साना तथा मझौला उद्यमका लागि विश्व बैंकले ९.५ करोड डलरको परियोजना स्वीकृत

काठमाडौं।  साना तथा मझौला उद्यम (एसएमई) को वित्तीय पहुँच विस्तार गर्दै रोजगारी सिर्जना गर्ने उद्देश्यका साथ विश्व बैंकले ९ करोड ५० लाख अमेरिकी डलर बराबरको परियोजना स्वीकृत गरेको छ।

वासिङटन डिसीस्थित विश्व बैंकको प्रधान कार्यालयले आज जारी गरेको विज्ञप्तिअनुसार उक्त परियोजनाबाट एक लाखभन्दा बढी साना तथा मझौला उद्यम लाभान्वित हुने अपेक्षा गरिएको छ। परियोजनामार्फत वित्तीय जोखिम साझेदारी विस्तार, वित्तीय दिगोपन सुदृढीकरण तथा महिलाद्वारा सञ्चालित व्यवसायलाई उत्पादन सुरु गर्न सहयोग पुर्‍याउने लक्ष्य लिइएको छ।

यस परियोजनाअन्तर्गत निक्षेप तथा कर्जा ग्यारेन्टी कोष (डिसिजीएफ) लाई थप सशक्त बनाइनेछ, जसले एसएमईलाई कर्जा पहुँच सहज बनाउन सहयोग पुर्‍याउने विश्व बैंकले जनाएको छ।

माल्दिभ्स, नेपाल तथा श्रीलङ्काका लागि विश्व बैंकका देशीय निर्देशक डेभिड सिस्लेनले परियोजनाले वित्तीय पहुँच सरल बनाई कारोबारी अवरोधहरू घटाउने उल्लेख गरे। उनका अनुसार यसले वित्तीय समावेशिता विस्तार गर्न, सूक्ष्म, साना तथा मझौला उद्यम (एमएसएमई) लाई क्षेत्रीय तथा विश्वव्यापी मूल्य शृङ्खलामा समेट्न तथा निजी क्षेत्र नेतृत्वको रोजगारी सिर्जनामा महत्वपूर्ण योगदान पुर्‍याउनेछ।

‘दिगो तथा समावेशी वित्त परियोजना’ (एसआईएफ) विश्व बैंकको सहयोगमा सन् २०२४ मा सम्पन्न वित्तीय क्षेत्र स्थायित्व तथा आर्थिक वृद्धिका लागि वित्तसम्बन्धी विकास नीतिगत कर्जा (डिपिसी) शृङ्खलाअन्तर्गत गरिएका सुधारहरूको निरन्तरता भएको पनि विश्व बैंकले स्पष्ट पारेको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन