शिखर इन्स्योरेन्सको रेटिङ ‘AA-’ मा उकासियो, दीर्घकालीन स्थायित्व र सशक्त वित्तीय अनुशासन सबैभन्दा बलियो पक्ष

काठमाडौं, जेठ ११ । शिखर इन्स्योरेन्स कम्पनीको रेटिङमा उल्लेख्य सुधार आएको छ। इक्रा नेपालले गरेको रेटिङ अनुसार कम्पनीले रेटिङलाई सुधार गर्दै [ICRANP-IR] A+ बाट उकासेर [ICRANP-IR] AA-  प्राप्त गर्न सफल भएको छ। यस  रेटिङले कम्पनीको वित्तीय दायित्व पूरा गर्ने क्षमतामा उच्च स्तरको सुरक्षालाई जनाउँछ, जसमा क्रेडिट जोखिम अत्यन्त न्यून मानिन्छ।

रेटिङमा गरिएको यो सुधार कम्पनीको व्यवसाय विस्तारदेखि लिएर जोखिम बहन गर्नसक्ने क्षमतामा आएको वृद्धि, पछिल्ला वर्षहरूमा दाबी अनुपातमा देखिएको गिरावट, अन्डरराइटिङ मुनाफामा निरन्तरता र समग्र नाफामा देखिएको स्थायित्वका कारण कम्पनीले राम्रो रेटिङ प्राप्त गरेको हो।

कम्पनीको मजबुत पक्ष

शिखर इन्स्योरेन्सले निर्जीवन बीमा उद्योगमै सर्वाधिक धेरै व्यवसाय गर्दै आएको छ। पछिल्ला मर्जरहरूपछि पनि कम्पनीले बजार हिस्सा १२–१३ प्रतिशत सुरक्षित राख्दै बजार विस्तारमा आक्रामक देखिएको छ। सन् २००४ देखि सञ्चालनमा आएको कम्पनीको दीर्घकालीन ट्र्याक रेकर्ड, देशभर फैलिएको शाखा सञ्जाल, अनुभवी व्यवस्थापन, सुदृढ जोखिम व्यवस्थापन नीति र बलियो पुनर्बीमा संरचना कम्पनीको मजबुत पक्षहरू हुन्।

कम्पनीले प्रमुख पुनर्बीमाकर्ता ‘ह्यानोभर रे’ (जर्मनी) सँगको सहकार्य कायम राखेको छ, जसको वित्तीय अवस्था उच्चस्तरको छ। २०७२ को भूकम्प र २०८१ को बाढीका समयमा कम्पनीको प्रभावकारी दावी भुक्तानी क्षमताले ग्राहकहरु माझ विश्वास बढाएको छ।

सॉल्भेन्सीको सन्दर्भमा, आ.व. २०८०/८१ को मध्य जुलाईसम्म शिखरको सॉल्भेन्सी मार्जिन ३.६७ गुणा रहेको छ, जुन नियामक न्यूनतम सीमा १.३ गुणाको तुलनामा धेरै माथि हो। त्यस्तै, आर्थिक वर्ष २०८१/८२ मा कम्पनीको तरल सम्पत्तिको अनुपात ४.०२ गुणा पुगेको छ।

मुनाफा र दाबीको अनुपात

आर्थिक वर्ष २०८०/८१ मा कम्पनीको मुनाफा सन्तोषजनक रहेको छ। घट्दो दाबी अनुपात, सुधारिएको अन्डरराइटिङ मुनाफा र लगानी आम्दानीबाट प्राप्त सहयोगले मुनाफामा सकारात्मक योगदान पुर्‍याएको छ। हाल २०८१/८२ को पहिलो छ महिनामा कम्पनीको रिटेन्सन अनुपात ३१ प्रतिशत पुगेको छ, जुन उद्योग औसत ४० प्रतिशत भन्दा केही कम भए पनि दाबी अनुपातमा सुधार देखिएको छ।

चुनौतीहरू

यद्यपि, बीमा उद्योगको विखण्डित स्वरूप, पछिल्ला १२–१८ महिनामा देखिएको आर्थिक मन्दीको प्रभाव, र ठूला प्रतिस्पर्धी कम्पनीहरूको उदयले शिखर इन्स्योरेन्सको नेतृत्वमा चुनौती थप्न सक्ने रेटिङ एजेन्सीले जनाएको छ। अझै पनि नेपालको बीमा क्षेत्रमा पहुँच न्यून छ, जुन दीर्घकालीन वृद्धिका लागि अवसर भए पनि अल्पकालीन वृद्धिमा सीमितता देखिएको छ।

