मिड सोलु हाइड्रोपावरको मुनाफा २२५ प्रतिशतले बढ्यो, इपिएस १९.३५ रुपैयाँ, सम्पुर्ण सूचकमा सुधार

BFIS News
2025 Feb Wed 22:13

मिड सोलु हाइड्रोपावरको मुनाफा २२५ प्रतिशतले बढ्यो, इपिएस १९.३५ रुपैयाँ, सम्पुर्ण सूचकमा सुधार

काठमाडौं । मिड सोलु हाइड्रोपावर कम्पनीले चालु आर्थिक वर्षको दोस्रो त्रैमाशिक अवधिमा २२४.१४ प्रतिशतले मुनाफा बढाउन सफल भएको छ । कम्पनीले पुस मसान्तसम्ममा ७ करोड २३ लाख रुपैयाँ मुनाफा आर्जन गरेको छ । गत वर्षको यहि अवधिमा २ करोड २२ लाख रुपैयाँ मुनाफा आर्जन गरेको थियो ।

कम्पनीको विद्युत बिक्रीबाट २४ प्रतिशतले आम्दानी बढेको छ । कम्पनीले यस्तो आम्दानी ६ महिनामा १७ करोड ७८ लाख रुपैयाँ आर्जन गरेको छ । गत वर्षको यहि अवधिमा कम्पनीले १४ करोड ३२ लाख रुपैयाँ आर्जन गरेको छ । मुनाफामा सुधार सँगै प्रतिशेयर आम्दानी १९.३५ रुपैयाँ पुगेको छ । प्रतिशेयर नेटवर्थ ११२ रुपैयाँ छ ।

चुक्ता पूँजी ७४ करोड रहेको कम्पनीको जगेडा कोषमा ९ करोड ११ लाख ७१ हजार रुपैयाँ सञ्चित भइसकेको छ । आयोजना निर्माणका क्रममा लिएको दीर्घकालिन कर्जा भने एक अर्ब ३० करोड तिर्न बाँकी छ ।

कम्पनीले निर्माण गरेको आयोजनाले २०७९ पुस १५ गतेदेखि व्यवसायिक रुपमा विद्युत उत्पादन शुरु गरी सोलुखुम्वुको तिङ्ला सव–स्टेशनवाट नेपाल विद्युत प्राधिकरणलाई विद्युत बिक्रि गर्दै आइरहेको छ । नेपाल धितोपत्र वोर्डबाट प्रारम्भिक सार्वजनिक शेयर निष्काशन गर्न स्वीकृत प्राप्त गरी कम्पनीले दोस्रो बजारमा २०८० असोज २८ गतेवाट शेयर कारोवार शुरु गरेको थियो ।

कम्पनीको शेयर संरचना हेर्ने हो भने संस्थापक समुह तर्फ ५९,८७,२०० कित्ता र सर्वसाधारण तर्फ १४,९६,८०० कित्ता शेयर रहेको छ । जसमा संस्थापनको ८० प्रतिशत र सर्वसाधारणको २० प्रतिशत स्वामित्व रहेको छ ।

दोस्रो बजारमा कम्पनीको शेयरमा लगानीकर्ताको उत्तीकै आकर्षण देख्न सकिन्छ । एक वर्षको अवधिमा कम्पनीको शेयर मूल्य ११८० रुपैयाँसम्म पुग्यो भने न्युनतम ५६२ रुपैयाँमा कारोबार भयो ।