विश्वका शीर्ष १० धनी व्यक्तिहरू २०२६ मा: प्रविधि उद्यमीहरूको सम्पत्तिमा तीव्र वृद्धि

काठमाडौं। विश्वका प्रमुख व्यवसायी तथा उद्यमीहरूको सम्पत्तिमा पछिल्ला वर्षहरूमा उल्लेखनीय वृद्धि देखिएको छ। नवप्रवर्तन, प्रविधिमा आधारित व्यवसाय विस्तार तथा दीर्घकालीन रणनीतिक निर्णयका कारण उनीहरूको कुल सम्पत्ति तीव्र गतिमा बढ्दै गएको अन्तर्राष्ट्रिय प्रतिवेदनहरूले देखाएका छन्।

विश्वका सबैभन्दा धनी ५०० व्यक्तिहरूको संयुक्त सम्पत्ति अभूतपूर्व रूपमा बढ्दै करिब १० ट्रिलियन अमेरिकी डलरको स्तरमा पुगेको छ। विशेषगरी अमेरिकी प्रविधि कम्पनीहरूको सेयर मूल्यमा आएको उछालले विश्वका अर्बपतिहरूको सम्पत्तिमा ठूलो योगदान दिएको छ।

एलोन मस्क, मार्क जकरबर्ग तथा जेन्सेन ह्वाङजस्ता प्रविधि क्षेत्रका अग्रणी उद्यमीहरूले यस वृद्धिमा महत्वपूर्ण भूमिका खेलेका छन्। ब्लूमबर्ग बिलिनियर्स इन्डेक्सका अनुसार संसारका सबैभन्दा धनी व्यक्तिहरूको कुल सम्पत्तिमा भएको करिब १.५ ट्रिलियन डलर वृद्धिमध्ये मात्रै प्रविधि क्षेत्रका आठ प्रमुख उद्यमीहरूले करिब ६०० अर्ब डलरभन्दा बढी योगदान गरेका छन्।

यस सूचीमा ल्यारी एलिसन, जेफ बेजोस, माइकल डेल तथा गुगलका सह–संस्थापक ल्यारी पेज र सर्गे ब्रिन पनि प्रमुख रूपमा रहेका छन्, जसको सम्पत्तिमा पछिल्लो समय उल्लेखनीय वृद्धि भएको छ।

फोर्ब्सले सार्वजनिक गरेको २०२५ को विश्व अर्बपति सूचीअनुसार संयुक्त राज्य अमेरिका ८१३ अर्बपतिसहित पहिलो स्थानमा रहेको छ। त्यसपछि चीन ४७३ अर्बपतिसहित दोस्रो स्थानमा छ भने भारत २०० अर्बपतिसहित तेस्रो स्थानमा पुगेको छ।

एलोन मस्क बने २०२५ का सबैभन्दा धनी व्यक्ति

टेस्ला तथा स्पेसएक्सका प्रमुख एलोन मस्क २०२५ मा विश्वकै सबैभन्दा धनी व्यक्ति बनेका छन्। फोर्ब्सका अनुसार उनको कुल सम्पत्ति ४३३.९ अर्ब अमेरिकी डलर पुगेको छ।

मस्कले सन् २०२४ मा इतिहासमै पहिलोपटक ४०० अर्ब डलरभन्दा बढी सम्पत्ति हुने व्यक्ति बन्ने कीर्तिमान समेत बनाएका थिए। स्पेसएक्स कम्पनीको मूल्याङ्कन करिब ३५० अर्ब डलर पुगेपछि उनको सम्पत्तिमा उल्लेखनीय वृद्धि भएको हो।

डिसेम्बर १ यतामात्रै मस्कको सम्पत्तिमा करिब ९१ अर्ब डलर वृद्धि भएको बताइएको छ। स्पेसएक्ससँगै उनी टेस्लाका प्रमुख हुन् भने सामाजिक सञ्जाल एक्स (X), कृत्रिम बुद्धिमत्ता कम्पनी xAI तथा बोरिङ कम्पनीमा पनि उनको लगानी रहेको छ।

मार्क जकरबर्ग बने विश्वका तेस्रो धनी व्यक्ति

यस वर्षको सूचीमा अर्को उल्लेखनीय परिवर्तन भनेको मेटाका संस्थापक मार्क जकरबर्गले ओराकलका संस्थापक ल्यारी एलिसनलाई उछिन्दै विश्वको तेस्रो धनी व्यक्तिको स्थान हासिल गर्नु हो।

जकरबर्गको कुल सम्पत्ति करिब २११.८ अर्ब डलर पुगेको छ। मेटा कम्पनीको सेयर मूल्यमा आएको वृद्धिले उनको सम्पत्ति बढ्न सहयोग गरेको विश्लेषण गरिएको छ।

त्यस्तै एलिसनको सम्पत्ति करिब २०४.६ अर्ब डलरमा झरेपछि उनी चौथो स्थानमा पुगेका छन्।

एनभिडियाका जेन्सेन ह्वाङ पहिलो पटक शीर्ष १० मा

एनभिडियाका सह–संस्थापक तथा प्रमुख कार्यकारी अधिकृत जेन्सेन ह्वाङ पनि पहिलो पटक विश्वका शीर्ष १० धनी व्यक्तिको सूचीमा परेका छन्।

उनको कुल सम्पत्ति करिब १२०.२ अर्ब डलर पुगेको छ। एनभिडियाको सेयर मूल्य सन् २०२४ मा १७१ प्रतिशतले बढेपछि कम्पनीको बजार मूल्य ३.२८ ट्रिलियन डलरसम्म पुगेको थियो। यसले ह्वाङको सम्पत्तिमा ठूलो वृद्धि गरेको छ। फोर्ब्सको २०२५ को अर्बपति सूचीअनुसार विश्वका शीर्ष १० धनी व्यक्तिहरू यस प्रकार छन्:

एलोन मस्क – ४३३.९ अर्ब डलर (टेस्ला, स्पेसएक्स) – अमेरिका

जेफ बेजोस – २३९.४ अर्ब डलर (अमेजन) – अमेरिका

मार्क जकरबर्ग – २११.८ अर्ब डलर (फेसबुक/मेटा) – अमेरिका

ल्यारी एलिसन – २०४.६ अर्ब डलर (ओराकल) – अमेरिका

बर्नार्ड आर्नोल्ट तथा परिवार – १८१.३ अर्ब डलर (एलभीएमएच) – फ्रान्स

ल्यारी पेज – १६१.४ अर्ब डलर (गुगल) – अमेरिका

सर्गे ब्रिन – १५४ अर्ब डलर (गुगल) – अमेरिका

वारेन बफेट – १४६.२ अर्ब डलर (बर्कशायर ह्याथवे) – अमेरिका

स्टिभ बाल्मर – १२६ अर्ब डलर (माइक्रोसफ्ट) – अमेरिका

जेन्सेन ह्वाङ – १२०.२ अर्ब डलर (एनभिडिया) – अमेरिका

विश्लेषकहरूका अनुसार यी अर्बपतिहरूको सम्पत्तिको ठूलो हिस्सा सार्वजनिक रूपमा कारोबार हुने कम्पनीहरूको सेयरसँग जोडिएको हुन्छ। त्यसैले सेयर बजारको उतार–चढावसँगै उनीहरूको कुल सम्पत्ति पनि निरन्तर परिवर्तन भइरहने गर्दछ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

७० औं अन्तर्राष्ट्रिय भन्सार दिबसमा के एल दुगड समुहका श्याम सुन्दर कनोडिया सम्मानित

राजश्व राष्ट्रको रगत पसिना भएकोले बगेर गएको टुलुटुलु हेरेर बस्न सकिदैन : अर्थमन्त्री शर्मा