लगानीको क्षेत्रमा, बजारमा दीर्घकालीन साधनहरूको अभावले गर्दा ब्याजदरको उतारचढावको जोखिम रहन्छ, जसले कम्पनीको लगानी आम्दानीमा दबाब सृजना गर्न सक्छ। आर्थिक वर्ष २०८०/८१ मा यस्तो दबाबको प्रभाव देखिएको छ।

मोटर बीमामा निर्भरता

आर्थिक वर्ष २०८०/८१ मा कम्पनीको कुल प्रिमियममा करिब २५% र नेट प्रिमियममा ७३% योगदान मोटर बीमाबाट आएको छ। यस क्षेत्रमाथि कुनै पनि नियामकीय वा नीतिगत परिवर्तनले कम्पनीको व्यापारमा प्रत्यक्ष असर पार्न सक्छ। हालैका वर्षमा मोटर बीमासम्बन्धी नीति परिवर्तनको सम्भावनालाई इक्राले निगरानी गरिरहेको छ।

शिखर इन्स्योरेन्सले नेपालको साधारण बीमा क्षेत्रमा मजबुत आधार निर्माण गर्न सफल भएको देखिन्छ। रेटिङ सुधारले कम्पनीको दीर्घकालीन रणनीति, जोखिम व्यवस्थापन, पुनर्बीमा संरचना र वित्तीय अनुशासनमा ग्राहक र लगानीकर्ताको विश्वास बढाउने अपेक्षा गरिएको छ।

भविष्यमा पनि कम्पनीले आफ्नो अग्रणी स्थिति कायम राख्न, लाभप्रदता र सॉल्भेन्सी प्रोफाइललाई निरन्तर सुदृढ गर्दै लगानी आम्दानीको विविधिकरणमा ध्यान केन्द्रित गर्न आवश्यक छ। रेटिङको स्थायित्व दीर्घकालीन वित्तीय रणनीति, बजार प्रतिस्पर्धा र नियामकीय वातावरणसँगै कम्पनीको अनुकूलन क्षमतामा भर पर्नेछ।

शिखर इन्स्योरेन्सको प्रोफाइल

शिखर इन्स्योरेन्स कम्पनी लिमिटेडको स्थापना सन् २००४ को मार्च महिनामा भएको हो। यो कम्पनी नेपालमा निजी क्षेत्रको १३औँ साधारण बीमा कम्पनीको रूपमा स्थापित भएको हो।

शिखर अहिले नेपालको साधारण बीमा बजारमा ठूलो आकारको कम्पनीका रूपमा परिचित छ, जसको बजार हिस्सा आर्थिक वर्ष 2021 देखि 2024 को अवधिमा जम्मा बीमा प्रिमियमको आधारमा करिब १२ देखि १३ प्रतिशत रहेको छ।

२०८१ सालको असार मसान्तसम्म कम्पनीले देशभर ११७ वटा शाखाहरूमार्फत आफ्नो व्यवसाय सञ्चालन गर्नुका साथै बिक्रीपछिको सेवा प्रदान गरिरहेको छ। सूचना प्रणाली जोखिम व्यवस्थापनमा उल्लेखनीय प्रगति गर्दै कम्पनीले हालै ISO 27001:2022 प्रमाणपत्र प्राप्त गरेको छ।

शिखर इन्स्योरेन्सको चुक्ता पूँजी २०८१ असार मसान्तसम्म रु. २ अर्ब ६५ करोड रहेको छ भने सोही अवधिमा कम्पनीको नेट वर्थ रु. ५ अर्ब ३६ करोड मिलियन पुगेको छ। कम्पनीको प्रवर्धक र सर्वसाधारण शेयर स्वामित्व अनुपात ५१:४९ रहेको छ।

२०८१ असार मसान्तसम्म प्रमुख शेयरधारकहरूमा निम्न व्यक्तिहरू र संस्थाहरू रहेका छन्:

• गौरव अग्रवाल (करिब १२%)

• चन्दा शेर्पा (करिब ६%)

• बुद्ध एयर प्रा. लि. (करिब ६%)

• शशिकान्त अग्रवाल (करिब ४%)

• कैलाशप्रसाद सिरोहिया (करिब ४%)

• राजेन्द्रप्रसाद श्रेष्ठ (करिब ४%)

• बिकास जे.बी. राणा (करिब ४%)

यसका साथै अन्य थुप्रै संस्थागत र व्यक्तिगत शेयरधारकहरूको समेत संलग्नता रहेको छ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना