व्यापारिक विवाद समाधानका लागि इयू र चीनबीच ब्रसेल्समा उच्चस्तरीय वार्ता

ब्रसेल्स । युरोपेली सङ्घ (इयू) र चीनबीच बढ्दो व्यापारिक विवाद समाधान गर्ने उद्देश्यले सोमबार ब्रसेल्समा उच्चस्तरीय वार्ता सुरु भएको छ।

वार्तामा चिनियाँ वाणिज्यमन्त्री वाङ वेनताओ र इयूका व्यापार तथा आर्थिक सुरक्षा आयुक्त मारोस शेफ्चोभिच सहभागी छन्।

दुवै पक्षबीच दिनभर चल्ने छलफलमा व्यापार असन्तुलन, सरकारी अनुदान, भन्सार नीति तथा बजार पहुँचका विषयलाई प्राथमिकताका साथ उठाइने जनाइएको छ। पछिल्लो समय चीनबाट हुने आयात उल्लेखनीय रूपमा बढेपछि युरोपेली उद्योगमा परेको प्रभावबारे इयूले निरन्तर चासो व्यक्त गर्दै आएको छ।

केही साताअघि इयूका सदस्य राष्ट्रका नेताहरूले युरोपेली आयोगलाई बेइजिङसँग वार्तामार्फत समाधान खोज्न निर्देशन दिएका थिए। आवश्यक परे युरोपेली उद्योगको संरक्षणका लागि थप सुरक्षा उपाय लागू गर्न पनि आयोगलाई आग्रह गरिएको थियो।

तथ्यांकअनुसार सन् २०२५ मा चीनसँग इयूको वस्तु व्यापार घाटा करिब ३६० अर्ब युरो पुगेको छ। इयूले चिनियाँ सरकारी अनुदानका कारण त्यहाँ उत्पादित सस्ता वस्तुले युरोपेली उद्योगको प्रतिस्पर्धात्मक क्षमता कमजोर बनाएको आरोप लगाउँदै आएको छ।

यसअघि इयूले चीनमा उत्पादित विद्युतीय सवारीसाधनमा अतिरिक्त भन्सार शुल्क लागू गरिसकेको छ। साथै स्टिल, साना पार्सल तथा अन्य आयातित वस्तुमा समेत संरक्षणात्मक उपाय अपनाइएको छ। आवश्यकता अनुसार थप कदम चाल्ने तयारी पनि युरोपेली आयोगले गरेको जनाएको छ।

यद्यपि इयूले व्यापारिक तनावलाई थप चर्काउनेभन्दा वार्तामार्फत समाधान खोज्ने नीति अवलम्बन गरेको जनाएको छ। चीनले भने आफूविरुद्ध लक्षित कुनै पनि व्यापारिक कदमको प्रतिकार गर्ने चेतावनी दिँदै आएको छ। यसअघि चीनले युरोपेली कोन्याकमा अतिरिक्त शुल्क लगाउनुका साथै बङ्गुरको मासु र दुग्धजन्य उत्पादनमाथि एन्टी–डम्पिङ अनुसन्धान सुरु गरेको थियो।

चीनसँगको व्यापारिक सम्बन्धका विषयमा इयू सदस्य राष्ट्रहरूबीच समान धारणा छैन। जर्मनीले चीनसँगको आर्थिक सम्बन्धलाई ध्यानमा राख्दै सतर्क नीति अपनाइरहेको छ भने स्पेनले चिनियाँ लगानी आकर्षित गर्न व्यवहारिक दृष्टिकोण आवश्यक रहेको बताउँदै आएको छ।

गत साता इयूका लागि चिनियाँ राजदूत चाइ रुनले दुवै पक्षलाई साझेदारका रूपमा अघि बढ्न आग्रह गर्दै मतभेद संवादमार्फत समाधान गर्नुपर्ने बताएका थिए।

ब्रसेल्समा हुने वार्ता सम्पन्न भएपछि चिनियाँ वाणिज्यमन्त्री वाङ वेनताओ बेलायतको राजधानी लन्डन जाने कार्यक्रम रहेको जनाइएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन