तरलता व्यवस्थापन गर्न राष्ट्र बैंकले १५ अर्ब रुपैयाँको एकवर्षे ऋणपत्र जारी गर्दै

काठमाडौं, असार २९ — बैंकिङ प्रणालीमा रहेको अधिक तरलता व्यवस्थापन गर्ने उद्देश्यले नेपाल राष्ट्र बैंकले १५ अर्ब रुपैयाँबराबरको एकवर्षे ऋणपत्र जारी गर्ने भएको छ।

केन्द्रीय बैंकले आज ‘नेपाल राष्ट्र बैंक ऋणपत्र २०८४ छ’ जारी गर्न लागेको हो। यस ऋणपत्रमा क, ख र ग वर्गका बैंक तथा वित्तीय संस्थाले मात्र आवेदन दिन सक्ने व्यवस्था गरिएको छ।

राष्ट्र बैंकका अनुसार ऋणपत्रका लागि आज मध्याह्न ३ बजेसम्म अनलाइन प्रणालीमार्फत बोलकबोल हुनेछ। बोलकबोल प्रक्रियाबाट नै यस ऋणपत्रको ब्याजदर निर्धारण गरिनेछ।

यो ऋणपत्रको अवधि एक वर्ष रहनेछ। ऋणपत्रको साँवा २०८४ असार २९ गते भुक्तानी गरिनेछ भने ब्याज अर्धवार्षिक रूपमा वितरण गरिने व्यवस्था छ।

राष्ट्र बैंकले न्यूनतम ५ करोड रुपैयाँदेखि आवेदन दिन सकिने जनाएको छ। साथै, ५ करोड रुपैयाँले भाग गर्दा निःशेष भाग जाने गरी कुल आह्वान गरिएको १५ अर्ब रुपैयाँसम्म बोलपत्र पेस गर्न सकिने व्यवस्था गरिएको छ।

केन्द्रीय बैंकले पछिल्ला दिनहरूमा बैंकिङ प्रणालीमा देखिएको अधिक तरलता व्यवस्थापन गर्न नियमित रूपमा निक्षेप संकलन उपकरण तथा ऋणपत्रमार्फत बजारबाट रकम खिच्ने नीति अवलम्बन गर्दै आएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?