ग्लोबल आइएमई बैंकको नाफा र ईपीएस दुवै बढे, वितरणयोग्य मुनाफामा समेत वृद्धि

BFIS News
2025 Nov 07 09:50

ग्लोबल आइएमई बैंकको नाफा र ईपीएस दुवै बढे, वितरणयोग्य मुनाफामा समेत वृद्धि

काठमाडौं । ग्लोबल आइएमई बैंक लिमिटेड (GBIME) ले चालु आर्थिक वर्ष २०८२/८३ को पहिलो त्रैमाससम्मको अपरिष्कृत वित्तीय विवरण सार्वजनिक गरेको छ।

प्रकाशित विवरण अनुसार, बैंकको खुद नाफा, प्रतिशेयर आम्दानी (ईपीएस) र वितरणयोग्य मुनाफा सबैमा वृद्धि भएको छ।

बैंकले चालु आर्थिक वर्षको पहिलो तीन महिनासम्ममा १ अर्ब ८५ करोड ५८ लाख रुपैयाँ खुद नाफा आर्जन गरेको छ, जुन गत आर्थिक वर्षको सोही अवधिको १ अर्ब ५१ करोड २१ लाख रुपैयाँभन्दा २२.९२ प्रतिशतले बढी हो।

खुद ब्याज आम्दानी र सञ्चालन मुनाफामा वृद्धि भएकाले बैंकको खुद नाफा बढेको हो। समीक्षाअवधिमा बैंकको खुद ब्याज आम्दानी ०.३४ प्रतिशतले र खुद फि तथा कमिशन आम्दानी २.६२ प्रतिशतले बढेको छ। त्यस्तै, कुल सञ्चालन आम्दानी ५.३६ प्रतिशत र सञ्चालन मुनाफा १०.४४ प्रतिशतले वृद्धि भएको छ।

सोही अवधिसम्ममा बैंकको वितरणयोग्य मुनाफा पनि बढेर ४ अर्ब ८४ करोड ९५ लाख रुपैयाँ पुगेको छ, जबकि वितरणयोग्य प्रतिशेयर आम्दानी २२ रुपैयाँ ९५ पैसा रहेको छ।

नाफासँगै बैंकको ईपीएस पनि वृद्धि भएको छ। समीक्षाअवधिमा बैंकको ईपीएस २ रुपैयाँ ७७ पैसा बढेर १९ रुपैयाँ ५१ पैसामा पुगेको छ। असोज मसान्तसम्ममा बैंकको प्रतिशेयर नेटवर्थ १७९ रुपैयाँ ५० पैसा र मूल्य–आम्दानी अनुपात (P/E Ratio) १२.१० गुणा रहेको छ।

३८ अर्ब ११ करोड रुपैयाँ चुक्ता पूँजी रहेको बैंकको जगेडा कोषमा ३० अर्ब ३० करोड रुपैयाँ सञ्चित छ। बैंकले असोज मसान्तसम्ममा ५ खर्ब ८२ अर्ब रुपैयाँ निक्षेप संकलन गरी ४ खर्ब २१ अर्ब रुपैयाँ कर्जा प्रवाह गरेको जनाएको छ।