक निकायको सहयोग तथा कर्मचारीको मेहनतप्रति आभार व्यक्त गर्दै आगामी दिनमा पनि सेयरधनी तथा अन्य सरोकारवालालाई दिगो मूल्य प्रदान गर्ने प्रतिबद्धता व्यक्त गरेका छन्।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?