पहिरो हटाइएपछि नारायणगढ–मुग्लिन सडक दुवैतर्फ सञ्चालनमा

चितवन । चितवनको नारायणगढ–मुग्लिन सडकखण्डमा सुक्खा पहिरोका कारण अवरुद्ध भएको यातायात सेवा पुनः सञ्चालनमा आएको छ।

पहिरो हटाउने काम सम्पन्न भएपछि मंगलबार दिउँसोदेखि सडक दुवैतर्फ खुला गरिएको प्रहरीले जनाएको छ।

इच्छाकामना गाउँपालिका–५ स्थित खहरे खोलानजिक आज बिहान करिब ८ः३० बजे सडकमाथिबाट ढुङ्गासहित सुक्खा पहिरो खसेपछि उक्त सडकखण्ड पूर्ण रूपमा अवरुद्ध भएको थियो।

जिल्ला ट्राफिक प्रहरी कार्यालय चितवनका प्रमुख प्रहरी निरीक्षक अनिल थापाका अनुसार पहिरो पन्छाउने कार्य सम्पन्न भएपछि दिउँसो १ः१५ बजेदेखि सडक दुवैतर्फ सञ्चालनमा ल्याइएको हो।

यसअघि पहिरो हटाउने कार्य जारी रहेकै अवस्थामा बिहान ११ः१५ बजेदेखि सडकलाई एकतर्फी रूपमा सञ्चालन गर्दै एम्बुलेन्स तथा मोटरसाइकललाई प्राथमिकताका साथ आवतजावत गराइएको थियो।

पहिरो हटाउन नारायणगढबाट लोडर, स्काभेटर र ब्याकहो तथा मुग्लिनबाट थप लोडर परिचालन गरिएको प्रहरीले जनाएको छ।

सडक पूर्ण रूपमा सञ्चालनमा आएपछि अवरोधका कारण रोकिएका सवारीसाधन क्रमशः आफ्नो गन्तव्यतर्फ प्रस्थान गरेको जिल्ला ट्राफिक प्रहरी कार्यालयले जनाएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन