बीमा दाबी भुक्तानी मार्गदर्शन संशोधन गर्ने तयारीमा प्राधिकरण

काठमाडौं । नेपाल बीमा प्राधिकरणले बीमा दाबी भुक्तानी सम्बन्धी मार्गदर्शन संशोधन गर्ने तयारी गरेको छ । प्राधिकरणले बीमा दाबी भुक्तानी मार्गदर्शन, २०८१ लाई समयानुकूल परिमार्जन गर्न आवश्यक देखिएको भन्दै संशोधन प्रक्रिया अघि बढाएको हो ।

यस पटक बीमक र पुनर्बीमक मात्र होइन, बीमित तथा सर्वसाधारणको समेत राय लिएर मार्गदर्शन परिमार्जन गर्ने तयारी गरिएको छ । पछिल्लो समय बीमा दाबी भुक्तानीमा देखिएका समस्या समाधान गर्न र प्रक्रियालाई सहज बनाउन संशोधन आवश्यक भएको प्राधिकरणले जनाएको छ ।

हालको व्यवस्थाअनुसार दाबी निवेदन दर्ता भएपछि बीमकले अभिलेख राखी जानकारी दिनुपर्ने, साथै विद्युतीय माध्यममा समेत दाबी अभिलेख राख्नुपर्ने व्यवस्था छ । जीवन र निर्जीवन बीमाका लागि छुट्टाछुट्टै दाबी भुक्तानी प्रक्रिया तय गरिएको छ ।

जीवन बीमामा परिपक्व बीमालेखको भुक्तानी १५ दिनभित्र सूचना जारी गरी प्रक्रिया अघि बढाउनुपर्ने र आवश्यक कागजात प्राप्त भएपछि ७ दिनभित्र दाबी भुक्तानी गर्नुपर्ने व्यवस्था छ । मृत्यु दाबीमा हकवालाले निवेदन दिई प्रक्रिया अघि बढाउन सक्ने व्यवस्था रहेको छ ।

निर्जीवन बीमामा दाबी जानकारीपछि जाँचबुझ प्रक्रिया सुरु हुने र आवश्यक परे सर्भेयर नियुक्त गर्नुपर्ने व्यवस्था छ । सर्भे प्रतिवेदन प्राप्त भएको सामान्यतया २१ दिनभित्र दाबी भुक्तानी गर्नुपर्ने प्रावधान छ ।

बीमकले दाबी अस्वीकार गरेमा कारणसहित जानकारी दिनुपर्ने र त्यसमा असन्तुष्टि भए नेपाल बीमा प्राधिकरणमा उजुरी दिन सकिने व्यवस्था पनि रहेको छ । संशोधनपछि यी प्रावधानमा थप सुधार हुने अपेक्षा गरिएको छ ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना