मेरो सेयरबाटै आईपीओदेखि लकइन अवधि समाप्तिसम्मको विवरण हेर्न सकिने, सीडीएससीले ल्यायो नयाँ व्यवस्था
- BFIS News
- 2026 Nov 19 19:53
काठमाडौं । सीडीएस एन्ड क्लियरिङ लिमिटेड (सीडीएससी) ले लगानीकर्तालाई कम्पनी तथा धितोपत्रसम्बन्धी महत्वपूर्ण सूचना सहज रूपमा उपलब्ध गराउने उद्देश्यले मेरो सेयर प्लेटफर्ममा नयाँ व्यवस्था लागू गरेको छ।
नयाँ व्यवस्थाअनुसार अब धितोपत्र निष्कासन गर्ने कम्पनी, निष्कासन तथा बिक्री प्रबन्धक र शेयर रजिस्ट्रारले सार्वजनिक निष्कासन तथा संस्थागत गतिविधिसम्बन्धी विवरण सी-आस्बा (C-ASBA) प्रणालीमार्फत सिधै प्रकाशन गर्न सक्नेछन्। यसरी प्रकाशन गरिएका विवरण लगानीकर्ताले मेरो सेयरमार्फत हेर्न सक्ने व्यवस्था गरिएको छ।
यस व्यवस्थाबाट लगानीकर्ताले प्राथमिक सार्वजनिक निष्कासन (आईपीओ), हकप्रद शेयर, बोनस शेयर, लाभांश वितरण, डिबेन्चरको भुक्तानी तथा संस्थापक र अन्य प्रतिबन्धित शेयरको लकइन अवधि समाप्त हुने मितिसम्बन्धी जानकारी एउटै डिजिटल प्लेटफर्मबाट प्राप्त गर्न सक्नेछन्।
यसअघि कम्पनीका सूचना तथा घोषणाहरू विभिन्न माध्यमबाट सार्वजनिक हुँदै आएका थिए। नेपाल स्टक एक्सचेन्ज (नेप्से), कम्पनीका वेबसाइट, पत्रपत्रिका तथा अन्य सञ्चारमाध्यमबाट सूचना प्राप्त गर्नुपर्ने अवस्थाले गर्दा लगानीकर्तालाई आवश्यक विवरण समयमै संकलन गर्न कठिनाइ हुँदै आएको थियो।
विशेषगरी दोस्रो बजारमा शेयरको आपूर्ति र मूल्यमा प्रभाव पार्न सक्ने संस्थागत गतिविधि तथा शेयर कारोबारमा लगाइएको प्रतिबन्धसम्बन्धी जानकारी विभिन्न स्रोतमा छरिएर रहँदा सर्वसाधारण लगानीकर्तालाई सूचना प्राप्त गर्न चुनौती हुने गरेको थियो।
सीडीएससीको नयाँ व्यवस्थाले यस्ता विवरणलाई एकीकृत गरी सूचना प्रवाहलाई थप व्यवस्थित र पारदर्शी बनाउने अपेक्षा गरिएको छ। यसबाट लगानीकर्ताले लगानी निर्णय गर्न आवश्यक सूचना एउटै प्लेटफर्ममा सहज रूपमा प्राप्त गर्न सक्नेछन्।
नयाँ व्यवस्थामा लकइन अवधि समाप्त हुने विवरणलाई विशेष महत्व दिइएको छ। लकइन अवधि समाप्त भएपछि यसअघि कारोबारमा प्रतिबन्धित रहेका संस्थापक तथा अन्य समूहका शेयर दोस्रो बजारमा कारोबारका लागि योग्य हुन सक्छन्। यस्तो अवस्थामा बजारमा उपलब्ध शेयरको संख्या बढ्न सक्ने भएकाले लगानीकर्ताका लागि लकइन अवधि समाप्त हुने मिति र कारोबारयोग्य बन्ने शेयर संख्याको जानकारी महत्वपूर्ण मानिन्छ।
अब मेरो सेयरमार्फत लकइन अवधि समाप्त हुने मिति र त्यसपछि कारोबारका लागि योग्य हुने शेयर संख्यासमेत हेर्न सकिने भएपछि लगानीकर्ताले बजारमा हुन सक्ने शेयर आपूर्तिको परिवर्तनबारे समयमै जानकारी पाउनेछन्। यसले बजारको सम्भावित अवस्था मूल्यांकन गरी लगानी निर्णय लिन सहयोग पुग्ने अपेक्षा गरिएको छ।
नेपालको पुँजी बजारमा संस्थागत तथा ठूला लगानीकर्ताको तुलनामा सर्वसाधारण लगानीकर्ताले समयमै सूचना प्राप्त गर्न नसक्ने अवस्थालाई पनि नयाँ व्यवस्थाले कम गर्न सहयोग पुर्याउने देखिन्छ।
पछिल्लो समय आईपीओ आवेदन, शेयर हस्तान्तरण तथा आफ्नो पोर्टफोलियो व्यवस्थापनका लागि प्रयोग हुँदै आएको मेरो सेयरलाई कम्पनीका महत्वपूर्ण सूचना प्राप्त गर्ने माध्यमका रूपमा समेत विस्तार गरिएको छ। लाखौँ लगानीकर्ता आबद्ध रहेको पुँजी बजारमा सूचना प्रवाहलाई एकीकृत र सहज बनाउने यो पहलले बजारको पारदर्शिता, लगानीकर्ता सचेतना तथा डिजिटल सेवाको विस्तारमा थप योगदान पुर्याउने अपेक्षा गरिएको छ।
![$adHeader[0]['title']](https://bfisnews.com/images/bigyapan/1794925158_1200x100.gif)




 (3) (1).gif)


.gif)
.gif)









प्रतिक्रिया