बीमाबाट ४० लाख पाउने लोभमा आफ्नै आमाले गरिन छोराको हत्या !

काठमाडौं। दिपावलीको रमाइलो वातावरण, घर फर्किएको छोरा र आमा–छोराको पुनर्मिलन। तर यो भेट अन्तिम साबित भयो, जव एक २३ वर्षीय युवा आफ्नै आमाको योजनामा निर्मम रूपमा मारिए।

उत्तर प्रदेशको कानपुर देहातको यो हृदयविदारक घटना यतिखेर भारतभर मात्रै नभएर नेपालमा पनि चर्चाको केन्द्र बनेको छ। ४७ वर्षीया विधवा ममता देवीमाथि आफ्नै छोरा प्रदीप शर्मालाई मारेको आरोप लागेको छ। त्यो पनि प्रेमी मयंक कटियार र उनको भाइ ऋषि कटियारसँग मिलेर।

हत्या, जसलाई ‘दुर्घटना’ बनाउने योजना थियो

अक्टोबर २६ को रात, प्रदीपलाई उनका आमाका प्रेमी मयंकले “डिनर खान जाऊँ” भन्दै गाडीमा लगे। प्रदीपलाई के थाहा—उनी फर्केर कहिल्यै घर आउने छैनन्। राजमार्गको सुनसान अँध्यारोमा, मयंक र ऋषिले उनको टाउकोमा हतौडाले बारम्बार प्रहार गरे। प्रदीपको घटनास्थलमै मृत्यु भयो। शवलाई कानपुर–इटावा राजमार्ग नजिकै फ्याँकियो ताकि देख्नेले सोचोस्, “सडक दुर्घटना भयो।”

तर सत्य लामो समय लुक्दैन। प्रारम्भिक रूपमा दुर्घटना ठानिएको यो घटनाको पर्दाफास प्रहरी अनुसन्धानपछि गर्यो। प्रदीपको टाउकोमा गहिरा चोट, र शवको अवस्था देखेर प्रहरीले हत्या भएको पुष्टि गर्‍यो।

प्रेम, विरोध र बीमाको लोभ

प्रदीपका बुबाको निधनपछि ममता देवी र मयंकबीच सम्बन्ध सुरु भएको थियो। यो सम्बन्धलाई प्रदीपले सधैं अस्वीकार गरे। आमाको प्रेमले उनलाई असहज बनायो, र उनी रोजगारीका लागि आन्ध्र प्रदेश पुगे। तर प्रदीपको विरोध नै उनको मृत्युको कारण बन्यो।

प्रहरीका अनुसार, ममता र मयंकले प्रदीपको नाममा ४० लाख रुपैयाँ बराबरको बीमा पोलिसी खरिद गरेका थिए। त्यो रकम हात पार्न र विरोध गर्ने छोरा हटाउन उनीहरूले योजना बुने। ‘दिपावली मनाउन आएका छोरा कहिल्यै फर्किएनन्’ आन्ध्र प्रदेशमा काम गर्दै आएका प्रदीप दिपावली मनाउन घर आएका थिए।

मयंक र ऋषिले उनलाई पुरानो साथीझैँ विश्वास दिलाए। “डिनर खान जाऔँ” भनेर लिए, तर फर्किए शव बनेर। शव फेला परेपछि परिवारले मयंक र ऋषिमाथि शंका गरे। तर आमाले भने ठोकुवा गर्थिन् “मेरो छोरा दुर्घटनामा मरेको हो।” तर जब प्रहरीको अनुसन्धानले पर्दा खोले, सबै स्तब्ध भए।

प्रेमी र उनका भाइ ‘मुठभेड’पछि पक्राउ

प्रहरीले अनुसन्धान अघि बढाएपछि मयंक र ऋषि दुबै पक्राउ परे। ऋषिले प्रहरीमाथि गोली चलाएपछि जवाफी कारबाहीमा उनी घाइते भए। अहिले उनी अस्पतालमा छन्। मयंकको बयानपछि ममता देवीलाई पनि बिहीबार पक्राउ गरियो।

प्रहरीले पत्रकार सम्मेलनमा भनेका छन्, “यो हत्या योजनाबद्ध थियो। ममता र मयंकले बीमाबाट ४० लाख रुपैयाँ पाउने उद्देश्यले प्रदीपको हत्या गरे।”

परिवारको पीडा

प्रदीपका हजुरबुबा जगदीश नारायण शर्मा आँसु पुछ्दै भन्छन्, “आफ्नै आमाले यस्तो गर्न सक्छिन् भन्ने कुरा कल्पना नै गर्न सक्दैनथ्यौं। त्यो पनि पैसाको लागि…” काका सञ्जय र भाइ शिवमले प्रहरीलाई सुरु देखि नै मयंक र ऋषिको संलग्नता बताउँदै आएका थिए। अन्ततः उनीहरूको शंका सत्य साबित भयो।

अब प्रश्न उठ्छ...

एक आमाले कसरी त्यस्तो अपराध गर्न सक्छिन्?

प्रेम र पैसाको लोभले मातृत्वलाई कसरी हरायो?

प्रदीपको ज्यानले समाजलाई एउटा गहिरो प्रश्न छोडेको छ, जब सम्बन्धमा नै विष घुल्छ, तब माया र रगतको अर्थ के रहन्छ?

कानपुर देहातको यो घटना केवल अपराध होइन, चेतावनी हो लोभ, स्वार्थ र गलत सम्बन्धले परिवारलाई कसरी च्यात्न सक्छ भन्ने दुःखद दर्पण।

भारतमा मात्रै होइन नेपालमा पनि बीमाको लाभ लिन यस्ता धेरै अपराधिक घटना हुने गरेको छ। तर यस्तो आपराधिक गतिविधि पश्चात दाबी पाइदैन भन्ने कुराको अज्ञानताले पनि यस्ता घटना हुने गरेका छन्।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना