स्वास्थ्य बिमा पुनर्संरचना गरिने, प्रणाली दिगो बनाउन बजेटबाट सुधार ल्याइने अर्थमन्त्रीको घोषणा

काठमाडौँ । अर्थमन्त्री डा. स्वर्णिम वाग्ले ले आगामी आर्थिक वर्षको बजेटमार्फत स्वास्थ्य बिमा कार्यक्रमको पुनर्संरचना गरिने बताएका छन् । राष्ट्रिय सभाअन्तर्गत विकास, आर्थिक मामिला तथा सुशासन समितिको बैठकमा बोल्दै उनले वर्तमान मोडालिटीमा कार्यक्रम दीगो रूपमा सञ्चालन गर्न नसकिने अवस्था देखिएको उल्लेख गरे ।

उनका अनुसार गत वर्ष स्वास्थ्य बिमाका लागि १० अर्ब रुपैयाँ विनियोजन गरिएको भए पनि २५–३० अर्ब रुपैयाँसम्मको दाबी खर्च आएको छ, जसका कारण सरकारलाई भुक्तानी व्यवस्थापनमा कठिनाइ भएको छ । निजी अस्पतालहरूमा अनावश्यक परीक्षण र दुरुपयोग बढेको भन्दै उनले कार्यक्रमलाई ‘राइट साइज’ गर्नुपर्ने आवश्यकता औँल्याए ।

अर्थमन्त्री वाग्लेले स्वास्थ्य बिमालाई तीन तहमा पुनर्संरचना गर्ने संकेत पनि दिएका छन् । उनका अनुसार विपन्न वर्गलाई सरकारी सहायता, मध्यम वर्गलाई योगदानमा आधारित सेवा तथा दुरुपयोग नियन्त्रणसहित दीगो प्रणाली विकास गर्ने योजना अघि सारिएको छ ।

चुरोट र मदिराजस्ता वस्तुमा लगाइने करको केही हिस्सा स्वास्थ्य बिमा कोषमा राख्ने विषयमा पनि सरकार सकारात्मक रहेको उनले बताएका छन् । आधारभूत स्वास्थ्य सेवा विपन्न नागरिकको अधिकार भएकाले त्यसलाई सुरक्षित राख्दै प्रणालीलाई वित्तीय रूपमा दिगो बनाउने सरकारको उद्देश्य रहेको उनको भनाइ छ ।

यसैबीच उनले बुढीगण्डकी जलविद्युत आयोजना बारे पनि टिप्पणी गर्दै हालको मोडालिटीमा आयोजना अगाडि बढाउन कठिन रहेको बताएका छन् । हालको लागत प्रति मेगावाट करिब ५० करोड रुपैयाँ पुग्न सक्ने र कुल लागत ६ खर्ब रुपैयाँसम्म जान सक्ने अनुमान गरिएको उनले उल्लेख गरे ।

सरकारले यसअघि वितरण गरिएको करिब ४५ अर्ब रुपैयाँ क्षतिपूर्तिलाई सरकारी इक्विटीका रूपमा गणना गर्दै नयाँ लगानीकर्ता भित्राउने विकल्पमा छलफल भइरहेको उनले जानकारी दिए ।

यसैगरी आगामी बजेटमा खानेपानी आयोजनामा सम्पन्न हुनसक्ने योजनालाई प्राथमिकता दिइने तथा आवश्यक परे थप ८–१० अर्ब रुपैयाँसम्म विनियोजन गर्न सकिने संकेत उनले गरेका छन् ।

राम–जानकी मार्गलाई धार्मिक तथा पर्यटकीय पूर्वाधारसँग जोडेर विकास गर्ने योजना पनि अघि सारिएको छ । जनकपुरलाई प्रमुख पर्यटकीय केन्द्रका रूपमा विकास गर्न भारतसँग संवाद भइरहेको र जनकपुर–अयोध्या सम्पर्क विस्तारका लागि सडक, होटल, विमानस्थल, खानेपानी तथा दक्ष जनशक्ति विकासमा सरकार केन्द्रित रहेको अर्थमन्त्री वाग्लेले बताएका छन् ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना